“Azərbaycan və Qazaxıstan arasında mövcud ikitərəfli dostluq və qardaşlıq əlaqələri yüksələn xətlə inkişaf edir. Prezident İlham Əliyevin cari ilin 10 aprel tarixində Qazaxıstan Respublikasına rəsmi səfəri iki qardaş ölkə arasında münasibətlərin daha da dərinləşməsi baxımından xüsusi əhəmiyyət kəsb edir. Xatırladaq ki, keçən ilin avqust ayında Qazaxıstan Prezidentinin Azərbaycana rəsmi səfəri zamanı “Müttəfiqlik qarşılıqlı əlaqələrinin və strateji tərəfdaşlıq münasibətlərinin dərinləşdirilməsi haqqında” Bəyannamə imzalandı. Cari ilin 10 aprel tarixində imzalanmış Bəyannamə də əlaqələrin və müttəfiqlik münasibətlərinin möhkəmlənməsinə yönəlib. Əminliklə deyə bilərik ki, bunun əsasını iki ölkənin qardaş xalqları arasında çoxəsrlik tarixə malik olan qarşılıqlı əlaqələr, dostluq və əməkdaşlıq təşkil edir”.
Bu fikirləri Moderator.az-a açıqlamasında Milli Məclisin üzvü Tamam Cəfərova deyib.
Deputat bildirib ki, Azərbaycanın 44 günlük Vətən müharibəsində qazandığı böyük qələbədən sonra regionda yaranmış olan yeni reallıq, geosiyasi vəziyyət və eləcə də dünyada baş verən mürəkkəb proseslər Türk dövlətləri arasında əməkdaşlıq və qarşılıqlı əlaqələrin daha da inkişaf edib möhkəmlənməsini zərurətə çevirmişdir. Son illər bu istiqamətdə bütün sahələr üzrə strateji əhəmiyyətli sənədlərin qəbul olunması, bir sıra tədbirlərin görülməsi Türk dövlətləri arasında münasibətlərin strateji müttəfiqlik səviyyəsinə qaldırılması istiqamətində xeyli iş görüldüyünü deməyə əsas verir. Xatırladaq ki, 2021-ci il iyulun 15-də Azərbaycan və Türkiyə arasında imzalanan tarixi Şuşa Bəyannaməsindən sonra digər Türk dövlətləri ilə də analoji sənədlər imzalanmışdır. Bu, Türk Dövlətləri Təşkilatı (TDT) çərçivəsində qarşılıqlı inteqrasiya və stateji tərəfdaşlığın genişləndirilməsi və dərinləşdirilməsi baxımından mühüm əhəmiyyət kəsb edir.
Bu baxımdan Azərbaycan və Qazaxıstan arasında ikitərəfli əlaqələrin inkişaf dinamikası haqqında deməliyik ki, ölkələrimiz arasında ikitərəfli münasibətlərin inkişafına 1999-cu ildə yaradılmış Ticari-İqtisadi Əməkdaşlıq üzrə Birgə Hökumətlərarası Komissiya mühüm töhfə vermişdir. Komissiyanın indiyədək 18 iclası keçirilib. Sonuncu iclas ötən il iyulun 5-də Qazaxıstanda baş tutub. Bununla yanaşı, ötən il iki ölkə arasında imzalanmış Bəyannamə və cari ilin aprelin 10-da imzalanan Bəyannamə bir-biri ilə tarixi köklərlə bağlı olan Azərbaycan və Qazaxıstan arasında münasibətlərin strateji müttəfiqlik baxımından daha da möhkəmlənməsinə xidmət edir. Hər iki dövlət bütün beynəlxalq platformalarda bir-birini müdafiə edib. Həm Müstəqil Dövlətlər Birliyinin tərkibində, həm də Türk Dövlətləri Təşkilatında hər iki dövlət yüksək səviyyədə təmsil olunmaqdadır. Türk Dövlətləri Təşkilatının təsis edilməsi, mövcud olması və günü-gündən güclənməsində Türkiyə ilə yanaşı, Azərbaycan ilə Qazaxıstanın da misilsiz xidmətləri var. İqtisadi, mədəni, siyasi və sosial sahələrdə münasibətlər getdikcə daha da yaxşılaşır. Xəzər regionunda, Mərkəzi Asiya və Cənubi Qafqaz regionunda baş verən proseslər bizə regional təhlükəsizliklə bağlı məsələlərdən başlamış nəqliyyat, logistika, energetika, humanitar əməkdaşlıq, ekologiya ilə bağlı məsələlərə qədər bütün istiqamətlər üzrə əməkdaşlığı möhkəmlətməyi diktə edir.
Millət vəkili Tamam Cəfərova Qazaxıstan və Azərbaycan arasında qardaşlıq münasibətlərinin əhəmiyyətini xüsusilə vurğulayıb. Qazaxıstan Prezidentinin işğaldan azad edilmiş Füzuli şəhərində qazax xalqının böyük oğlu Kurmanqazı adına Uşaq Yaradıcılıq Mərkəzinin yaradılması təşəbbüsü iki xalq arasında dostluğun rəmzidir. Bu, Mərkəz Qazaxıstanın Azərbaycana hədiyyəsidir, Azərbaycan xalqı bunu heç vaxt unutmayacaq. Qazaxıstan ilə qardaşlıq münasibətləri əcdadlarımızın göstərişi, eləcə də həyati zərurətdir.
Onu da qeyd etməliyik ki, səfər çərçivəsində cənab Prezident İlham Əliyev Ulu Öndər Heydər Əliyevin adını daşıyan küçənin açılışında iştirak edib. Astanada mərkəzi küçələrdən birinin Ümummilli lider Heydər Əliyevin adını daşıması, eyni zamanda Füzuli şəhərində qazax xalqının böyük oğlu Kurmanqazı adına Uşaq Yaradıcılıq Mərkəzinin yaradılması təşəbbüsü iki xalq arasında qarşılıqlı möhkəm dostluğun təzahürüdür. Bundan əlavə, Qazaxıstanda Ulu Öndər Heydər Əliyevin həyat və yaradıcılığına həsr olunmuş sənədli film çəkilib və nümayiş olunub. Bu, qazax xalqının Ümummilli Lider Heydər Əliyevə verdiyi böyük dəyərin daha bir göstəricisidir.
Azərbaycanla Qazaxıstan strateji tərəfdaş olan ölkələrdir və beynəlxalq müstəvidə qarşılıqlı fəaliyyət göstərir, əməkdaşlıq edir və bir-birinin maraqlarını müdafiə edirlər. Bu ölkələrin dostluğunun əsasını hər iki xalq eyni kökə, mədəniyyətə, ənənələrə malik olması, qarşılıqlı əlaqələr və əməkdaşlıq təşkil edir. Xüsusilə qeyd etməliyik ki, iki ölkə arasında strateji tərəfdaşlıq günü-gündən inkişaf edir və möhkəmlənir. Əminliklə deyə bilərik ki, Prezident İlham Əliyevin Astanaya səfəri çərçivəsində imzalanan yeddi adda sənəd ölkələrimiz arasında münasibətlərin daha da inkişaf edərək dərinləşməsinə xidmət edəcək. Millət vəkili Tamam Cəfərova belə deyib.
