ABŞ ordusu Suriyanın qərbindəki Xmeimim aviabazasında Rusiya ordusunun S-400 hava hücumundan müdafiə sisteminin imkanlarını sınaqdan keçirir.

Ordu.az Rusiyanın “Avia.Pro” nəşrinə istinadən xəbər verir ki, ABŞ hərbi təyyarələrdən istifadə edərək, Suriyanın Latakiya vilayətində yerləşən Xmeimim aviabazası ətrafındakı S-400 tezliklərini əldə etməyə çalışır.

Nəşr bildirib ki, ABŞ hərbi qüvvələri P-8 təyyarələrindən istifadə edərək, Suriya sahillərində bir neçə uçuş həyata keçirib.

Qeyd olunur ki, ABŞ bundan əvvəl Rusiyanın Krım ətrafında yerləşdirdiyi HHM sistemləri üzərində də eyni əməliyyatı keçirib.

Ekspertlər ABŞ-ın israrla S-400-ləri əldə etmək istəyini təsadüfi saymırlar. Bunun daha çox Rusiyadan bu sistemləri alan Türkiyə kimi ölkələrə hesablandığı bildirilir. Amerika bu raketlərin plagiatını əldə edərsə, beynəlxalq qanunlarda bunun pozuntu olub-olmadığı yönündə fərqli mövqelərə rast gəlirik. Eyni zamanda, Birləşmiş Ştatların buna nail olub-olmayacağı yönündə də səslənən fikirlər birmənalı deyil. 

Hərbi icmalçı Ramil Məmmədli müsavat.com-a bunları dedi ki, “soyuq müharibə”nin bitməsinə baxmayaraq, ABŞ-la Rusiya bir-birinə qarşı hərbi-texniki kəşfiyyat əməliyyatlarını hələ də davam etdirirlər: “SSRİ dağıldıqdan sonra ABŞ sovet istehsalı olan bir sıra texnologiyalar haqda kəşfiyyat məlumatları əldə etsə də, son illərdə bu məsələdə amerikalılar üçün problemlər yaranıb. Məsələ burasındadır ki, 2000-ci illərin əvvəllərindən başlayaraq Rusiyanın yaratdığı yeni texnologiyalara amerikalıların giriş əldə etməsi çətinləşib. Bu Rusiyanın yenidən millitarist dövlət siyasəti yürütməsi ilə bağlıdır. Son illərdə Rusiyanın Suriya siyasəti isə ABŞ və İsrail üçün ciddi başağrısı olub. Rusiyanın Suriya ərazisində Hava Hücumundan Müdafiə sistemlərinin sayını artırması və bu ölkəyə daha müasir zenit-raket komplekslərini yerləşdirməsi qərb hərbi blokunun manevr imkanlarını məhdudlaşdırıb. Rusiya mövqelərini daha da gücləndirərək, bu ölkədə S-400 ZRK-ları yerləşdirməklə gərginliyi bir az da artırıb. ABŞ və regionda ona müttəfiq olan İsrail bunu ciddi narahatlıq kimi qiymətləndirərək, öz milli maraqlarına zərbə və bunun Suriya prezidenti Bəşər Əsədi açıq mühafizə edilməsi hesab ediblər. Belə olan təqdirdə S-400 SRK-nın imkanlarını öyrənmək və zəif nöqtələrini müəyyənləşdirmək məqsədilə bu texnika ətrafında amerika və israillilərin texnoloji kəşfiyyat əməliyyatlarının sayı artıb. ABŞ ordusu bütün mümkün imkanlardan istifadə edərək, S-400-ün rəqəmsal sisteminə giriş əldə etmək üçün tədbirlər görür. Bunun üçün ABŞ-ın kəşfiyyat təyyarələri davamlı olaraq Suriyanın hava sərhəddini pozaraq, bu zenit-raket komplekslərinin yerləşdiri ərazilərdə uçuş həyata keçirirlər. ABŞ-ın radioelektron kəşfiyyatı həyata "Lockheed EР-3Е Orion" təyyarəsi tez-tez adıçəkilən ərazidə görünür və amerikalılar bunu gizlətmirlər. Lakin bu mümkündürmü? Əlbəttə S-400-lərin ixtiraçısı və istehsalçılarının sözlərinə görə, bu sistemin rəqəmsal bilgilərinin əldə olunması imkansızdır. Buna səbəb isə S-400 ZRK-nın rəqəmsal sisteminin xüsusi alqoritmlər əsasında formalaşması və bunun davamlı olaraq dəyişməsidir. Rusiyalı alimlərin sözlərinə görə, S-400 ZRK-ya edilən istənilən radioelektron hücum zamanı alqoritmlər sürətlə dəyişir və bununla da məlumat bazasının müdafiəsi həyata keçirilir. Hesab edirəm ki, ABŞ-ın Rusiyanın Suriyadakı S-400 sistemlərinin tezliklərini əldə etməyə çalışır" - kimi informasiyaları yayması, sadəcə amerikalıların informasiya müharibəsidir və bu Rusiyanı narahat saxlamaq məqsədi daşıyır. Çünki bu cür texnologiyaların məlumat bazasının əldə olunması üçün kəşfiyyat təyyarələrinin uçuş həyata keçirməsi çox azdır. Hər halda istehsalçı tərəfə S-400 ZRK-ya bu cür radio elektron mübarizə (REM) hücumlarının olacağı əvvəlcədən bəllidir. O ki qaldı məsələnin beynəlxalq qanunvericiliklə təhlil olunmasına, dünya ölkələri hər zaman bir-birinə qarşı texnologiya kəşfiyyatı həyata keçiriblər. Bunun qarşısını almaq və qanunla qadağan etmək mümkün deyil”.