İsrailin bəzi mətbuat orqanlarında Azərbaycan əleyhinə,  xüsusilə iki ölkənin hərbi əməkdaşlığını hədəfə alan məqalələrin dərc olunması, ABŞ-da fəaliyyət göstərən erməni lobbisinin fəaliyyətinin nəticəsidir. Təl-Əvivlə Bakı arasında siyasi-hərbi əlaqələr iki ölkə arasında münasibətlərin yüksək səviyyədə olduğunun göstəricisidir. Həmçinin, bu əməkdaşlıq iki ölkə arasında ticari-iqtisadi inkişafa söykənir. 

Qeyd edim ki, İsrail ölkəmizi müasir hərbi texnikalarla təchiz edir və birgə istehsalında köməyini əsirgəmir. Aprel hərbi eskalasiyasında, məhz İsrail istehsallı kamikadze dronların və digər silahların tətbiqi nəticəsində ermənilər ciddi itkilər verərək, panikaya düşmüşdülər. Hazırda Ermənistan siyasi-hərbi rəhbərliyi və xaricdə "erməni lobbisi" çalışır ki, Bakı və Təl-Əviv əlaqələrinə kölgə salsın və İsrailin silah ticarətində Azərbaycanla əlaqlərinə zərbə vurulsun. Xüsusi olaraq, bu istiqamətdə ABŞ-da "erməni lobbisi" burada "Yəhudi lobbisi" ilə mümkün danışıqlara getmək üçün əlaqələri işə salıb. Maksimum çalışılır ki, Yəhudi dövləti ilə Azərbaycan arasında konforantasiya yaşansın.

Ermənistan siyasi-hərbi rəhbərliyi ABŞ-ın diqqətini çəkmək üçün Gürcüstanda NATO-nun tədbirlərinə qatıldı. Qeyd edim ki, Ermənistanın "Layiqli tərəfdaş-2017" kod adlı NATO təlimlərində iştirakı,  bir başa okeanın otayından "lobbinin" göstərşidir. Ermənistan həm Kremldən, həmçinin ABŞ-da "lobbi" tərəfindən idarə olunur. Ermənistanın bu reveransları təbii ki, regionda ABŞ-ın ciddi dəstəyini almağa hesablanıb. ABŞ-la Rusiya arasında yaşanan siyasi savaşda,  Rusiyanın strateji müttəfiqi olan Ermənistanın manevrləri, ABŞ-ın mümkün təzyiqlərindən qorunmaq və Qərblə dialoq və tərəfdaşlıq görüntüsü yaratmaqdır. 

Ermənistanı narahat edən İsrail-Azərbaycan hərbi əməkdaşlığına qarşı  aparılan kompaniya çox cididdir. Ermənistan və "lobbi" tandemi sona qədər bu istiqamətdə çalışacaqlar ki, iki ölkə arasında vəziyyət böhranlaşsın. Azərbaycan rəsmiləri çalışmalıdır ki, İsraillə əlaqələr yüksək səviyyədə saxlanılsın, hərbi əməkdaşlıq yüksək səviyyədə təşkil olunsun. Həmçinin İsraildə Azərbaycanın səfirliyi açılmaqla, süni problemləri yerində həll etsin. İsrail Azərbaycanın strateji-təhlükəsizlik tərəfdaşıdı. Bu ölkə ilə yüksək əlaqələr labüddür.