Doğrusu, MSK-nın, ölkənin aparıcı məmur və siyasətçlərinin bəyan etdiyinə görə, aprelin 11-də Azərbaycanda keçirilmiş demokratik, şəffaf, dünya standartlarına uyğun Prezident seçkilərinin ertəsi günü, sübh tezdən tanınmış saytlarda rastıma çıxan  bir neçə xəbər şad-xürrəm kefimə soğan doğradı. Xahiş edirəm, siz də belə xəbərlərdən ikisinin məğzi ilə tanış olun, sonra söhbətimizə davam edərik...

“Bakıda fahişəxananı xatırladan gecə klubu fəaliyyət göstərir. Doğrudanmı, bura əyləncə məkanıdır?  Minval.info xəbər verir ki, paytaxtda “Hot room” adlanan əndirabadi gecə klubu fəaliyyət göstərir. Azərbaycanca tərcüməsi “İsti otaq” olan məkanın loqosu da içəridə nələrin baş verdiyindən xəbər verir. Təbii ki, kluba daxil olacaq müştəri düşünülmüş adı və erotik loqonu görüb buna uyğun “tədarük” görür.  Heç kimə sirr deyil ki, həmin loqo dünyada seks simvolu kimi qəbul olunur...

Bununla yanaşı, adı çəkilən məkanın sosial şəbəkədəki səhifəsi erotik şəkillər paylaşaraq buranın reklamını edir. Bu yolla əyləncədən çox, sanki müştərilər intim ləzzət almaq üçün məkana dəvət edilir. Paylaşılan əksər fotolar arasında qızların açıq-saçıq görüntüləri yer alır. Yüngül desək, qadınların budu, sinəsi, ombası vasitəsilə kluba müştərilər cəlb olunur. Məgər, əyləncə yalnız bunlardan ibarətdir, yoxsa belə reklamın arxasında nəsə dayanır?! Maraqlıdır ki, həmin şəkillərin çoxunun altında ilk “ViP Rooms” sözləri yazılıb. Yəni, xüsusi otaqlar... 

Həmçinin qeyd edək ki, klub işçi axtarışını da adətinə uyğun olaraq erotika çağırışdırıcı vakansiya elanı verib... Paylaşılan fotolar arasında yer alan xanımlardan birinin yaşının az görünməsi də diqqətimizi çəkdi. Görəsən, onun yaş həddi həqiqətən icazə verirmi bu məkana daxil olmağa?.. Hətta buraya giriş, qızlar üçün qəlyan, içki pulsuzdur... 

Məşhur reperler də “Hot room”a gələnlər sırasındadır. Yeri gəlmişkən, bu klubun sahibinin reper Roşka olduğu iddia edilir…” 

“Rayondan gələn tələbə qızlara “prezervativ” verib müştəriyə göndərirlər – Masaj salonunda gizli çəkiliş…” adlı digər material  isə Bakıda fəaliyyət göstərən masaj salonlarında baş verən biabırçılıqlara aiddir.

“...“İş elanları arasında yəqin ki, qarşınıza “Masaj salonuna masajçı qız tələb olunur. İş öyrədilir. Təcrübə olmasa da, olar. Yaş həddi 30-a qədər. Yalnız qızlar müraciət etsin. Əmək haqqı 900 AZN. Tələbələr də müraciət edə bilər” məzmunlu elanlar çıxır...” 

Qısaca deyək ki, jurnalist xanımlardan biri paytaxtdakı belə masaj salonlarından birinə daxil olaraq orada “işə düzəlmək” istəyir... 

Və həmin yazıda elə bu cümlələri oxumaq kifayətdir ki, hər şey aydın olsun:

“Müştəriylə xanım içəridə olduğu zaman otağın qapısını açmaq qəti qadağandır və ödəniş əvvəlcədən ödənməlidir. 30 AZN ödəyən müştəriyə 1 saat yarım vaxt verilir. Onun 45 dəqiqəsinə masaj daxildir. Daha sonra müştərinin istəyindən asılı olaraq onunla hamama girməli və istəklərini yerinə yetirməlisən. Yeni işçilərə cinsi münasibətin olmadığını desələr də, gələn müştərilərdən birinin dostuna verdiyi qoruyucudan bunun heç də belə olmadığı məlum oldu...” 

Hər iki xəbərin mahiyyətini anladınız. İndi, xahiş edirəm, bir neçə suala cavab axtaraq. 

Belə gecə klubu, masaj salonları olan şəhər hansı dinə mənsub ölkənin paytaxtıdır?  Azərbaycan müsəlman ölkəsidirsə, Bakı İslam şəhəridirsə və biz müsəlmanıqsa, türküksə, niyə belə əməllərə, biabırçılıqlara göz yumuruq? Nədən hüquq-mühafizə və xüsusi xidmət orqanları birbaşa Azərbaycan xalqının nəinki milli-mənəvi dəyərlərinə, soykökünün, genefondunun məhvinə yönəlmiş bu cür biabırçı obyektlər haqda tədbir görmür? Yoxsa pul qazanmaq, xüsusən gecə klubları olmadan həyatlarını təsəvvür edə bilməyən xarici qonaqların, turistlərin dollarları hər şeydən önəmlidir? Bəlkə şəhərin ortasında  gecə klubu, masajxana adıyla faktiki fahişəxanalar açılmasını müasirlik, inkişaf sanırıq?..

Düzdü, artıq bizim “ziyalı” adlanan bəzi siyasətçi, pedaqoq, professorlarımız və s. də “müasir”ləşib, avropalaşıb. Onların oğulları, qızları Bakıda da, Londonda da, Parisdə də bu müsəlman(!) xalqa gözəl “nümunə”lər göstərirlər və “sübut” edirlər ki, gecə klubuna getmək hər bir vətəndaşın “müasirliyinə”, “sivilliyinə”, “azad düşüncə” sahibi olmasına dəlalət edir, əxlaq, mənəviyyat, abır-həya isə gerilik, nadanlıq ələmətləri olan lazımsız anlayışlardır... 

Bir neçə il öncə müsəlmanlığa dəxli olmayan  8 Mart bayramı gecəsi belə məşhur “ziyalı”lardan birinin ərindən boşanmış qızının  saat 4-5 radələrində gecə klubunda hansı hoqqalar törətdiyini, oradan sərxoş şəkildə çıxdıqdan sonra öz məşuqu tərəfindən necə təhqiramiz şəkildə döyüldüyünü yəqin yaxşı xatırlayarsız... “Hörmətli” ata(?) isə qızının bu hərəkətlərinə “sivil” tərzdə övladının müstəqil düşüncəli, sərbəst olduğunu vurğulamaqla  bəraət qazandırmışdı. Bərəkallah!..

Fəqət, bu xalq, Azərbaycan, müsəlman dünyası yalnız “fahişə biznesi” quran belə “sivil” “ziyalı”lardan, siyasətçilərdən ibarət deyil... Və öncəki, yazılarda dediyimiz kimi, Prezident, deputat seçməkdən öncə doğru yolu, Allah yolunu seçməliyik ki, gerçəkdən seçdiklərimizə, bu xalqa xidmət etmək istəyənlərə dəstək olaq...

Hər bir olaya, xəbərə rast gələndə də seçim qarşısında qalırsan. Yəni, həmin olay və xəbərdəki şəri, yoxsa xeyri dəstəklədiyini özün üçün müəyyən etməlisən. Konkret bəhs etdiyimiz xəbər və faktlarla bağlı da referendumsayağı seçim sualları ortaya çıxır:

1.Azərbaycanın paytaxtında və digər şəhər və rayon mərkəzlərində əxlaqsızlıqlar, şərabxorluqlar baş alıb gedən gecə klublarının, barlarının olması zəruridirmi?

2.Kim; özünü azərbaycanlı, müsəlman hesab edən hansı  ata, ana, qardaş və s. öz ana, bacı, qız və xanımlarının(eləcə də oğlanlarının, ərlərinin, atalarının və s.) gecə klublarına gedib əylənməsinə, yaxud belə məkanlarda, o cümlədən masaj salonlarında işləyərək pul qazanmasına razıdır?.. 

Xahiş edirəm, səs verin. Yazını “Feysbuk”da da paylaşacağıq, orada da açıq şəkildə fikirlərinizi yaza bilərsiz. Bəlkə kimsə sübut edəcək ki, biz səhv edirik, gecə barları, əxlqsız masaj salonları bu xalqın, ölkənin müasirliyi və gələcək inkişafının rəhnidir...  

Amma “referendumumuz”dakı  suallara “hə” cavabı verənlərdən xahiş olunur ki, öz danışıq və  təntənəli nitqlərində “Azərbaycan”,  “müsəlmanlıq”, “türklük”, “xalq”, “vətən”, “mənəviyyat”, “əxlaq”, “qeyrət”, “namus”, “milli-mənəvi dəyərlər” və s. məhfumlarını işlətməsinlər...