Bizim hər gün istifadə etdiyimiz Facebook sosial şəbəkəsi və digər sosial media həm də böyük maarifləndirmə işi aparan bir sahədir. Burada oxuduqlarımızı və gördüklərimizi gündəlik fəaliyyətimizdə geniş istifadə edirik. 

Mən o fikirlə də razıyam ki, içi özüm də olmaqla bəzən həm yazdığımız statuslarda, həm də şərhlərdə bəzən gözlə görünən, bəzən isə hiss olunmayan qrammatik səhvlərlə yanaşı məna səhvlərinə də rast gəlmək mümkündür. İndi isə keçirəm sözümün canına. 

Bildiyiniz kimi, iki gündən sonra Azərbaycan Respublikası Silahlı Qüvvələri Günü təntənəli şəkildə qeyd olunacaq. Və hər belə önəmli hərbi və milli bayramlarımız zamanı Müdafiə Nazirliyinin rəhbərliyi tabeçiliyində olan şəxsi heyəti müxtəlif həvəsləndirmə formasında təbrik və təltif edir.

Amma, son illər, şəxsən Müdafiə Nazirliyinin Mətbuat Xidmətinin özündən icad etdiyi və bir növ bəzi mətbu orqanlara da yaydığı bir "xəstəlik" barəsində sizlərlə fikirlərimi bölüşmək istəyirəm.

Əvvala, müdafiə naziri cənab general-polkovnik Zakir Həsənova təşəkkür düşür ki, o son vaxtlar belə mühüm bayramlar ərəfəsində Silahlı Qüvvələrin xidmətdə fərqlənən zabitlərinə növbəti hərbi rütbələri verir. Amma, mənə və uzun illər mətbuatda çalışan, xüsusən də hərbi sahədən yazan jurnalistlərə aydın deyil ki, nədən yüksək hərbi rütbəyə layiq görülmüş zabitlərə onların halal polkovnik, yaxud mayor, kapitan rütbələri dırnaqarasında yazılaraq mətbuata ötürülür? Vallah, bu yaşıma çatmışam, mənə şəxsən bu yanaşma əsla nə aydın deyil, nə də anlaşılan deyil. Axı, dünyanın heç yerində zabitin layiq görüldüyü hərbi rütbə və ya daşıdığı rütbə, misal üçün "polkovnik" kimi bu əcaib formada verilmir və göstərilmir? Deyirəm, mənim kimi keçmiş SSRİ-nin və ümumilikdə Varşava Müqaviləsi üçün yeganə hərbi-siyasi jurnalist zabit kadrları hazırlayan Lvov Ali Hərbi Siyasi Məktəbinin Hərbi Siyasi Jurnalistika fakültəsində, o fakültənin ilk azərbaycanlı diplomlu zabit kadrı kimi 4 il müddətində, sonrakı illərdə heç vaxt belə əndrabadi təqdimat üsulu öyrətməmişdilər. Ümumiyyətlə, belə yanaşma, adətən qondarma və ya özünü fırıldaqçı, əldəqayırma zabit kimi təqdim etməyə çalışan adamları təqdim edərkən mətbuatda məhz o şəkildə təqdim edilirdi. İndi mən əsla cənab nazirin bu günə qədər yüzlərlə əsl zabitlərə polkovnik yüksək rütbəsini bu cür dırnaqarası verilməklə təqdim edilməsini qəbul etməmişəm və etmirəm. (Kadrlar İdarəsinin daxili sənədlərində punktlar üzrə bu cür göstərilə bilər, amma mətbuatda bu cür təqdimat əslində bir qədər kobud və cəmiyyətdə heç də doğru yanaşmanın formalaşmasına xidmət edən addımdır).

Azərbaycan Mətbuatında olan dostlardan və peşəkarlardan da acizanə xahişim budur ki, bundan sonra da heç vaxt öz Silahlı Qüvvələrinin general rütbəsinin bir addımlığında olan yüksək POLKOVNİK rütbəsini hansısa başqa formada təqdim etməsinlər. Bu günün polkovniki, sabahın ləyaqətli Paşası-Generalıdır. Açıq mətbuatda bu cür təqdimat, əslində "qaş düzəldən yerdə, vurub gözü çüxartmağa" bənzər bir yanaşmadır, dostlar.

Müdafiə nazirinin müvafiq əmri ilə yüksək polkovnik hərbi rütbələrinə layiq görülmüş bütün tanıdığım və tanımadığım əsl peşəkar zabit dostları həm layiq görüldükləri rütbə və Silahlı Qüvvələr günü münasibətiylə ürəkdən təbrik edirəm!

Yaşasın Azərbaycan Silahlı Qüvvələrinin bütün şəxsi heyəti!

Tanrı Sizi və Azərbaycanımızı qorusun!