Moderator.az xəbər verir ki, aprelin 29-da RATİ-də Şəmkir rayon Qarabağlar kənd sakini, şəhid bacısı Mərcan Hüseynova Şəmkir polisində oğlunun başına gətirilən ilginc hadisə ilə bağlı mətbuat konfransı keçirdi. Onun dediyinə görə, qudası Fərhad Kazımov dörd ay əvvəl onlara 20 min manat pulunun oğurlandığını deyib. Bir neçə gün sonra isə bu barədə polisə məlumat verib. Onun şikayəti əsasında cinayət işi açılıb. Cinayət işi ilə bağlı bir neçə nəfər dindirilib və izahatları alınıb. Onların arasında Fərhad Kərimovun bacıoğlusu və onun oğlu Sərxan Hüseynov da olublar. Sonra həmin dindirilən şübhəlilərin hamısını buraxıblar. Cinayətin üstü açılmayıb. Həmin dövrdə şübhələr daha çox zərərçəkmişin bacıoğlunun üzərində dayansa da, aprelin 21-də İmran adlı sahə müvəkkili onun 1987-ci il təvəllüdlü oğlu Hüseynov Sərxan Ələddin oğlunu izahat vermək adı ilə Şəmkir Polisinə aparıb. Onun evə dönmədiyini görən valideynləri polisə gedərək nə baş verdiyi ilə maraqlanıblar. Polisdə isə Sərxana məhkəmənin qərarı ilə 7 sutka həbs cəzası verildiyini bildirilib və səbəbi açıqlanmayıb.
Şəhid bacısı iddia etdi ki, cinayətin üstünü aça bilmədiklərini görən polislər işi Sərxanın üzərinə qoymaq üçün həbsdə saxlayıblar. Sonra İstintaqı aparan Vilayət adlı müstəntiq cinayəti üzərinə götürməsi üçün təcridxanada Sərxanı döyərək işgəncə verib. Evdə olmadıqları müddətdə isə oğlunu əli qandallı evə gətirərək, hamilə olan həyat yoldaşını çölə çıxarıb, qapını arxadan bağlayıblar. Evə baxış keçirərək, guya 1400 manat maddi sübut tapıblar.
“ Bu inandırıcı deyil, pulu özləri qoyub oğlumu qoyduqları yerdən götürməyə məcbur ediblər. Deyiblər ki, öyrətdikləri kimi desin. Zorla danışdırıb videoya çəkiblər. Onların danışıqların hamısını gəlinimiz qapının arxasından eşidib. Sonra gəlini də çağırıb Sərxanın xeyri üçün olduğunu bildirib, aldadaraq bir sənədə imza atdırıblar ”-deyə M. Hüseynova bildirdi.
M. Hüseynova dedi ki, evə baxış keçirərkən axtarış haqda sənə təqdim olunmayıb, hal şahidləri iştirak etməyib. Oğlunun 7 sutka həbsi ilə bağlı məhkəmə qərarını ala və hansı ittiham irəli sürülməsini öyrənə bilməyiblər. Öyrənməyə cəhd etsələr də nə polis, nə də məhkəmə onlara heç bir məlumat verməyib. Sərxanla görüşməyə imkan yaradılmayıb. Məcbur olub qaynar xəttə zəng ediblər. Bundan sonra onlara qarşı da təzyiqlər başlayıb. Vilayət adlı müstəntiq onları da, qaynar xəttə oturanları da nalayiq söyüşlərlə söyüb. Deyib ki, haraya istəyirsiniz şikayət edin. Oğlunuz boynuna alıb və biz onu lentə almışıq.
“ Çəkilişi bizə göstərdilər. Oğlum danışa bilmirdi. Zorla stolun üzərinə çıxıb guya ki, gizlətdiyi yerdən 1400 manat pulu götürür. Amma danışığından, hərəkətlərindən və videonun hissə-hissə olmasından onun təzyiq altında olduğu hiss olunur”.
Şəhid bacısı əlavə olaraq qeyd etdi ki, oğlu ağır xəstədir. Böyrəkləri yaxşı işləmir. Həbsdə saxlanması, təzyiqlərə məruz qalması onun vəziyyətini ağırlaşdıra bilər.
8 gün keçməsinə baxmayaraq oğlunun hələ də həbsdə saxlandığını, onunla görüş icazə verilmədiyini bildirən M. Hüseynova dedi: “ Bir neçə ildir Yeni Azərbaycan Partiyasının üzvüyəm. Hüquqlarım tapdanır. Məni eşidən yoxdur. Sözümü deməyə adam tapa bilmirəm. Əgər, sözümü eşidən olsa idi Bakıya gəlməyə məcbur olmazdım. Bizimlə insan kimi davranmırlar. Oğlum günahkardırsa cəza çəkməyinə razıyam. Mən əminəm ki, o, günahkar deyil. Hakimiyyətdə olan bir partiyanın üzvüyəm, haqsızlıqla üzləşirəm və məni eşidən yoxdursa və şikayətimə baxılmırsa bu partiya mənim nəyimə lazımdır? YAP-dan da, vətəndaşlıqdan da imtina edirəm ”.
