ABŞ Federal Ehtiyatlar Sistemi (FED) faiz dərəcəsini 0,25 bənd artıraraq 0,50-0,75 faiz civarından 0,75-1 faizə yüksəldib. Uçot dərəcəsinin ilboyu daha 2 dəfə artırılacağı da gözlənilir.

FED son dəfə ötən il dekabrın 14-də uçot dərəcəsini artırmışdı. Daha öncə - 2015-ci il dekabrın 16-da uçot dərəcəsinin baza faiz dərəcəsinin illik 0-0,25 faiz artırılmasına qərar verilmişdi. FED-in növbəti toplantısı mayın 2-3-də keçiriləcək.

Dünya iqtisadiyyatının ən önəmli aktyoru sayılan FED-in faiz artımı Azərbaycan kimi inkişaf etməkdə olan ölkələrdən ötrü böyük önəm daşıyır. Hər faiz artımı belə ölkələrdə milli valyutanın dəyərsizləşməsinin davam etməsi deməkdir.

Artıq Azərbaycan Mərkəzi Bankı (AMB) FED-in faiz artımı qərarına reaksiya verib. AMB Tədqiqat və İnkişaf Mərkəzinin maliyyə sektoru və bazarlarının təhlili şöbəsinin müdiri Leyla Yusifzadə deyib ki, uçot dərəcəsinin 1 faizə yüksəlməsi baş bankın monetar siyasətinə birbaşa təsir göstərməyəcək. O bu sözləri "Fitch" beynəlxalq reytinq agentliyinin bu gün ”“ martın 16-da Bakıda keçirilən VI illik konfransında dilə gətirib.

İqtisadçı ekspert Ülvi Əmrahsoy faiz artımının manatın məzənnəsinə təsir göstərəcəyini düşünür: “FED-in uçot dərəcəsini artırması qısa müddətdə dünya birjalarında dolları ucuzlaşdırsa da, tezliklə biz dolların yenidən bahalaşmasını görəcəyik. FED faizləri daha 2 dəfə artıracaq. Yəni dolların bahalaşması davam edəcək”.

Onun sözlərinə görə, AMB heç bir önləyici tədbir görmür və artıq sərt pul - kredit siyasətinin ciddi önəmi qalmayıb: “Ümumiyyətlə, hökumət neftin bahalaşacağına bəslədiyi ümidlərini bir kənara qoyub, qeyri-neft sektorunun inkişafı üçün islahatlara başlamalıdır”.