“Gözləyirlər ki, yuxarıdan qərar verilsin, yalnız bundan sonra güzəşt addımı atsınlar”.

Bu fikirləri Yenicag.az-a açıqlamasında mobil operatorların və bankların karantin rejimi şəraitində öz abunəçilərinə və müştərilərə hər hansı güzəşt etməmələrinə münasibət bildirən millət vəkili Fazil Mustafa deyib.

Millət vəkili bildirib ki, mobil operatorlar abunəçilərinə müəyyən güzəşt etmək üçün inzibati qərarın olmasını gözləyirlər:

“Gözləyirlər ki, yuxarıdan qərar verilsin, yalnız bundan sonra güzəşt addımı atsınlar. Əslində, mobil operatorlar cəmiyyətlə eyni havanı udmalıdırlar, insanların nə istədiyini bilməlidirlər. Çünki bu günlərdə əhalinin “Evdə Qal” tövsiyəsinə əməl etməsi üçün müəyyən dərəcədə onları təmin edə biləcək resuslar lazımdır. Bu resurs təkcə çörəkdən, qida məhsullarından ibarət deyil. Bunu dövlət sosial qurumlar vasitəsilə edir.

Bu məsələdə digər komponentlər də öz əksini tapmalıdır. İlk növbədə internet resurslarına əlçatanlıq məsələsi həll olunmalıdır. Diqqət edirsinizsə, on minlərlə uşaq evdə qalıb, onlar təhsili davam etdirməlidirlər. Təhsili davam etdirmək üçün internet şəbəkəsi yüksək səviyyədə işləməlidir ki, şagirdlərin, tələbələrin müəllimlərlə rabitəsi qırılmasın. Bunu da təmin edə bilməyəndə, suallar yaranır ki, bu təxribatdırmı, laqeydlikdirmi, yoxsa əhalinin narazı salınması üçün düşünülüb atılan addımdırmı? Bunu araşdırmaq lazımdır.

Bu birinci növbədə mobil operatorların inhisarçılığı ilə bağlı məsələdir. Heç bir rəqabət olmadığına görə, cəmiyyət qarşısında məsuliyyət məsələsində problemlər yaşanır. Rəqabət olanda fikirləşirlər ki, onlardan istifadə edən vətəndaşların rəğbətini qazansınlar. Rəqabətsiz mühitdə onlar hər hansı yenilik etmək marağında görünmürlər”.

Fazil Mustafa qeyd edib ki, mobil operatorların göstərdikləri xidmətlər üzrə qiymətləri endirmələri zərurətə çevrilib:

“Demirik ki, həmin xidmətlər pulsuz olsun. Belə olsa, israfçılıq yaranacaq. Amma heç olmasa, qiymətlərin ən azı 30-50 faiz endirilməsi vacibdir ki, vətəndaşlar bu ərəfədə mobil rabitədən lazımı səviyyədə istifadə edə bilsinlər. Bu da “Evdə Qal”a kömək edəcək komponentlərdən biridir.

Mobil operatorlar bunun üçün dövlət səviyyəsində addımın atılmasını gözləməməlidirlər. Ölkə prezidenti bütün sahələrə aid açıq danışır. Vətəndaşın da, dövlətin də üzərinə düşən vəzifələri deyir. Bundan hamı nəticə çıxarırmı? Hiss olunur ki, rabitə şəbəkəsi ilə bağlı məsələlərdə prezidentin söylədiyi istiqamətdə addım atmağa yönəlik hərəkətlənmə yoxdur. Ona görə də, bu, əhali tərəfindən narazılıqla qarşılanır. Mobil operatorlar birinci növbədə əhalini düşünərək, prezidentin apardığı işdə aktiv rol almalıdırlar.

Türkiyədə və başqa ölkələrdə atılan addımları nümunə olaraq götürmək kifayətdir ki, indiki məqamda kimsə hədsiz gəlir haqda düşünməsin. Hamı ölkənin bu dalğadan nisbətən az itkilərlə çıxarılması barədə düşünməlidir. Vətəndaş yoxsullaşanda, mobil operatorların özü də yoxsullaşacaq. Çünki vətəndaşın ödəməyə pulu olmayandan sonra nə edəcəksən?”.

Fazil Mustafa bu məsələyə hökumət səviyyəsində ciddi müdaxilənin vaxtı gəldiyini vurğulayıb:

“Mobil operatorların qeyd olunan bu fəaliyyətsizliyinə ciddi müdaxilə olmalıdır. Bu gün adları çox çəkilməsə də, “Evdə Qal” kampaniyasına ən böyük dəstəyi “Azərişıq”, “Azəriqaz”, “Azərsu” kimi dövlət qurumları verir. O xidmətlər üzrə kəsinti olmayıb. İndiki ərəfədə bunun özü böyük bir dəstəkdir. Əvvəllər vətəndaşların müəyyən narazılıq etdikləri bu qurumlardan hazırda elə bir şikayət yoxdur. Bu, nəyin hesabınadır? Çünki o qurumların əməkdaşları bütün günü çöllərdədirlər, kəsintisiz fəaliyyəti təmin etməyə çalışırlar.

Digər xidmətlərə gəldikdə isə internet olsa da, sürəti kifayət qədər aşağıdır. Ya bilgisizlik var, lazım olan mütəxəssisləri yetərli səviyyədə deyil, tənzimləyə bilmirlər, ya da laqeyidlikdir, düşünürlər, rəqabətsiz mühitdir, pulumuzu qazanırıq, hətta bəlkə də xəstəliyin yayılmasına maraqlıdırlar. Buna strateji məsələ kimi baxılmalı və təcili tədbirlər görülməlidir”.