Son onilliklərdə idarə və  müəssisələrdə əcaib-qəraib bir dəb düşüb: hər yoldan ötəni “müəllim” deyə çağırırlar.  Xüsusən  banklarda,  yaxud sənəd, arayış-filan verilən qurumlarda işləyən nəzakətli gənc qız və oğlanlar guya mədəni olmaq üçün, məsələn, vəsiqə almağa gələn professora da, manısa da, qızıl alverçisinə də, kartof-soğan, göy satana da, hətta narkomana da “müəllim” deyə müraciət edirlər. Halbuki, bu zahirən nəzakət, mədəniyyət nümunəsi kimi görünsə də, batinən müəllim adını gözdən salmaqdır. Axı bizim gül kimi, müraciət formalarımız var: “bəy”, “xanım”... Kimlər tərgitdirir bunları gənclərimizə?.. Lap “cənab” de, “yoldaş” de, “ağa” de, “xozeyin” de, amma hər yetənə “müəllim” deyib bu müqəddəs peşəni gözdən salma... 

***

Müəllimliyi gözdən salan amillərdən  biri də həmin peşədə işləyən, amma bu ada layiq olmayanlar, bu ada ləkə gətirənlərin meydan sulamasıdır. Söhbət yalnız savaddan, bilikdən, elmdən getmir. Əgər müəllimdə mənəviyyat, əxlaq, halallıq, dürüstlük, səmimilik, fədakarlıq yoxdursa, akademik səviyyəsində biliyi olsa da, onun cəmiyyətə, insanlığa faydası olmaz. Əksinə, ölkənin mənəvi-əxlaqi tənəzzülə sürükləyər... 

*** 

Əgər müəllim əmək haqqının azlığını bəhanə edib şagirdindən, tələbəsindən rüşvət umursa, alırsa, sonra da bundan direktoruna, rektoruna pay verirsə, deməli, o, korrupsioner bir şəbəkənin mütəmadi işlək elementinə çevrilir. Deməli, o özündən yuxarıdakı korrupsioner, rüşvətxor cənabların yanında gözükölgəli olur və yeri gələndə cəmiyyətdəki hər hansı bir haqsızlığa qarşı səsini çıxara bilmir... Çünki özü də alır, özü də bur rüşvət çirkabına bulaşıb... Beləsinə necə “müəllim” deyəsən ki, ağzın ağrımaya?..

*** 

Odur ki, heç kəsin xətrinə dəyməsin... Əvvəla, Qarabağ işğal ediləndən bəri  Şuşa, Kəlbəcər, Laçın və s. kimi cənnət yurdları erməni tapdağı  altında qalan vətəndaşa(özümə də aiddir) xitabən “təbrik”, “mübarək”  sözləri dilimə yatmır... Boğazdan yuxarı da danışa bilmirəm... Amma təbrik edəsi olsam... Bu gün müəllimlər günü ilə bağlı yalnız bu adı şərəflə daşıyanları, yəni maaşı az olsa da, fədakarcasına vicdanına sığınaraq şagirdindən, tələbəsindən rüşvət, hədiyyə ummayan, almayan, direktoruna, rektoruna rüşvət verməyən, yeri gəldikdə özünün də, həmkarlarının da yuxarıdan-aşağıdan haqqını-hüququnu tələb və müdafiə edən, yalan danışmayan, daim dürüst və səmimi olmağa, mümkün qədər saxta qiymət yazmamağa çalışan,  seçkilərə təhsil müdirinin, icra başçısının göstərişi ilə yox, özü könüllü gedən və ürəyi istədiyi namizədə səs  verən, yaltaqlığı, məddahlığı həmişə haqqı deməyə, tərbiyə etdikləri uşaq və gənclərə  doğru yol göstərməyə cəhd edən, bu yolda özünü şam kimi əridən müəllimləri təbrik edirəm. Eləcə də müəllimlərindən, işçilərindən rüşvət ummayan və almayan, təhsil müdirinə-filana rüşvət verməyən,  hansısa səlahiyyət həddini aşan təhsil müdiri və ya icra başçısını tələbi ilə müəllimləri zorla toplayıb seçkilərə yollamayan müəllim direktor və rektorları təbrik edirəm... 

Gün o gün olsun, Allah bizə qeyrət, təpər versin, azad etdiyimiz Qarabağda, Şuşada, Laçında, Kəlbəcərdə... beləcə halallıqla  dərs deyəsiz, direktorluq,  rektorluq edəsiniz...

Sultan Laçın