Bu gün rus qoşunlarının Azərbaycandan çıxarılmasından 23 il ötür. SSRİ dağılandan sonra 1993-cü ilin 25 mayında Azərbaycanda ilk olaraq rus qoşunu ölkə ərazisindən çıxarıldı. 

Bu günlərdə Klassik Xalq Cəbhəsi Partiyasının (KXCP) sədri Mirmahmud Mirəlioğlu mətbuata açıqlamasında 25 may tarixinin dövlət səviyyəsində və bayram kimi qeyd edilməsini təklif etmişdi. Bildirmişdi ki, Azərbaycan hakimiyyəti 25 may tarixini bayram kimi qeyd etsə, Qarabağda qələbə qazanılmasının ilk addımı olar.

 

Moderator.az KXCP sədrinin bu təklifi ilə bağlı politoloq Cümşüd Nuriyevin fikirlərini öyrənib. 

C.Nuriyev 25 may tarixinin bayram kimi qeyd edilməsinin nəyisə müsbətə doğru dəyişəcəyinə inanmadığını deyib: “Azərbaycanda Əmək Məcəlləsinə görə bayramların sayı normadan da çoxdur. Normalda bayramların sayı 9-10 olmalıdır, ancaq bizdə 15 bayram var. Belə ola bilər ki, 1 May kimi iş günü olmaqla qeyd edilsin. Bu formada gündəmə gətirmək olar. May ayının sonunda həm də 28 May bayramını qeyd edirik. Ardıcılıq olaraq qeyd edilməsi mənə elə gəlir ki, uğurlu alınmayacaq. 

Düzdür, 1993-cü ildə rus ordusu ölkədən çıxarıldı. Bu hadisə Xalq Cəbhəsi hakimiyyətdə olarkən baş vermiş yeganə müsbət addımdır. İndi onu da gündəmə gətirilər və bu da başa düşüləndir. Amma bunun ayrıca bayram günü kimi qeyd edilməsi uğurlu deyil. Bu, ancaq ucuz siyasi gediş olacaq. İnanmıram ki, bu tarixin bayram kimi qeyd olunması ürəkdən nəyisə dəyişə”. 

Politoloq daha sonra qeyd edib ki, Qarabağ işğalda olduğu müddətcə bizim belə tarixləri bayram günü kimi qeyd etməyimiz doğru deyil: “Belə götürəndə, rus ordusu yenə də bizim ərazimizdədir. Qarabağ kimin əlindədir ki, Qarabağda rus ordusu var da. İndi artıq Qarabağda rus sülhməramlılarının yerləşdirilməsi məsələsi gündəmə gəlib. Rus ordusu güya bu dəfə sülh bayrağı ilə ərazimizə gələcək. 25 may tarixini o vaxt bayram edə bilərdik ki, Azərbaycan əraziləri tamamilə azad olunmuş şəkildə olaydı. Nə qədər ki, bu, belə deyil, nə qədər ki, Qarabağ bizim deyil, heç 9 Mayı da bayram kimi qeyd etməməliyik”.