18 oktyabr... Xalqımızın, Millətimizin, Dövlətimizin tarixində ən əlamətdar iki-üç gündən biri... Artıq keçmiş kommunistlərdən (onların da işərisində istiqlal, vətənsevərlər vardı, amma Milli-azadlıq hərəkatından, Xalqın qəzəbindən qorxub yalançı istiqlal, vətənsevər olanları da az deyildi) və demokratlardan-bəziləri təəssüf ki, sonradan antidemokrat oldu - (qismən də bitərəflərdən) ibarət parlamentin- sabiq Ali Sovetin Müstəqillik haqqında Konstitusiya Aktını qəbul etdiyi tarixi GÜN...20-ci əsrdə Azərbaycanı ikinci dəfə müstəqilliyyə, azadlığa qovuşduran tarixi AN...Düzdür, Azərbaycanın ikinci dəfə müstəqilliyi 1991-ci ilin 30 avqust tarixində parlamentin Müstəqillik haqqında Bəyannaməsi ilə bəyan olunmuşdu, amma cəmi bir ay yarım sonra müstəqilliyimiz ən ali sənədlə-Konstitusiya Aktı ilə bir daha rəsmiləşdirildi...28 maydan və 15 sentyabrdan (Bakının erməni işğalından azad olunmasından) sonra Millətimizin, Dövlətimizin tarixində, qəlbində daim yaşayacaq və qızıl hərflərlə yazılan bir GÜN...Həmin günü indiki kimi xatırlayıram... Keçmiş Ali Sovetdəki fədakar demokratların-"Demblok"çuların (sonradan bəziləri çox ciddi siyasi xətalara və yanlışlıqlara yol verdilər)-məlum "43-lər"-in əzmkarlığı, bütövlükdə Millətimizin mübarizliyi, azadlıqsevərliyi sayəsində tarixə həkk olunan bir TARİX-GÜN...Həmin vaxt Məhəmməd Əmin Rəsulzadə adına BDU-nun jurnalistika fakultəsinin tələbəsiydim, özü də indiki bir sıra yalançı və qeyri-səmimi dil pəhləvanlarından, "azadlıq aşiqləri"ndən fərqli olaraq siyasi-ictimai proseslərdə, tələbə hərəkatında çox aktiv- təmənnasız, səmimi fəaliyyət göstərirdim...Böyük əksəriyyət kimi...Həmin gün milyonlar kimi mənim də ömrümə yazılan ən gözəl GÜNlərdən biridir...İstər Bəyannamə, istər Konstitusiya Aktı qəbul olunan gün bir Allah şahiddir ki, necə həyəcanlı, sevincli, qürurlu idim...

Yeri gəlmişkən, çox qəribədir (sanki ürəyimə damıbmış kimi) ki, Azərbaycan müstəqillik əldə etməmişdən, qazanmamışdan bir az öncə böyük qələm əhlimiz, istiqlalçı şairimiz-Millətimizin Vəkili Sabir Rüstəmxanlının rəhbərlik etdiyi "Azərbaycan" qəzetində məhz müstəqillik, azadlıqla bağlı yazım dərc olunmuşdu( gec də olsa, Sabir bəyə--Sabir Rüstemxanliya öz dərin minnətdarlığımı və ehtiramımı bildirirəm)...Həmin məqaləni yazıb kəndimizdən poçtla "Azərbaycan" qəzetinə yollamışdım və orada dərc olunacağına da çox ümidli deyildim, daha doğrusu, yazının ucqar-uzaq bir kənddən paytaxta-qəzet redaksiyasına yetişəcəyinə ümidim az idi...Həmin yazımın-məqaləmin (cəmi 18 yaşım vardı) "Azərbaycan" kimi məşhur, oxunaqlı, istiqlalçı bir qəzetdə dərç olunduğunu eşidəndə də gözlərimə və qulaqlarıma inanmamışdım...Az qalırdım ki, qanad açıb uçam...Bu, o, dövrdə 18 yaşlı kənd uşağı üçün çox böyük və əlamətdar bir hadisə idi...Sözlə izahı belə mümkün deyil...

Yenidən 18 oktyabr 1991-ci il tarixinə-həmin gün yaşananlara dönərək qeyd etmək istəyirəm ki, Ali Sovetin iclasını-sessiyasını AzTV-dən canlı izlədikcə ( həmin gün həm də parlamentin qarşısında keçirilən izdihamlı mitinqdə iştirak etmişdim) sevincimdən, qürurumdan göz yaşlarımı böyük əksəriyyət kimi saxlaya bilmirdim...Sözlə ifadəsi mümkün olmayan ANlar idi...Bunu da ancaq həmin günu, həmin tarixi, həmin anı qəlbən, sidq-ürəkdən yaşayan, yaradan insanlar bilər...Bilməyənlər də heç olmasa, zəhmət çəkib bilənlərdən, haqqı olanlardan soruşsunlar, öyrənsinlər, bilsinlər...İndi çoxları özünü fədakar, mübariz, qorxmaz, döyüşkən, vətən, istiqlalsevər saya, hesab edə bilər və necə də ki, haqları çatmaya-çatmaya edənlər də az deyil... Hətta, həmin TARİXi təftiş edən, aşağılayan nadanlar, haramzadalar, nacinslər də var və az deyillər...Belələri həmişə olub və bundan sonra da olacaqlar... Lakin onları zamanında və məqamında yerlərində oturtmaq, ağızlarının payını son dərəcə ağıllı və düşünülmüş şəkildə vermək gərəkdir ki, bir daha 28 aprel təkrarını, acısını, dəhşətini yaşamayaq...

Odur ki, Uca Millətimizi- 18 oktyabrda əməyi, zəhməti, haqqı olan Şanlı Vətən Övladlarını, Azərbaycan-Türk Sevdalılarını 18 oktyabr Müstəqillik haqqında Konstitusiya Günü-Bayramı münasibəti ilə ürəkdən təbrik edir, əsl istiqlalsevərlərə Bayramınız-Bayramımız mübarək, Müstəqilliyimiz əbədiyaşar olsun, deyirəm. Min kərə Amin!