Ölkənin xeyli sakini iki əsas problemdən: işğal altındakı torpaqlarımızın azad edilməsindən və yoxsul, eləcə də formalaşmağa çalışan orta təbəqəni əsarətdə saxlayan, dövlət büdcəsinə belə, əl uzadan korrupsioner şəbəkədən ağızdolusu şikayətlənir. Fəqət və nə yazıqlar ki, konkret işə, əmələ gələndə danışanların çoxu  boş çıxır.  Məsələn, bir müəllim hər gün Qarabağın erməni əlundə qalmasından,  haqdan-ədalətdən hay-küylə danışır, amma təhsil şöbəsi müdirinə  10-15 min verib işlədiyi məktəbə direktor təyin olunmaq şansı yaranan kimi mövqeyini 180 dərəcə dəyişir.  Yaxud nazirləri, başçıları addımbaşı söyən birisinin babat vəzifə sahibi olan korrupsioner bir qohumu tapılır, öz şirkətində ona yaxşı iş, ev, maşın verir- səsi xırp kəsilir. Yəni belələrinin mübarizəsi şəxsi istəkləri ödənənəcəndir. Halbuki, müqəddəs mübarizə amallarına yetişmək üçün insan hər bir çətinliyə dözməli, pul-para, ev, maşın, yaxud vəzifədən ötrü mənliyini satmamalı, yeri gələndə canından da keçməlidir...

Dəfələrlə deyirik və yazırıq ki, ölkədəki, hətta dünyadakı problemlərin həlli  toplumun, cəmiyyətin iradəsindən asılıdır. Odur ki, istər planetdəki super güclər, istərsə də hər hansı bir ölkədəki totalitar, korrupsioner şəbəkə öz planlarını həyata keçirmək üçün ilk növbədə iradəsiz, şəxsiyyətsiz məxluqlara, yəni insana, xalqa yox, amorf kütləyə arxalanır. Bu baxımdan,  Qarabağın azadlığını və ölkədə korrupsiya və rüşvətxorluğun maksimum azalmasını arzulayan  hər bir Azərbaycan vətəndaşı da bu məqsədlərə çatmaq üçün bir sıra əməllərdən imtina etməlidir. Gəlin onları sadalayaq, görək neçə adamın buna cəsarəti və dəyanəti çatacaq. Belələrindən həm torpaqların azadlığı,  həm də korrupsiyaya qarşı mübarizəyə ictimai dəstək üçün  xüsusi azadlıq mücahidləri dəstələri  də təşkil etmək olar... Bu, bir növ özünü mübariz hesab edənlər üçün bir testdir...

Beləliklə, torpaqlarımızın erməni işğalından azad edilməsini və ölkədəki digər ciddi problemlərin həllini, o cümlədən rüşvətxorluq və korrupsiya şəbəkəsinin çökməsini arzulayan şəxs aşağıdakı əməllərdən uzaq durmalıdır:

Və s. və i.a.

Oxucularda sual yarana bilər ki, yalan danışmağın, yaltaqlanmağın, rüşvət alıb-verməyin, haram içki, kolbasa, sosiska yeməyin, lotereya oynamağın, kredit  götürməyin  və s. Qarabağın azad olunmasına nə dəxli var? Məsələyə həm maddi-dünyəvi, həm də ilahi, teoloji baxımdan diqqətlə yanaşsaq, hər şey aydın olar...   

Dünyəvi baxımdan məsələ ondadır ki, ölkədə  on illərlə formalaşmış korrupsioner, rüşvətxor şəbəkə Qarabağın azad olunmasına imkan vermir, çünki onun üzvlərinə rahatca yeyib-talamaq üçün müharibə yox, “sabitlik” lazımdıır. Və biz əgər, məsələn, hansısa icra başçısının, yaxud nazirin rüşvətxor, korrupsioner, dələduz olduğunu bilə-bilə öz şəxsi maraqlarımız xatirinə onu yalandan tərifləyiriksə, ona yarınırıqsa, onun sahibi olduğu şirkətlərin haram mallarını alırıqsa, onun banklarından kredit götürürüksə, onun öz yerində bərkiməsinə şərait yaradırıq. Və bu minvalla Qarabağın azadlığı, eləcə də korrupsiyaya qarşı mübarizə yolunda əngəlləri öz əlimizlə böyüdür və çoxaldırıq...

İlahi baxımdan, Qurani-Kərim prizmasından yanaşdıqda isə biz yalan, rüşvət, haram yemək, haram içmək  və s. kimi günah əməllərlə çox məşğul olduqca, Allahın bizim Qarabağın azadlığı və ölkədəki rüşvətxorluq, korrupsiya kimi problemlərin həlli üçün etdiyimiz duaları qəbul etməsinə əngəl oluruq... Yəni, söhbət halal, səmimi, ixlaslı mübarizədən gedir.

Bir anlığa təsəvvür edək ki, Azərbaycan əhalisinin, məsələn, 3 milyonu yalan danışmır, hansısa vəzifəliyə yaltaqlanmır, heç kəsə rüşvət vermir, heç kəsdən rüşvət almır, banklardan kredit götürmür, oliqarxların şirkətlərinin arağını, pivəsini, “kola”sını, kolbasasını və s. istehlak etmir...  Və üstəlik, Qarabağın azadlığı və rüşvətxor şəbəkənin çökməsi üçün Allaha dua edir... Korrupsiya şəbəkəsinə maddi, maliyyə baxımından böyük zərbə vurular, vurulmaz? Eyni zamanda Allah həmin insanların Qarabağın azadlığı və s. üçün duasını qəbul edər...  Əks halda, yəni haram və günahlardan imtina etməyəcəkləri təqdirdə Yaradan həmin kəslərin nə duaları, nə də əməllərini qəbul edər. Nəticədə belə Azərbaycan vətəndaşlarının istər torpaqların azadlığından, istərsə də korrupsiya, məmur özbaşınalığına  qarşı mübarizədən danışmağa haqqı olmaz... 

Sultan Laçın