(Ədalət Partiyasının sədr müavini)

Dünyada baş verən son hadisələr, xüsusilə Rusiya ilə ABŞ və Qərb ölkələri arasında baş verən qarşıdurma dondurulmuş konfliktlərin həllini yenidən gündəmə gətirib. Bu arada Dağlıq Qarabağ münaqişəsi ilə bağlı fəallaşma da müşahidə edilməkdədir. Cəbhə bölgəsində atəşkəsin pozulması ilə başlayan proses danışıqlar masasında aparılan müzakirələrdən sonra “stabilləşdirildi”.

Görünən odur ki, rəqabətdə olan tərəflər: Rusiya ”“ ABŞ və Qərb problemin həllində daha çox aktivlik nümayiş etdirməklə dəyişə biləcək situasiyada təşəbbüsü əldən verməməyə çalışırlar. Rusiya prezidentinin təşəbbüsü ilə Azərbaycan və Ermənistan dövlət başçılarının uzun müddətli fasilənin ardından görüşünün təşkil edilməsindən sonra eyni addımı Qərb ölkələri və ABŞ-da atdı. Müşahidələr göstərir ki, qeyd edilən tərəflərdən hər hansı biri problemin həllində səmimi görsənmir və məsələyə yanaşmada öz maraqlarını daimi olaraq öndə tuturlar. Beynəlxalq hüquq və digər bütün nəzəri və faktolojo nüanslar bizim tərəfimizdə olsa da yenə də ermənilər müdafiə edilməkdədir. Əslində burada onların Ermənistanı müdafiə etməsindən danışmaq yox, Ermənistanın simasında öz maraqlarını təmin etməkdən söhbət getdiyi başa düşülməlidir. Deməli, elə bir situasiya yaranıb ki, hazırda Ermənistanın müdafiə olunması bir-biri ilə qarşıdırma vəziyyətində olan iki tərəf üçün də məqbul sayılır. Deməli, Azərbaycan münaqişənin dinc həlli üçün yalnız bu vəziyyəti dəyişməlidir. Nəinki Ermənistanın iqtisadi çöküşünü, ermənilərin öz ölkələrini tərk etməsi kimi qeyri-real sonluğa ümid etməlidir. Çünki maraqlı tərəflərin lazım olduğu qədər Ermənistanı ayaqda tutacaqları şübhə doğurmur.

Son günlər təşəbbüsü ələ almağa çalışan ABŞ hətta yeni təkliflə də çıxış edir. Belə ki, ATƏT-in Minsk qrupunun amerikalı həmsədri Ceyms Uorlik açıqlamasında Dağlıq Qarabağ münaqişəsinin həllinə dair bildirib ki, danışıqlar prosesində qondarma “Dağlıq Qarabağ Respublikası”nın rəhbərliyinin mövqeyinin eşidilməsi vacibdir. O deyib ki, “biz Dağlıq Qarabağda de-fakto hakimiyyətdə olan rəhbərliyin mövqeyinin eşidilməsinin vacib olduğunu düşünürük və onların fikirlərini öyrənmək məqsədilə tez-tez regiona səfər edir, görüşlər keçiririk”. Amerikalı həmsədrin bu açıqlaması onsuz da mürəkkəbləşən problemi sadələşdirib həll etmək yox, onu daha da çətinləşdirərək öz ölkəsinin maraqlarını diqtə etməsidir. Azərbaycanın ərazisi olan Dağlıq Qarabağda baş qaldıran separatizmə ABŞ-lı həmsədrin bu cür mövqeyini nədənsə biz Ukraynanın Donetsk və Luqansk əyalətlərinə olan münasibətdə görmürük. ABŞ öz müttəfiqləri ilə Ukraynadakı separatçıları məhv etmək üçün bu ölkəyə hər cür yardım ”“ siyasi, iqtisadi, maliyyə, psixoloji və s.  göstərir. Bu cür ikili yanaşma ABŞ-ın dünyada üzərinə götürdüyü sülh, təhlükəsizlik, demokratiya və insan haqqlarının qorunması kimi müqəddəs missiyasının üzərinə kölgə salır. Ona qarşı hörmət və inamı sarsıdır.

Hətta Amerikalı həmsədr “Dağlıq Qarabağ”ın üzdəniraq “rəhbərliyinin” mövqeyindən danışanda Azərbaycan icmasının da fikirlərinin öyrənilməli olduğunu yada salmayıb. Həmsədrin bu açıqlaması, əvvəla,  açıqca Azərbaycana qarşı təhdiddir. İkincisi, ABŞ və müttəfiqlərinin problemi həll etmək əzmində olmadıqlarını, fürsətdən istifadə edərək regionda möhkəmlənmək niyyətlərini ortaya qoyur.

Bütün bunları nəzərə alaraq, Azərbaycan Prezidenti İlham Əliyev Ermənistan dövlət başçısı Sarkisyanla planlaşdırılan görüşündən imtina etməlidir. 20 ildən bəri keçirilən görüşlərdə bir addım da olsa irəliləyişin əldə olunmaması Prezident Əliyevə kifayət qədər əsas verir. Bununla da Azərbaycan Prezidenti Dağlıq Qarabağ üzərindən oynanılan oyunlara həm son qoymuş olar, həm də indiyə qədər elan etdiyi birmənalı və kəskin mövqeyini nümayiş etdirər.