Moderator.az Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyevin parlamentin bu günki iclasında "Hərbi vəziyyət haqqında" Qanun layihəsinin müzakirəsindəki çıxışını sinxron oxuculara təqdim edir:

"Hörmətli Ziyafət müəllim, təşəkkür edirəm. Doğrudan da qanun layihəsini ikinci oxunuşda kifayət qədər qısa və ətraflı şəkildə təqdim etdiniz. Mənim də təklifimə diqqətlə yanaşmısınız. Qanunu təqdim edən subyektlə müzakirə aparmısınız. Amma mən yenə də öz fikrimdə qalıram. Normativ hüquqi aktlar haqqında konstitusiya qanunun 85 - ci maddəsi mənim qarşımdadır. Burada da qeyd olunur ki, qanunlar, fərmanlar və Azərbaycan Respublikası Nazirlər Kabinetinin qərarları həmin aktlarda qüvvəyə minmənin daha gec müddəti nəzərdə tutulmadıqda onların rəsmi dərc edildiyi gündən qüvvəyə minir. Dərc olunma da o deməkdir ki, bunu bir gün ərzində də dərc etmək olar, yəni vacib deyil ki, fərman bu gün verilibsə, göndərilsin sabahkı qəzetlərdə dərc olunsun. 

Mən niyə bir daha bu məsələnin üzərinə qayıdıram? Mən keçən dəfə də söylədim. Dünyanın super dövlətlərinin, nüvə silahına malik dövlətlərin bəzilərinin hərbi doktrinalarında nüvə silahını belə önləyici addım kimi atmaq səlahiyyəti nəzərdə tutulub. Bu barədə həmin ölkələrin müvafiq qanunvericilik sənədlərində bunun tətbiq edilməsi şərtləri və qaydaları da nəzərdə tutulub. Amma indi gəlin görək bizdə necədir. Keçən dəfə də söylədimn. Bizim şimal və ya cənub sərhədlərimizdən texnika ilə 2-3 saata paytaxtadək gəlmək mümkündür. Konstitusiyanın 111-ci maddəsində qeyd olunub ki, Azərbaycan Respublikasına qarşı real hücum təhlükəsi yarandıqda biz hərbi vəziyyət elan edə bilərik. İndi tutaq ki, real hücum baş verib. Prezident də ölkənin müdafiəsini təşkil etmək, Azərbaycan xalqını qorumaq üçün silahlı qüvvələrdən istifadə etməlidir. İndi o 24 saat ərzində fərmanı Milli Məclisə göndərir, 48 saat ərzində də buna Milli Məclis baxmalıdır. Hesab edirəm ki, bu yanaşma doğru deyil. Çünki ölkəmizin ərazisi çox kiçikdir və ona görə də Ali Baş Komandanın elə bir səlahiyyəti olmalıdır ki, bu fərman imzalandığı andan qüvvəyə minsin, Milli Məclis təsdiq etmədikdə isə həmin fərman qüvvədən düşmüş sayılır. Ona görə də mən keçən dəfə təklif etmişdim ki, fərmandan dərhal sonra Ali Baş Komandanın silahlı qüvvələrdən istifadə etmək imkanı olsun. Hətta mən qardaş ölkədə ötən ilin 15 iyulunda baş vermiş hərbi çevriliş cəhdini də misal çəkdim ki, Türkiyə Böyük Millət Məclisinin həmin gecə toplanmaq imkanı olmadı, çünki həmin binaya da F-16 ilə hücum edildi. Ona görə də tutaq ki, ölkədə silahlı qiyam baş verərsə, yaxud real silahlı hücum təhlükəsi yaranarsa, o halda prezidentin Ali Baş Komandan kimi silahlı qüvvələrin bu və ya digər hərbi birləşmələrindən dərhal istifadə etmək səlahiyyəti olmalıdır. Konstitusiya da bunu qadağan etmir. Konstitusiyanın 111-ci maddəsini oxuyuram. Həmin maddədə qeyd olunur ki, prezident hərbi vəziyyət elan edir və bu barədə qəbul etdiyi fərmanı 24 saat müddətində Milli Məclisin təsdiqinə verir. Milli Məclis də təsdiq etmirsə, deməli, qüvvədən düşmüş sayılır. Ona görə də mən hesab edirəm ki, prezidentin dərhal silahlı qüvvələrdən istifadə etmək səlahiyyəti olmalıdır. İndi msual olunur, bəlkə elə tutaq ki, qiyam qaldırmış silahlı birləşmənin bir hissəsi 24 saat ərzində gəlib Milli Məclisi də, Prezident Aparatını da tutacaq. Biz də prezidentə bu qiyamı yatırmaq üçün səlahiyyət verməyəcəyiksə, onda belə çılxır ki, Ali Baş Komandan silahlı qüvvələrin digər strukturlarından istifadə edə bilməyəcək. Həm qardaş Türkiyədə baş verən dövlət çevriliş cəhdi, həm də ölkə ərazisinin kiçik olması bunu göstərir. Bir daha vurğulayıram ki, hətta böyük dövlətlərin özü nüvə silahını belə, parlamentlərinin icazəsi olmadan tətbiq edə bilirsə, biz də Ali Baş Komandana belə təhlükə yaranan zaman silahlı qüvvələrdən dərhal istifadə etmək səlahiyyəti vermiriksə, bu düzgün deyil və mənim qənaətimcə konstitusiyamız da bunu qadağan etmir. Hesab edirəm ki, bu, xalqımızın, dövlətimizin təhlükəsiziliyi ilə bağlı məsələ olduğu üçün mən bir daha bunun üzərinə qayıtmalı oldum”.