Prezidentin məmurlara yönəlik xəbərdarlıq və tövsiyyələri, onları harınlıqda, vətəndaşları incitməkdə, ümumxalq maraqlarına, qanunvericiliyə zidd addımlar atmqda ittiham etməsi fonunda iqtidardakı əksər qüvvələr ciddi təbliğat kampaniyasına start verib. Bu kampaniyanın gedişində prezidentin məmurlarla bağlı tənqidi bəyanatlarını əsas gətirən ayrı-ayrı millət vəkilləri, hökumət təmsilçiləri, politoloqlar məmurları ümumi şəkildə və ya konkret adlar, soyadlar çəkməklə tənqid edir ki, bununla da ölkə başçısının fikirləri ilə həmrəy olduqlarını nümayiş etdirməyə çalışırlar. Onların bəzisi isə mövcud situasiyandan şəxsi maraqları konteksində narazı qaldığı hansısa məmuru “vurmaq”, onu mənfi mənada gündəmə gətirmək üçün istifadə edir ki, bu da prezidentin tənqid etdiyi fürsətçilliyin başqa bir növü- siyasi fürsətcillikdir.
Anti-məmur
xorunun digər bir özəlliyi isə bu kampaniya gedişində bəzi şəxslərin düşüncə tərzinin,
qiymətləndirmə meyarının üzə çıxması, bəzən bu düşüncə tərzinin ciddi təəccüb və
təəssüf doğurması ilə bağlıdır. Bu qəbildən olan fikirlərdən biri bugünlərdə məmurlara
qarşı silsilə bəyanatlarla çıxış edən hörmətli millət vəkili Fəzail İbrahimliyə
məxsusdur. Belə ki, millət vəkili harınlamış məmurları tənqid edərkən onları prezidentin
etimadından sui-istifadə etməkqdə ittiham edərək deyir: “Prezident onları
nimdaş kostyumdan çıxarıb, adam edib”.
Bəli, bu gün
bahalı kostyumlar, parıldayan ayaqqabılar geyən, dəyəri yüz minlərlə hesablanan
avtomobillərdə gəzən, milyonluq villalarda yaşayan bir çox məmurun bu mərtəbəyə
nimdaş kostyumla gəldiyi bir həqiqətdir. Bu məsələdə hörmətli millət vəkilinə
haqq verməmək olmaz. Lakin “nimdaş kostyumdan çıxarıb, adam edib” ifadəsi və
onun özündə ehtiva etdiyi məna əsla qəbuledilən hesab edilə bilməz. İlk növbədə
ona görə ki, bir insanın üzərindəki kostyumun nimdaş və ya yeni, ucuz və ya
bahalı olmasının onun adamlığına heç bir aidiyyatı yoxdur. Çünki adamlıq libas
tanımır. Kiminsə nimdaş kostyumunu yenisi ilə əvəz etmək, hər gün işə ictimai nəqliyyatla
gedib-gələn şəxsə yüz minlik avtomobil almaq, ucuz daxmada və ya kirayədə
yaşayan birini Bakının mərkəzində mənzil sahibi eləmək hələ onu adam eləmək demək
deyil. Bu, sadəcə həmin şəxsin sosial rifahını və məişət şəraitini
yaxşılaşdırmaq, maddi təminatını yüksəltmək deməkdir. Bunun adamlıqla hər hansı
əlaqəsi yoxdur.
Adamlıq əxlaqi-mənəvi
dəyərlər sistemidir. Məhz bu baxımdan kimisə adam etmək onu tərbiyələndirmək, zərərli
vərdişlərdən islah etmək, mənəvi baxımdan kamilləşdirmək anlamında işlənə bilər.
Bunu isə pul və ya vəzifə gücünə reallaşdırmaq mümkün deyil. Odur ki, prezident
bəzi şəxslərə vəzifə verməklə onları maddi rifaha qovuşdurdu, adamlığa deyil. Və
onlar bəlkə də ömürlərinin sonuna qədər sahib olduqları milyonları qoruyub
saxlaya, bundan geninə-boluna bəhrələnə biləcəklər. Lakin onların heç vaxt qorunması gərəkən adamlıqları olmayacaq.
Bu gün Azərbaycan
xalqının böyük bir qismi öz yaşamına nimdaş kostyumlar, köhnə çəkmələr, əsgəri
ailə büdcəsi hesabına davam etdirməkdədir. Lakin nimdaş kostyumlu bu insanların
adam olmaq kimi bir dərdi yoxdur. Çünki onların göz açdığı ailələrdə bu
insanlara təzə kostyumlar, bahalı villalar ala bilməsələr də, onları adam kimi
yetişdirə biliblər. Onların adam olmaq üçün təzə kostyum geymək, kreslo sahibi
olmaq kimi bir ehtiyacı yoxdur.
Miskin,
acınılması gərəkən şəxs nimdaş kostyum geyinən deyil. Miskin - əxlaqından çox
libasının qeydinə qalandır. Və miskin o şəxsdir ki, məhz təzə kostyuma, son model maşına, bahalı villaya sahib olmaqla, həm də adamlığa yiyələndiyini zənn edir.
Halbuki, adamlığın bütün mənəvi dəyərlər kimi maddiliklə hər hansı əlaqəsi
yoxdur. Adamlıq hansı qiyafə və görkəmdə zühur etməsindən asılı olmayaraq hörmət
və ehtirama layiqdir... Və insanlıq davam etdikcə hər zaman belə olacaqdır...
Seymur Əliyev
e-mail: [email protected]