Məhşurluq heç də hər zaman insan övladının dadına çatmırmış. İllah da həmin insan dildən pərgar olmaya və doğrunu demək lazım olanda sussa da yalanı beçə balı kimi yedizdirməyə cəhd edən xarakterdə ola. Onda da günlərin bir günü dil dolaşıb elə yerdə sahibini bada verir ki, gəl görəsən. Lap Siyavuş Novruzov kimi...

Amma inanın ki, ötən həftənin lətifəsinə çevrilmiş “kotlet” olayını təzədən gündəmə daşımaq niyyətim yox. Üstəlik, həmkarlarımdan və çoxminli FB istifadəçilərindən fərqli olaraq bu məsələ barədə bircə cümlə belə yazmağa lüzum görmədim, halbuki bəzi ağzıgöyçəklər  “onu NİDA-çıların ahı tutdu” kimi şivənləriylə az qala Siyavuşun Allahın qəzəbinə gəldiyini vurğulamğa çalışırdılar. Amma cəmisi iki iclas öncə, yəni hökumətin parlamentdəki hesabatı zamanı həmin Siyavuş Novruzov heç kimin gözləmədiyi bir tənqdi fikir səsləndirmişdi ki, biz hər dəfə qeyri-neft sektorunun inkişafından ağızdolusu danışırıq, amma ay Artur müəllim, corabdan tutmuş maykayadək hər şeyi xaricdən alırıq, biz necə deyə bilərik ki, qeyri-neft sektorunu inkişaf etdirmişik?

Bəli, kokteyllə kotleti dəyişik salan da Siyavuş Novruzov idi, əslində hökumətin millətlə məzələndiyini bircə cümlə ilə sübuta yetirən də. Ancaq bu məmləkətə qeyri-ciddilik elə hakim kəsilib ki, ciddi fikir ya qəbul edilmir, ya bilərəkdən qulaqardına vurulur. Amma birisi bir bayağı fikir bildirsə, bir lətifə danışsa, o saat Azərbaycanın baş mövzusuna çevrilir...

Həzarat! Mənim bu dəfəki yazımın baş qəhrəmanı Siyavuş deyil vallah. Mən başqa bir məhşurun dilinin bəlasına düşməsindən, daha doğrusu, səsləndirdiyi yöndəmsiz müqayisəsiylə özünü əslində külli-aləmdə məsxərə predmetinə çevirməsindən bəhs etmək üçün klaviaturaya döyəcləyirəm...

Təbii ki, qəhrəmanım məhşurluqda YAP siyasi məktəbinin ən uğursuz yetirmələrindən olan Siyavuş Novruzovla müqayisə olunacaq səviyyədə deyil. Amma hər halda onu da YAP siyasi məktəbinin  qiyabi məzunu, yetişməmiş meyvəsi adlandırmaq olar. Onun məhşurluğu kokteyllə kotleti qarışdırmasıyla deyil, bir uğursuz, şorgöz və tamahı Həzrət əlinin qılıncından iti molla kimi arvadla motalı qarışdırmasındadır. Mollanın motal sevgisi barədə oxucular məlumatlı olar, odur ki, “Molla Nəsrəddin”dən sadəcə çayla üzən 6 motalın hamısına sahiblənmək istəyən mollanın özünü çaya atmasını əks etdirən “aşı mollanın, başı bollanın, altısından beşi mollanın, yerdə qaldı biri, onunla da işi var mollanın” lətifəsini yada salmaq  kifayət edər...

Amma mənim qəhrəmanımın da 6 rəqəmindən xoşu gəlir deyəsən. Baxmayaraq ki, 6 rəqəmi “şestyorka” və ya şeytanın sevdiyi rəqəm kimi yaddaşlara həkk olunub. Bununla zavallı qəhrəmanımın şeytanın əsirinə çevrildiyini də iddia etmək olar. Çünki birisi 6 arvad almaq həvəsinə düşə və ya hüquqi savadıyla Siyavuş Novruzovdan geri qalmadığını 6 arvadın diliylə izah eləməyə çalışa, ondan başqa şey gözləyən də elə o səviyyədə olar...

Deyəsən oxucularımı çox intizarda saxladım. Elə isə bundan sonrasını oxuculara çatdırmaqda Gültəkin Hacıbəylinin öz FB səhifəsində paylaşdığı statusu qəhrəmanımın kimliyini sizlərə çatdırmaqda kömək edəcək:

“Bu gün Nərimanov rayon məhkəməsində bir "kişi"-nin aliment məsələsinə baxılırdı. "Kişi" iki dəfə rəsmən evlənib-boşanıb, iki oğlu var, böyüyü 10 yaşındadır, heç birinin necə böyüməsindən xəbəri yoxdur. Keçmiş xanımları ondan aliment istəyir. Qanuna görə bir uşağa görə 25%, iki uşağa görə 33% aliment tutulmalıdır. "Kişi" iddiaya etiraz edir: "Belə çıxır ki, mən altı dəfə evlənib-boşansam və hər nigahdan bir uşağım olsa, bütün maaşımı alimentə verməliyəm?"

P.S. "Kişi" Baş Prokurorun əmri ilə təzəlikcə Xətai rayon prokurorluğuna müstəntiq vəzifəsinə təyin edilib. Şəxsiyyətli kadrdır. Zakir müəllimin əlində-ovcunda qalsın!”

Doğrusu, heç istəməzdim ki, qəhrəmanım  kişi deyil, “kişi” olsun, amma Gültəkin xanımın filoloq olduğundan  o qəhrəmanımın xaraktercə hansı kriteriyalara cavab verdiyini  məndən yaxşı bilməmiş deyil...

Bir ibrətamiz xalq məsəlində deyilir ki, dostunu göstər sənin kim olduğunu deyim. Qəhrəmanım da bu hakimiyyətin yarlığından bir parçaymış. Sistemdəki bütün məmurlar dövlətin, millətin sərvətlərinə motal kimi yanaşaraq onu qamarladıqları kimi zavallı qəhrəmanım da elə zənn edir ki, o Xudayar bəy kimi istəsə nəinki 6, lap 66 qadını da aldadaraq bədbəxt edə bilər. Amma görünür, bunlar motalın qaydalara uyğun saxlanılmayanda çox dəhşətli üfunət iyi verdiyini unudublar. Həmin vaxta isə deyəsən lap az qalıb...