İqtisadçı ekspert, sabiq millət vəkili Nazim Məmmədov yeni qanunla bağlı fikirlərini Moderator.az-la bölüşüb. 

Ekspert bildirib ki, indiyə qədər hansısa məmurun adının korrupsiya faktında hallandırılmasına baxmayaraq, ciddi cəza tətbiqi faktı baş veməyib: 

“Əslində Cinayət Məcəlləsində korrupsiya hüquqpozmaları, həmçinin mənimsəmə ilə bağlı cəzaların sərtləşdirilməsinə dair qərarların effektivliyinə çox az adam inanır. Çünki, təcrübə onu göstərir ki, jurnalist araşdırmalarının nəticəsində onlarla, yüzlərlə məmurlar haqqında ciddi faktlar olmasına baxmayaraq, hər hansı bir məmurun rüşvətə, korrupsiyaya görə ciddi cəzalandırmanın şahidi olmamışıq. Korrupsiya hüquqpozmaları haqqında prokurorluq orqanlarının məlumatlarında adətən çox aşağı səviyyədə bələdiyyə sədrlərinin, məktəb direktoru və ya hansısa vtek müdirinin tutulmasını eşidirik. Ancaq aldığı rəsmi maaşlarının 100 min misli qədər vəsaiti bir tender vasitəsi ilə öz yaxın qohumlarının, ailə üzvlərinin adına açdıqları şirkətlər vasitəsi ilə mənimsəyən yüksək çinli məmurlar yenə də iş başındadır”. 

N.Məmmədov vurğulayıb ki, korrupsiya və rüşvətlə kompleks mübarizə aparılmalı, bu neqativləri yaradan əsl səbəblər aradan qaldırılmalıdır: “Bu məqsədlə məmurların gəlir və əmlak deklarasiyalarının tətbiqinə təxirə salınmadan başlanılmalı, dövlət işinə qəbulla bağlı tam şəffaflıq olmalı, nazirlər də başda olmaqla əsas vəzifələrə iki dəfədən artıq təyinatların olmasına məhdudiyyət tətbiq olunmalı, öz tabeçiliyində yaxın qohumların işləməsinə qadağa qoyulmalıdır. Məmurların maaşı ciddi artırılmalı, ancaq buna qədər Nazirlər Kabinetinin strukturu optimallaşdırılmalı, ciddi ixtisarlar aparılmalıdır. İdarəetmə və kadr islahatları aparılmalı, bu sahədə də rəqabətli mühit yaradılmalıdır. İctimai nəzarət stimullaşdırılmalıdır”.

Sabiq millət vəkili “Təəssüf ki, Azərbaycanda ən rahat iş rüşvət verib almaqdır” - deyə qeyd edib: 

“Və bu xəstəlik cəmiyyətin əksəriyyətini "zəhərləyib", ancaq bu zəhəri özümüzdə güc tapıb təmizləməliyik, təmizləməsək gələcəyimiz çox dumanlı olacaq. Təcrübə onu göstərir ki, 100 milyonlarla dövlət vəsaitini mənimsəmiş adam çox rahat 2-3 il gedib komfortla həbs çəkir, sonra rüşvət və ya tapşırıq müqabilində vaxtından əvvəl azadlığa çıxır, ya da əvh olunmağa yol tapır, müxtəlif maliyyə sxemləri ilə xaricə çıxardığı vəsaitləri rahatca idarə etməyə imkan tapır. Elə mexanizm hazırlanmalıdır, elə cəzalar olmalıdır ki, büdcədən oğurlamaq mümkünsüz olsun, bütün bunlar üçün müstəqil məhkəmələr, ictimai qınaq olmalıdır, cəmiyyət rüşvəti lənətləməlidir. Nə vaxta qədər ki, pulla qohumluqla, rüşvətlə yüksək mövqeyə sahib olanlar savadlı qabiliyyətli adamların əvəzinə seçkili orqanlara (məsələn Milli Məclisə) düşməyə nail olacaqlar o vaxta qədər də bu belə davam edəcək”. 

Qeyd edək ki, yeni əlavəyə əsasən, dövlət büdcəsinin, məqsədli büdcə fondlarının və ya büdcədənkənar dövlət fondlarının vəsaitindən təyinatı üzrə istifadə etməmə, bu əməllər xeyli miqdarda törədildikdə səkkiz min manatdan on min manatadək miqdarda cərimə edilməklə üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum etmə, yaxud üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə üç ilədək müddətə azadlıqdan məhrum etmə ilə cəzalandırılacaq.

Eyni əməllər külli miqdarda törədildikdə üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə üç ildən altı ilədək müddətə azadlıqdan məhrum etmə ilə cəzalandırılır.

Bu Məcəllənin 308-1.1-ci maddəsində “xeyli miqdar” dedikdə əlli min manatdan iki yüz əlli min manatadək olan məbləğ, 308-1.2-ci maddəsində “külli miqdar” dedikdə isə iki yüz əlli min manatdan yuxarı olan məbləğ başa düşülür.

Rumiyyə