Ali Baş Komandanın Şuşaya səfəri ölkə mediasına da, sosial şəbəkələrə də, bütövlükdə cəmiyyətin ovqatına da öz damğasını vurub. Bu gün və bəlkə də qarşıdakı 1 həftə ərzində yeddidən yetmişə ölkənin gündəmi prezident İlham Əliyevin Şuşa səfəri və səfər boyu səsləndirdiyi fikirlər olacaq. Tamamilə anlaşılandır, biz qədirbilən millətimizlə də, şirin canını Vətən yolunda "uf" demədən əsirgəməmiş cəngavər Vətən oğulları ilə də, bu igidlərin baş komandanı ilə də qürur duymaqda haqlıyıq və ən başlıcası bu möhtəşəm qələbəni bizə yaşadan Aləmlərin Rəbbinə sonsuzadək minnətdarlıq borcumuz var. 

Amma anlaşılmayan bir məsələ var. Bəy dediyin nədir, bəyənmədiyin nə. Bir halda ki, cüzi istisnalarla Ali Baş Komandanı yeddidən yetmişə məmləkətdə hamı dəstəkləyir və o zaman onun siyasətinə "mız" qoymaq yumşaq desək qeyri-səmimilikdir. Sözümün canı var. Mən 20 il öncə jurnalistikaya köşə yazarı kimi gəlib az-çox tanınsam da son illər işlərin çoxluğundan müəllif yazısı yazmaq və vaxtaşırı fikirlərimi oxuculara çatdırmaq imkanından məhrum olmuşam. Sonuncu köşəni nə zaman yazdığımı belə unutmuşam. Amma cəmiyyətdəki ümummilli mızqoyma kampaniyasına qoşulanların çoxluq təşkil etməsi məni bu fikirləri yazmağa vadar etdi. 

Bəri başdan deyim ki, obrazlı desək, əlimə qələm aldığım ilk gündən bu yana müxalifikirli yazarlar cameəsinə aidəm və bir çox həmkarlarım kimi bu hakimiyyəti ikiəlli dəstəkləyərək ona gözüyumulu "ləbbeyk" deyənlərdən olmamışam və deyiləm. Amma ya zəlzələdən-ya vəlvələdən İlham Əliyev bu məmləkətə və onun mənim kimi urəyi 28 il vətənsizlik dərdindən paramparça olan bir Kəlbəcərli yazara (hələ şəhid ailəsinin üzvü olduğumu kənara qoyuram) elə bir ərməğan edib ki, mən artıq nəinki dünyanın səkkizinci möcüzəsinə, hətta nağıllardakı kimi nə zamansa göydən 3 alma göndəriləcəyinə də inanmağa başlamışam. Kimsə inciməsin bu sözlərimdən, bir çoxunuz bəlkə də məndən vətənpərvərsiniz, amma axı siz köçkünlüyün necə bir ağır dərd olduğunu bizlər qədər bilmərsiniz. Ölməz Sücaətin misraları bir milyonluq didərginlər ordusunun miskin halini necə də misilsiz təsvir etmiş:

Çox uzunçuluq etməyəcəm və indi keçirəm mətləbə. Mərkəzi Bankın yeni inzibati binasına ayrılması nəzərdə tutulmuş yarım milyard manat vəsaitə görə neçə gündür Elman Rüstəmovun qabırğasına o qədər döşədilər ki, yetimin dəymişi duran yerdə kalı da töküldü. Təfərrüatlara varmayacam. Ölkənin korrupsiya bataqlığını və məmur özbaşınalığını, büdcə vəsaitlərinin anasının ağladılmasını nə mən inkar edirəm, nə bu ölkənin birinci şəxsi. Sözümün canı odur ki, Elman Rüstəmovun süddən çıxmış ağ qaşıq olduğuna da nə mən inanıram, nə bu sətirləri oxuyacaq kimsə inanar. Amma və lakin...

Mərkəzi Banka yeni inzibati bina tikilməsi layihəsini topa tutanlar, həmin ideyanın müəllifinin kimliyindəın asılı olmayaraq ona xeyir-dua verən şəxsin məhz prezident İlham Əliyev olduğunu nə tez unutdunuz? Bu layihəni eninə-boyuna qamçılayan dostlar, doğrudanmı İlham Əliyevin bizdən az bildiyi və indi hər qəpiyin gərəkli olduğunu sizin qədər bilmədiyi qənaətindəsiniz? Bəli, etiraf edilməlidir ki, bahalı layihədir. Amma o əzəmətli bina ərsəyə gəlsə, onu nə Elman Rüstəmov dalına şəlləyib aparısıdır, nə bir başqası. O bina bəlkə də yüz illər ərzində Azərbaycan millətinin və dövlətinin mənafeyinə xidmət edəcək, onun iqtisadi qüdrətinin, cazibədarlığının simvoluna çevriləcək. 

Nəzərə almaq lazımdır ki, Mərkəzi Bank çox strateji sahədir və 90-cı illərin sonlarında 32 milyon dollara tikilmiş indiki 11 mərtəbəli inzibati binası müasir dövrün tələblərinə nəinki cavab vermir, hətta işçilərin oturub normal işləməsi üçün minimal şərait belə yoxdur. Mərkəzi Bankın inzibati binası tikiləndə Azərbaycanda yüzə yaxın bank mövcud olsa da onların toplam aktivləri 200 milyon dolları keçmirdi. İndi 30-a yaxın bankın aktivləri on milyardlarla, konkret olaraq 50 milyard manatla ölçülür. Mərkəzi Banka tabe olan qurumları sadalamağa ehtiyac görmürəm, bu boyda nəhəng strukturu çevik idarə etmək üçün münasib iş şəraiti qurulması üçün müasir dövrün tələblərinə cavab verən yaraşıqlı və göz oxşayan bina tikilməsini niyə belə süngü ilə qarşılayırıq? Məncə haqsızlıq edirik, özü də Elman Rüstəmova və İlham Əliyevə yox, dünyanı heyrətləndirməyi bacarmış, hər şeyin ən yaxşısına haqq edən müzəffər Millətimizə...