Tanınmış teleaparıcı, psixoloq İlham Mirzəyevin iyunun 12-də axşam saatlarında fəaliyyət göstərdiyi “Space” televiziyasından evə gedərkən üç nəfər maskalı şəxs tərəfindən hücuma məruz qalması, boğaz nahiyəsindən bıçaq xəsarəti alması barədə mətbuatda bir müddət öncə xəbərlər yayıldı. Daha sonra teleaparıcı bununla bağlı açıqlamalar verdi və bildirdi ki, maskalıların biri dayısı qızının həyat yoldaşıdır. Dediyinə görə, həmin adam dayısı qızı ilə aralarında olan nikah müqaviləsini ləğv etdirmək istəyir. Məqsəd də bundan ibarətdir ki, “malı-mülkü ələ keçirsin”. İlham Mirzəyev ondan başqa kimsəsi olmadığından bu işdə dayısı qızına kömək etdiyini və elə bundan sonra da dayısı qızının ərinin ona düşmən kəsildiyini bildirdi. Həmin ərəfədə teleaparıcı həmin oğlanın ona şər-böhtan atması, ölümlə təhdid etməsi ilə bağlı mətbuata açıqlamalar da verdi. Hədə-qorxulardan bezdiyini deyən psixoloq hüquq-mühafizə orqanlarına müraciət etdiyini bəyan etdi. Bu məsələ ilə bağlı Bakı Şəhər Prokurorluğu, Yasamal Rayon Polis İdarəsi araşdırmalara başladı və nəticədə psixoloqun dayısı qızının əri həbs olundu.

Xatırladaq ki, dünən teleaparıcının dayısı qızının qayınanası Lyudmila Əliyeva mətbuat vasitəsi ilə ölkə prezidentinə müraciət edib. Lyudmila xanım prezident İlham Əliyevə, baş prokuror Zakir Qaralova, daxili işlər naziri Ramil Usubova, ombusdman Elmira Süleymanovaya teleaparıcı İlham Mirzəyevin əməllərindən şikayət edib. Müraciətdə bildirilir ki, oğlu Əliyev Asif “Space” telekanalının aparıcısı İlham Mirzəyev tərəfindən şər və böhtana məruz qalıb. Ananın sözlərinə görə, İlham Mirzəyev telekanaldan çıxarkən oğlu tərəfindən bıçaqlanmayıb:

“Güya oğlum həmin axşam onu telekanaldan çıxarkən bıçaqlayıb. Həmin axşam oğlum evdə bizimlə bərabər İlhamın “Etibar edin” proqramını izləyirdi. Bu necə ola bilər ki, həmin gecə o bıçaqlansın? Bu, şər-böhtandır”.

Ananın dediyinə görə, teleaparıcının məqsədi onlardan külli miqdarda pul qoparmaq, varlanmaq həvəsidir. Lyudmila xanım onu da bildirib ki, İlham Mirzəyev əslində bıçaqlanmayıb, sadəcə, bu barədə özünə hansı yollarlasa ekspertiza rəyi alıb.

Oğlunun həbsinə gəlincə, İ.Mirzəyev yüksək vəzifəli dostlarının köməyi ilə Asif Əliyevi “cinayətkar” adı ilə həbsə atdırıb. L.Əliyeva onu da əlavə edib ki, əllərində İ.Mirzəyevin böhtanlarını aşkar edəcək təkzibedilməz dəlillər var, amma hazırda onları üzə çıxara bilmirlər. Bu dəlilləri ortaya ilk məhkəmə iclasında çıxaracaqlarını söyləyən ana qorxduqlarını bildirib:

“Əgər bu barədə İ.Mirzəyev xəbər tutsa, dəlillərimizi məhv edər. Çünki faktiki istintaqa təsir göstərir, prosesin qeyri-obyektiv, özünün xeyrinə aparılmasına cəhd edir”.

Əslində nə baş verib? İlham Mirzəyev doğrudan da bıçaqlanıbmı? Qeyd edək ki, İ.Mirzəyevin dayısı qızını ərə verdiyi Asif Əliyev iş adamıdır, biznes fəaliyyəti ilə məşğul olur. Yəni maddi imkanları olan şəxsdir. Və evlənərkən qız tərəfinin, yəni İlham Mirzəyevin təkidi ilə gələcək həyat yoldaşı ilə nikah müqaviləsi imzalayıb. Boşanacaqları təqdirdə həyat yoldaşını mənzillə təmin etmək mükəlləfiyyətini üzərinə götürüb. Aydın məsələdir ki, heç bir kişi boşanmaq məqsədilə ailə qurmur. Üstəlik, onun əvvəlcədən boşanmaq planları olsaydı, heç vaxt nikah müqaviləsi imzalamazdı. Bu, həyatdır, taledir, evləndikdən sonra cütlüyün münasibətlərində gərginliklər, problemlər yaranıbsa, hətta ayrılmaq həddinə çatıbsa, (Lyudmila Əliyevanın dediyinə görə, gənc ailənin münasibətlərinin korlanmasında İlham Mirzəyev və onun anası Gülarə xanım ciddi “rol” oynayıb) bu məsələni ərlə arvadın ya özləri, özləri də bacarmasa, valideynləri yoluna qoymalıdır. Amma burada “hakim” rolunda bibioğlu, yəni İlham Mirzəyev çıxış edir. Absurd deyilmi?

Daha bir maraqlı məqam: Həbsdən öncə də, sonra da ev məsələsində razılığa gəlmək üçün A.Əliyevin ailə üzvləri dəfələrlə İlham Mirzəyevlə telefonla danışıblar, gənc qadını mənzillə təmin etməyə hazır olduqlarını bəyan ediblər. Amma hər dəfə İlham Mirzəyev yersiz bəhanələrlə bundan imtina edib. Niyə? Məqsəd nədir? Əslində bibioğlunun bu məsələdə məntiqlə bir məqsədi ola bilər: gənc ailənin dağılmasının qarşısını almaq, ərlə arvadı barışdırmaq. İ.Mirzəyevinsə barışdırmaq əvəzinə, prosesi daha da alovlandırması ortadadır. Asif Əliyev şərlənərək həbs edildikdən sonra isə İlham Mirzəyevin vəkili Asif Əliyevin vəkilinə bildirib ki, teleaparıcı dayısı qızının mənzillə təmin olunmasından əlavə, özünə də 150 000 manat istəyir. Bu pul ona verilərsə, şikayətini geri götürə bilər...

Sözün əsl mənasında, absurd bir durum. Axı Asif Əliyevin İlham Mirzəyevi bıçaqlayıb-bıçaqlamamasını sübuta yetirmək hüquq mühafizə orqanları üçün çox asan məsələdir. Niyə məsələni bu qədər uzadırlar? İlham Mirzəyevin “sehrli çubuğu” varmı? Bağlı qapılar onun üzünə necə açılır? Günahsız bir insanı adi bir teleaparıcı necə həbsə atdıra bilir? Bu teleaparıcı necə, hansı yolla qanunların, haqq və ədalətin fövqünə qalxa bilib???

Publika.Az İlham Mirzəyevin fəaliyyəti ilə bağlı kiçik bir araşdırma aparıb. Məlum olub ki, o, təkcə teleaparıcılıq və psixoloqluqla məşğul olmurmuş. Nə qədər gülməli də səslənsə, o, siyasi mövzuda qalın-qalın kitabların da müəllifidir və həmin əsərlərə tanınmış ictimai-siyasi xadimlər, Milli Məclis üzvləri, vəzifəli şəxslər rəylər veriblər. (???) Belə çıxır, İ.Mirzəyev özünə yaxşı bir əhatə qura bilib. Necə? Həmin ağır çəkili insanlar televiziya verilişlərində aşağı səviyyəli müğənniləri ağlatmaq imici ilə tanınan İ.Mirzəyevin hansı üstün xüsusiyyətinə görə ona bu qədər yaxınlaşıblar və ya onu yaxınlarına buraxıblar? Hər halda, suallar yaranır...

Əldə etdiyimiz daha bir məlumata görə, İlham Mirzəyev əslində “psixoloq” adı altında qara magiya ilə məşğul olur və həftənin müəyyən günlərində bu məqsədlə müştərilər qəbul edir. Bu qabiliyyəti ilə o, yüksək vəzifəli şəxsləri və millət vəkillərini cəlb edə bilərmi?..