Əziz oxucular, tanınmış psixoterapevt və elmi-lədun bilicisi Paşa Yaqub yeni kitabını nəşrə hazırlayıb. 

“HƏYATINIZI DƏYİŞƏCƏK – 2019” adlanan bu kitabda müəllif, üzümüzə gələn 2019-cu ilin astronomik hadisələrini təhlil edərək, növbəti il üçün proqnozlar verib. Kitabda həmçinin, kimya, fizika, biologiya və tibb sahəsində bugünədək elmə məlum olmayan bəzi sirlər açıqlanır. 

Geniş oxucu kütləsi üçün nəzərdə tutulan bu kitaba, müəllifin “Pangeya” romanı da daxil edilib.  

Geniş oxucu kütləsi üçün nəzərdə tutulan bu kitabı hissə-hissə oxucularımıza təqdim edirik. 

(Yazının əvvəlini bu linkdən oxuya bilərsiniz:  //www.moderator.az/news/251466.html)

Çətinliklərlə böyüməsinə baxmayaraq Sülhsevər dərslərini “əla” qiymətlərlə oxuyurdu. Humanitar və dəqiq elmləri mükəmməl mənimsədiyindən, müəllimlərin rəğbətini qazanmışdı... 

Nəhayət, orta məktəbi “əla” qiymətlərlə bitirən Sülhsevər Universitetə daxil oldu. Artıq o  zahiri elmlərlə yanaşı, həm də batini elmlərə maraq göstərirdi. Elmin dərin qatları onu daha çox cəlb edirdi... 

Ona görə də professor Yaqub müəllimin mühazirə vaxtı dediyi bu cümlələr Sülhsevərin beynindən çıxmırdı:

“Elm - zahiri və batini olmaqla, iki qurupa bölünür. Zahiri elmlər məktəbdə müəllimdən və kitabdan öyrənildiyi halda, batini elm əksinə, müəl-limdən öyrənilməz. Buna elmi-ladun deyilir. 

Ladun sözü ərəbcə “dərin qat” mənasını verməklə, elmin dərin qatlarına işarədir. Bu, tək zəhmətlə (oxumaqla) əldə edilə bilməyən, həm də qəlbə gələn duyumla, hissiyyatla qazanılan bilgidir. Vaxtilə peyğəmbərlər və digər kəramət sahibləri bu cür elmə malik olublar və sirlər üzərindən pərdələri məhz bu elmlə qaldırıblar”. 

Yaqub müəllim Akademiyanın fizika insitutunun əməkdaşı idi. Eyni zamanda elmi-lədun bilicisi kimi tanınırdı; bu mövzuda bir xeyli kitabları çap olunmuşdu. Sülhsevər, Milli kitabxanaya və Akademiyanın kitabxanasına gedərək, Yaqub müəllimin bütün kitablarını əldə etmişdi. Hər gün saatlarla oturub, bu kitabları mütaliyə edirdi. 

Oxuduğu bu kitabların təsiri altında Sülhsevər bir gün Allahı zikr edərək, Ona belə dua etdi:

- Ey Kainatı Yaradan! Sən vasitələrlə hər şeyə qadirsən və Sən hər yerdəsən. Dünyada yalnız sülh olsa, hər yer müqəddəs olar. Səndən yalnız ağıl və səbir diləyirəm! Məni ağıl və səbr verdiyin kəslərin yoluna yönəlt! Yönəlt ki, elmlənim, hamıya yaxşılıq və bəşəriyyətə sülh gətirim. Elmi kəşflər edim ki, insanlar boş yerə ölməsin. Yaxşılıq icad edim ki, əmin-amanlıq olsun. Yaradanım! Sən bizi bunun üçün yaratmadınmı?! Bir insanı xilas edən bütün bəşəriyyəti xilas etmiş kimidir. Sənə qovuşmağım üçün mənə sirləri agah et! 

Yaqub müəllimin Pangeya mövzusunda yazdığı kitablar Sülhsevərin diqqətini daha çox cəlb edirdi:

“İlk yaranışda Yer kürrəsində cəmi bir materik olub ki, onun da adı Pangeya olub. Həmin materiki əhatə edən okean isə Pantalas olub.  Zaman keçdikcə həmin Pangeya materiki əvvəlcə iki hissəyə, sonra isə, altı hissəyə bölünüb. 

“Pangeoist” sözünün mənşəyi,  “Pan os” -  “tam”, “bütöv”, “kök” (özül); “geo” - “Yer” mənası verməklə, “bütöv Yer” mənasını bildirir. Bu ideyanın daşıyıcıları pangeyistlər adlanır. 

Göründüyü kimi, ilk yaranışda Yer bütöv olmuş, əsrlər keçdikcə, parçalanaraq, indiki halına gəlmişdir. Necə ki, insanlar əvvəlcə bir atadan, bir anadan doğulduqdan sonra, millətlərə, xalqlara parçalandılar; daha sonra irqlərə, dinlərə, təriqətlərə...  bölündülər və indiki hallarına gəldilər. 

Həmin eyni atanın və ananın övladları artıq biri-birlərinə düşmən kəsilərək, bir xalq digərinin, bir din o birinin, bir təriqət digər təriqətin qanını içməyə hazırdır və içirlər də!

Bütün bunların qarşısın almaq, insanları din və digər mafiyaların əsarətindən qurtarmaq üçün Pangeyizm ideyası  insanlara elmlənməyi və bu mafiyaların quraşdırdıqları ibadətgahlardan - “Allah evləri”ndən uzaq durmağı tövsiyyə edir. Vaxt gələcək pangeyistlərin  təbliğatı bütün dünyaya yayılacaq və insanlar öz əvvəlki hallarına - birlik və sülh hallarına qayıdacaqlar”. 

Bu yeni və mütərəqqi fikirləri oxuduqca, Sülhsevərin qəlbində bəşəriyyəti azad etmək istəyi yarandı. O, özünü artıq bir Pangeyist obrazında görürdü. 

Sülhsevərin beynində bir sual yarandı: pangeyistlər  və onun ardınca gedənlər dinsiz olacaqlarmı? 

Səhər, Yaqub müəllim auditoriyaya girəndə Sülhsevər beynini məşğul edən bu sualı ona ünvanladı. Yaqub müəllim səbr və təmkinlə cavab verdi:

-Əlbəttə ki, yox, oğlum; pangeyistlər  dinsiz deyillər. Onlar Yaradanın birliyini qəbul edirlər. Öz fəaliyyətlərində elmə, əxlaqa, xeyir əməllərə, halallığa və dürüstlüyə - bir sözlə, bəşəri dəyərlərə üstünlük verirlər. Sadəcə, indi mövcud olan  (mafiyaların nəzarətində olan)  heç bir ibadətgaha – sinaqoqa, kilsəyə, məscidə  getməyəcəklər və özləri də heç bir ibadətgah yaratmayacaqlar. Onlar Allahın təkliyini, Allahın hər yerdə olduğunu qəbul edəcəklər. Bu səbəbdən onların inancı  peyğəmbərlərin babası olan İbrahim Peyğəmbərin təbliğ etdiyi Tovhidə - tək Allahlığa uyğun gələcəkdir. 

Bildiyimiz kimi, Tovhid bütün dinlərin mənbəyi, başlanğıcıdır.  Həmin vaxt ibadətgah olmayıb. Beləliklə, yeni xilaskar – Pangeyist həm millətləri, həmm də dinləri ilkin mənbəyinə, başlanğıcdakı halına gətirəcəkdir ki, bu da insanlar arasında sülhün, əminamanlığın yaranmasına və pozulmuş nizamın bərpa olmasına səbəb olacaqdır...

Nə qədər acı da olsa, etiraf etməliyik ki, bu gün bəşəriyyət arasında yaranan qarşıdurmaların kökündə ilk növbədə dinlər dayanır – deyə, Yaqub müəllim söhbətini davam etdirir:

 -  Dünyaya açıq gözlə baxsaq görərik ki, “Buddizim”,  “Atəşpərəstlik”, “Musəvilik”, “İsavilik” və “İslam” adı altında fəaliyyət göstərən mafiyalar   dünya sərvətləri,  nüfuz dairəsi  uğrunda necə qanlı savaş aparırlar. 

 Bu savaşda qazanan yuxarıda sadaladığım din mafiyaları, onların başında duran mafiozlar; itirən isə, onları din bilib, ardıyca gedən sadə insanlardır. 

Bu mafiyalar insanları öz ardıyca aparmaq, özlərinə tabe etdirmək üçün ibadətgahlar - kilsələr, sinaqoqlar, məscidlər... düzəldir və ora “Allah evi” adı verirlər. Halbuki, Allah hər yerdə, özəlliklə də insanın qəlbindədir.

Bu ibadətgahlarda əsas təbliğat onun üzərində qurulur ki, başqa dinlərə, yaxud, təriqətlərə mənsub olan insanlar sizin düşməninizdir və mütləq onları qətlə yetirib, sərvətlərini və yurdlarını əllərindən almalısınız. 

Onlar əsasən, savadsız, elmsiz, işsiz-gücsüz insanları öz təsiri altına salaraq, onlara maaş vəd verməklə, müharibələrə cəlb edirlər. Nəticədə, həmin müharibədə iştirak edən tərəflərə həm silahlarını satırlar, həm əsir götürdükləri insanları, onların daxili orqanlarını satırlar, həm də qarətçilikdən küllü miqdarda sərvət qazanırlar.

 Bir çox hallarda müharibədə iştirak edən əsgərlərin maaşlarını və sığortalarını da vermirlər. Əsgərlər ölüncə döyüşür, ömürlərini mafiyaların yolunda qurban verirlər. 

Bütün bunların qarşısını almaq, insanları din mafiyalarının əsarətindən qurtarmaq üçün, bəşəriyyət pangeyizm ideyası ətrafında birləşəcəkdir. Çalışmaq lazımdır ki, insanlar elmlənsinlər və mafiyaların quraşdırdıqları ibadətgahlardan – dırnaqarası “Allah evləri”ndən uzaq dursunlar.

Professor gələcək üçün proqnoz verməyi də unutmadı:

Yaxın zamanda pangeyizm ideyası bütün dünyaya yayılacaq və bəşəriyyət öz əvvəlki halına -  birlik və sülh halına qayıdacaqdır. 

 

(ardı var)