Bir qrup millət vəkili, alim və yazar bu il 60 yaşını qeyd etməyə hazırlaşan, tanınmış şair Murad Köhnəqalanın mənzil probleminin həlli üçün ölkə başçısı İlham Əliyevə və I Vitse Prezident Mehriban xanım Əliyevaya müraciət imzalayıb. 

Müraciətdə uzun illərdir işsiz olan və kirayədə yaşayan şair Murad Köhnəqalanın ağır maddi-sosial durumunu nəzərə alaraq, onun dövlət hesabına mənzillə təmin olunması xahiş olunur.

Müraciətin mətnini olduğu kimi təqdim edirik:

bir qrup millət vəkili, alim, yazardan 

Şair-publisist Murad Köhnəqala haqqında bu məktubu Sizə ünvanlayanda ədəbiyyat və incəsənət adamlarına böyük diqqətinizə güvənir, xahişimizə etinasız yanaşmayacağınıza ümid bəsləyirik.

Nəzərinizə çatdıraq ki, Murad Köhnəqala müstəqillik dövrü şeirimizin formaca yeniləşməsi və məzmunca dərinləşməsində, dünya poeziyasına məxsus ən qabaqcıl xüsusiyyətlərlə zənginləşməsində əvəzsiz xidmətləri olan bir neçə qələm sahibindən biridir. Onun yaradıcılıq potensialı hələ sovet dövründə Azərbaycan Yazıçılar Birliyi rəhbərliyinin diqqətini cəlb edib və o, M.Qorki adına Ədəbiyyat İnstitutunda təhsil almaq üçün Moskvaya göndərilib. Moskvada təhsilini başa vurduqdan sonra vətənə qayıdan şair müxtəlif mətbuat orqanlarında çalışaraq yeni ədəbiyyatla yanaşı azad milli mətbuatın da formalaşmasında müstəsna rol oynayıb.

 

M.Köhnəqala bu il 60 yaşını qeyd etməyə hazırlaşır. O, neçə-neçə şeir və nəsr kitabının, yüzlərlə publisistik məqalənin müəllifi, onlarla gənc yazarın "ustad” dediyi yetkin qələm sahibidir. İstedadlı şairin əsərləri müxəlif dillərə tərcümə olunaraq bir sıra Avropa və keşmiç MDB ölkələrinin mətbuat orqanlarında dərc olunub. Lakin ədəbiyyatımız və mətbuatımızın gəlişməsində bu qədər xidmətləri olan bir şəxs neçə illərdən bəri işsiz olmaqla yanaşı, təəssüf ki, həm də kirayə mənzildə yaşayır. Ailə-uşaq sahibi olan bir qələm adamının evsiz, üstəlik də işsiz olmasının nə qədər çətin olduğunu geniş vurğulamağa, yəqin ki, ehtiyac yoxdur. Əgər şairə dövlət tərəfindən kömək göstərilməsə, onun öz mənzil problemini nə vaxtsa öz gücü ilə həll edəcəyini düşünmək çətindir. 

Biz aşağıda imza edənlər ədəbiyyat və mətbuatımız qarşısındakı xidmətlərini, 60 illik yubileyinin yaxınlaşdığını, çətin maddi durumda yaşadığını nəzərə alıb şair-publisist Murad Köhnəqalaya fərdi mənzil verilməsinə kömək etmənizi xahiş edir, göstərəcəyiniz dəstəyə görə bütün ədəbiyyat və ümumən ictimaiyyət nümayəndələri adından Sizə əvvəlcədən sonsuz minnətdarlığımızı bildiririk.

Redaksiyadan: Müraciətə qoşulma açıqdır.