Paris 2024 Olimpiya Oyunlarının nəticələri hər birimizə məlumdur. Azərbaycan budəfəki olimpiadada əvvəlki illərdən daha yaxşı nəticə göstərib. 2 qızıl medal qazanıb.

Mövzu ilə bağlı olimpiadanı izləmək üçün Parisə ezam olunmuş "Report" İnformasiya Agentliyinin İdman Şöbəsinin redaktoru Kənan Həsənov moderator.az-a danışdı.

 

Onun sözlərinə görə,

“Paris 2024 ölkəmizin tarixi ərzində müstəqil dövlət kimi qatıldığımız 8-ci Olimpiada yarışı oldu:

"Budəfəki qazancımız 2 qızıl, 2 gümüş, 3 bürünc medal oldu. Ümumi ölkələrin sıralanmasında isə Azərbaycan 204 ölkə arasından 30-cu yeri tutdu. Bu da qatıldığımız olimpiadalar tarixində ən yaxşı göstəricidir. Təbii ki, bunda da qazanılan o 2 qızıl medalın çox böyük rolu var. Çünki ilk növbədə qızıl medalların sayı sıralamanın nəticəsinə təsir göstərir. Bildiyimiz kimi, qızıl medallarımızı cüdoda qazandıq və bu qazanc Hidayət Heydərov, Zelim Kotsoyev sayəsində baş verdi. Təbii ki, hər ikisindən qızıl medal gözləntisi yox idi. Ancaq ikisinin də fəxri kürsüdə yer alacağına böyük ümidlər var idi. Onlar da bu ümidləri artıqlaması ilə doğrultdular və hər ikisi fəxri kürsüdə yer almaqla Azərbaycan bayrağını qaldırdılar, himnimizin səsləndirilməsinə nail oldular.  Mən həmin anların canlı şahidi olmuşam. Sarayda himn səslənərkən hamı ayağa qalxdı və hər kəs ayaqüstə bizim idmançılarımızı alqışladı. Bunun özü çox xoş bir görüntü idi. 

Gümüş medallarımıza gələk.

Qaşım Maqomedov  taekvondo üzrə bu olimpiada da yeganə təmsilçimiz idi. O, finala kimi inamla irəlilədi və finalda da şansını yüksək dəyərləndirdi. Təəsüf ki, finalda ayağından çox ciddi zədə aldı və döyüşü davam etdirə bilmədi. Bu hal yaşanmasaydı, fəxri kürsüdə ən yüksək pilləni qazana bilərdi. Belə bir imkanı var idi. Belə olan təqdirdə artıq 3 medalımız olacaqdı və bu da sıralamadakı mövqeyimizin daha da yaxşılaşdırılmasına səbəb ola biləcəkdi. 

İkinci qızıl medal ümidimiz Alfonso Dominguez idi. O da bizim boksçularımızdan yeganə iştirakçımız idi ki, fəxri kürsünün ən yüksək pilləsində yer almaq şansını saxlayırdı. Amma təəssüf ki, final görüşündə özbəkistanlı idmançıya məğlub oldu. Bununla belə, onun qazandığı gümüş medal da ölkəmizin sıralamasında olan mövqeyinə xeyli təsir etdi. Dominguez eyni zamanda Azərbaycanın idman tarixinə düşdü. Çünki, indiyədək olan  idman tariximizdə heç bir boksçu iki olimpiadada medal qazanmayıb. Dominguez bunu bacaran ilk boksçu olub. 

Bürünc medallar isə güləşdə qazanıldı. Finalçımızın olmamağı təəssüf hissi doğurur. Ancaq bunun da  iki - obyektiv və subyektiv səbəbləri var. 

Səbəblərdən biri zadənin mane olması idi. Güləşçilərimizdən Sənan Süleymanov Parisə zədəli halda gəlmişdi. Hətta, birinci görüşdə hamı görürdü ki, idmançı xalça üzərində güc-bəla ilə duruş gətirir. Bununla belə, Sənan irəlilədi. Hətta, 3-cü yer uyğrunda görüşə də vəsiqə qazandı. Amma əzmkarlıq göstərməsinə rəğmən, fəxri kürsüdən kənarda qaldı. Digər güləşçilərimizdən isə yalnız 3-ü bürünc medal qazana bildi".

 

K.Həsənov əlavə etdi ki, güləşçilərimizdən gözlənti daha böyük idi:

"Bilirik ki, güləş Azərbaycan idmanının ağır artilleriyası sayılır. İndiyə qədərki olimpiada tarixinə nəzər salsaq, ən çox medal qazanan idman növü məhz güləş olub. Güləş eyni zamanda bizim milli idman növüdür. Amma təəssüf ki, orada istənilən nəticə qeydə alınmadı. İnanırıq ki, olimpiadanın yekunu ilə bağlı Güləş Federasiyası da təhlillərini aparacaq. Lazımi, gərəkli addımları da atacaq. Növbəti 2028-ci ildə Los-Ancelesdə keçiriləcək olimpiadada biz  artıq 

tam fərqli mənzərənin şahidi olacağıq. Bədii gimnastika üzrə komandamızı da xüsusi qeyd etmək istəyirəm. 

Onlar da tarixi nəticəyə imza atdı. Medal qazanmasalar da,  fəxri kürsüdə yer almasalar da, kollektiv olimpiadanı 5-ci pillədə tamamladı. Halbuki, əvvəlki olimpiadalardakı 2 çıxışda 7 və 10-cu yer tutmuşdu. 

Hətta, son ana kimi komandanın medal şansı da qalırdı. Ancaq  təəssüf ki, komanda 5-ci oldu. 

İstənilən halda öz nəticəsini yaxşılaşdırdı, tarixi nəticəyə imza atdı. Ümumillikdə isə olimpiadanı Azərbaycan komandası üçün uğurlu saymaq olarmı? - sualını versəniz, bəli uğurlu hesab etmək olar. 

Çünki, Azərbaycan Milli Komandası tarixi göstəriciyə imza atdı. Bayaq da dediyim kimi, 30-cu yer Azərbaycanın olimpiada tarixi üzrə ən yüksək göstəricisi idi. 

48 idmançıya 7 medal qazancı heç də pis göstərici deyil. Əksinə, yaxşı göstəricidir. Post-sovet ölkələri arasında da Azərbaycan yaxşı nəticə göstərdi. Ona görə düşünürəm ki, builki olimpiadanı uğurlu hesab etmək olar. Bununla kifayətlənmək lazım deyil. Maksimalist olmaq lazımdır. 

Bayaq güləş haqqında da fikir bildirdim və əlavə etmək istəyirəm ki, 4 ildə yenilənmiş, daha güclü bir komanda Los-Anceles 2028 olimpiadasında təmsil olunacaq və əminəm ki, bu olimpiadada gözlənilən effekti verməyən güləş millisi əvəzini Los-Anceles 2028 Olimpiadasında çıxacaq. Ümumiyyətlə, müzakirə olunası detallar həqiqətən də çoxdur və yəqin ki, bütün nəticələr müzakirə olunacaq. Harada boşluqlar varsa, lazımi addımlar atılacaq.

Ümumiyyətlə, Azərbaycan idmanı dövlətin əsas prioritet sahələrindən biridir. Dövlətin daim diqqəti və qayğısı ilə əhatə olunub. Bilirsiniz ki, Azərbaycan Prezidenti Cənab İlham Əliyev eyni zamanda Milli Olimpiya Komitəsinin prezidentidir. Bu baxımdan, idman sahəsi daim diqqət və qayğı ilə əhatə olunub. Ona görə də mən fikirləşirəm ki, Parisdə qeydə alınan nəticələrlə bağlı ciddi təhlillər aparılacaq və lazımi addımlar atılacaq. Azərbaycan Milli Komandası Los-Ancelesə daha qüdrətli bir kollektiv kimi yollanacaq və orada öz sözünü deyəcək.”