Fiziki fəaliyyət stressi aradan qaldıran təbii vasitədir. Stressin səbəb olduğu əsas problemlərdən biri də diqqətin yayğınlığı  nədəsə fokuslanmaqda çətinlik çəkməkdir. Həmçinin, stress yuxu pozuntularına da səbəb olur ki, bundan  dolayı  gün ərzində insan  daha tez yorulur. 

Bəzən, stress üzündən insan təmkin, dözüm imkanlarını itirir ki, bu da onda sonradan ruhi düşkünlük yaradır.  

Bunun çox sadə xilas yolu var - fiziki fəaliyyət! O, stressi azaltmağa köməkçi olur. Bu vəziyyət də zehni və fiziki sağlamlığa müsbət yöndə təsir edir. 

Xüsusən də məktəbyaşlı uşaqlar məhz yaşadıqları stress səbəbindən dərslərini yaxşı öyrənə bilmirlər.  Bu səbəbdən, xarici ölkə məktəblərində stressi azaltmaq üçün bu cür uşaqlara xüsusi fiziki məşğuliyyət növünə alışdırırlar. 

İdmanın hər hansı növü, yaxud gimnastika, yüngül altetika ilə məşğul olan yeniyetmə sonradan zehni əməyə daha çox adaptasiya olur. 

ABŞ alimlərinin uzunmüddətli sınaqlarının nəticəsi zamanı məlum olub ki, fiziki hərəkətlər zamanı,   beyinin mövcud əlaqələrini nizamlama və yeni əlaqələr qurma bacarığı güclənir. 

 Bu bacarıq beynimizin daha “axıcı” olmasına və daha stabil reaksiya qabiliyyətinə imkan verir. 

İnsan beyini nə qədər çox və güclü neyron əlaqələrinə sahib olarsa, öyrənmə və aldığı məlumatları qoruyub  saxlamaq bacarıqlarını bir o qədər də artırar.  

Burada söhbət hansı fiziki fəaliyyət növlərindən gedir? Onların bir qismini qeyd edək: səhər gimnastikası,isinmə və gərilmə hərəkətləri, birbaşa ürək döyüntülərinin ahəngdarlığına, qan dövranının düzgün hərəkətinə səbəb olan gimnastik hərəkətlər, yüngül qaçış, səhər yürüşü, sürətli idman yerişi, üzgüçülük və s.