Ermənistan baş naziri Nikol Paşinyan Xankəndinə gəlib və təhlükəsizlik şurasının bu dəqiqələrdə iclasını keçirir. 

Moderator.az düşmən dövlətin baş nazirinin bu səfərini şərh etmək üçün İlham İsmayıla müraciət edib. Onun bu məsələ ilə əlaqədar fikirlərini təqdim edirik.

“Paşinyan yenə Qarabağa gəlib və yayılan rəsmi informasiyaya görə bağlı qapılar arxasında Ermənistan və qondarma Qarabağ rejiminin təhlükəsizlik şuralarının birgə iclası keçirilir. Rəsmi informasiyada bildirilir ki, iclasda Qarabağda yeni ordu quruculuğu planları da müzakirə edilən məsələlərdən biridir. 

Ermənistan baş nazirinin Qarabağa gəlməsi və artıq ikinci dəfədir ki, Təhlükəsizlik şurasının iclasını məhz Qarabağda keçirməsi bizi nə qədər qıcıqlandırsa da, məsələnin mahiyyətində Nikol Paşinyanın hal-hazırda gərgin günlər yaşamasıdır. İki gün əvvəl ölkə İctimai televiziyasında geniş çıxış edən baş nazir Qarabağ münaqişəsinə də toxunub. Dağlıq Qarabağ ətrafı rayonların işğalını “təhlükəsizlik zolağı” kimi dəyərləndirən və “Artsaxın təhlükəsizliyinə qarant olmadıqca heç bir torpaq qaytarılmayacaq” fikrini dəfələrlə təkrar edib. Bu fikir erməni siyasətçilərinin və politoloqlarının ciddi tənqidinə məruz qalıb və bu gün də tənqid hədəfi olaraq qalır. Onu tənqid edənlər bildirirlər ki, baş nazirin bəyanatından belə çıxır ki, “beynəlxalq aləm və Azərbaycan təhlükəsizlik qarantiyasını verdiyi halda torpaqlar geri qaytarılacaq?”.  Paşinyan Qarabağa səfər etməklə tənqidlərdən yayınmağı , o cümlədən martın 31-də qondarma rejimdə keçirilməsi nəzərdə tutulan prezident və parlament seçkilərinə hazırlığın vəziyyəti barədə məsələləri müzakirə etməyi qarşısına məqsəd qoyub və bu məqsədlə də tənqidçilərinə daha çox Qarabağla məşğul olduğu görüntüsünü yaratmaq istəyir.

Paşinyanın reytinqi ölkədə aşağı düşür və Münhen debatından sonra bu daha da sürətlənib. Baş nazirin Qarabağa indiki səfəri və seçkilər ərəfəsində gözlənilən başqa səfərləri erməni cəmiyyətinə və millətçilərinə mesajdır ki, daha çox Qarabağla məşğuldur və əslində bu səfərlərlə uğrsuzluğunu kompensasiya etmiş olur.

Azərbaycan tərəfi bu səfərlərə qarşı kəskin mövqeyini nümayiş etdirməli, ümumiyyətlə dövlət başçısı statusunda olan personaların, o cümlədən Nikol Paşinyanın tanınmamış Qarabağ rejiminə səfərlərini qadağan etməli və təhlüksizliklərinə zəmanət vermədiklərini bəyan etməlidir. Bu bəyanat Minsk Qrupu vasitəçi dövlətlərin qarşısında da sərt tələb şəklində qoyulmalıdır”.