“1990-cı ildə ermənilərin Bakıda burnu da qanamayıb”
Son aylar “ermənilərin Bakı qətliamı” ilə bağlı böhtan kampaniyasına start verilib. Dünya erməniləri tərəfindən aparılan bu kampaniyanın iştirakçıları guya 1990-cı ilin yanvarında Bakıda minlərlə erməninin “soyqırım” və təzyiqə məruz qalmaları ilə bağlı yalanlar səsləndirməkdə, dünya ictimaiyyətini bu yalanlara inandırmağa çalışmaqdadır.
Moderator.az olaraq “Türk-Azəri” Qadınlar Birliyinin sədri Tənzilə Rüstəmxanlı ilə söhbətimizdə erməni yalanları və bu yalanlara qarşı mübarizə yollarına aydınlıq gətirməyə çalışdıq.
-Tənzilə xanım, ermənilər guya 1990-cı ilin yanvarında Bakıda qətliama məruz qalmaları ilə bağlı kampaniya aparmaqdadır. Sizcə Azərbaycan bu və digər erməni yalanlarını ifşa etmək üçün beynəlxalq müstəvidə cavab addımalrı atmalıdırmı?
-Əlbəttə ki, Azərbaycan erməni yalanlarını ifşa etmək istiqamətində bütün gərəkli addımları atmalıdır. Bu, ermənilərin növbəti böhtan kampaniyasıdır. 1915-ci ildə Türkiyəyə atdıqları iftiranı bu dəfə də Azərbaycana atmağa çalışırlar. Yaxşı olardı ki, Ermənistan şər-böhtan atmazdan öncə 1988-ci ildə dədə-baba torpaqlarından soyqırım edərək qovduqları azərbaycanlıların hesabını versinlər. Törətdikləri vəhşiliklərin, zalımlıqların hesabını ödəsinlər. 1992-ci ilin 26 fevralında Xocalıda törətdikəri soyqırıma görə cavab versinlər. Qarabağın digər rayonlarında həyata keçirdikləri vəhşiliklərin hesabını ödəsinlər.
-Sizcə ermənilərin fasiləsiz olaraq yalan “ixrac etmələri” nə ilə bağlıdır? Niyə gah Türkiyə, gah da Azərbaycan tərəfindən soyqıırma məruz qaldıqlarını iddia edir, özlərini və beynəlxalq ictimaiyyəti bu yalanlara inandırmağa çalışırlar?
-Onlar bir yalan uğruna millət olmağı hədəfləyiblər. Sözdə “erməni soyqırımı” yalanı dünyadakı erməniləri bir arada tutan bir yalandır. Bu böhtan və yalan ermənilərə millət olmaq üçün bir stimul verir. Bəs biz neynirik? Biz hər şeyə tolerant yanaşırıq. Ermənilərin bizə qarşı törətdikləri bunca vəhşiliklərə rəğmən bəziləri onlara münasibətdə yumşaq yanaşmağın tərəfdarıdır. Sapı özümüzdən olan baltaların bu yanaşması erməniləri daha da həvəsləndirir. Ermənilər isə düşünür ki, Türkiyə ilə bağlı hər yerdə siyasi bir qərar çıxarıb qondarma soyqırımı tanıdırıqsa, o zaman niyə 1990-cı ildə Bakıda ermənilərin soyqırıma məruz qalması ilə bağlı yalan uydurub bunu dünyaya yaymayaq?
-1990-cı ildə Bakıdakı ermənilərə qismən də olsa təzyiq olubmu? Buradan gedən ermənilərlə Ermənistandan qovulan azərbaycalılar arasında hansısa şəkildə paralellik aparmaq mümkündürmü?
-1990-cı ildə ermənilərin Bakıda burnu da qanamayıb. Ermənilərin hamısı buradakı mal-mülkünü satıb, yaxud dəyişərək arxayın bir şəkildə Bakını tərk ediblər. Ermənistanda yaşayan azərbaycanlılar isə qətlə yetirildilər, qovuldular, onların bir qismi qışın günü yollarda soyuqdan ölərək dünyadan köçdü.
Biz bu faktları ortaya qoyanda isə bəziləri deyir ki, millətlər arasıdna nifrət toxumu səpməyin. Bəs nə edək? Erməni sevdalılarına tribunaalr yaradaq? Belə olarsa təbii ki, ermənilər Azərbaycanı beynəlxalq məhkəmələrə də verəcək, öz yalanlarını da yayacaqlar. Biz isə bir-birimizi didir, vətənsevərlərin başını əzirik. Sonunda isə bu yanaşma bizi yeni erməni yalanları ilə üz-üzə qoyur. Biz nəhayətdə böhtanlardan özümüzü müdafiə etmək məcburiyyətində qalırıq.
-Azərbaycan hər zaman Qarabağ probleminin sülh yolu ilə həllinə cəhd edib və bu gün də problemin sülh yolu ilə həllinə səy göstərir. Sizcə ölkəmizin sülhpərvər mövqeyi ermənilərin Azərbaycana münasibətində nəyisə dəyişə, erməni yalanlarından imtinaya gətirib çıxara bilərmi?
-Ermənilərin Azərbaycana münasibəti göz qabağındadır. Ortada Xocalı böyüklüyündə bir soyqırım var. Ermənilərin isə əlində heç bir fakt yoxdur. Onların iddiaları da, bu iddialara sübut kimi təqdim etmək istədikləri də böhtan və yalandan başqa bir şey deyil. Dünya onların yalanına inanır. Biz isə sülhdən danışırıq, bununla bağlı müxtəlif kampaniyalar aparırıq. Ancaq bir çeyi bilmək lazımdır. Biz nə deyiriksə deyək, ermənilər öz yalanlarından heç vaxt imtina etməyəcək.
Seymur ƏLİYEV
