"Cəbhədə dönüş, Odessaya planlar və müharibənin real qiyməti" - ISW

Bizi sosial şəbəkələrdən izləyin:

"Analitiklərin hesabatları Rusiyanın ambisiyaları ilə imkanları arasındakı fərqi göstərir..."

2026-cı ilin fevralının son iki həftəsində Ukrayna qüvvələri 2023-cü ilin yay əks-hücumundan bəri ilk dəfə olaraq itirdiyindən daha çox ərazi azad edib.

Moderator.az xəbər verir ki, bu barədə Amerikanın Müharibənin Öyrənilməsi İnstitutunun (ISW) hesabatında bildirilir.

Analitiklərin məlumatına görə, 1 yanvardan bəri Ukrayna təxminən 257 kvadrat kilometr ərazini geri qaytarıb. 14-20 fevralda xalis artım 33 kvadrat kilometr, 21-27 fevralda isə 57 kvadrat kilometr olub. ISW qeyd edir ki, oxşar müsbət dinamika sonuncu dəfə 2023-cü ilin yayında müşahidə edilib.

Bununla belə, ekspertlər cəbhə xəttinin "məsaməli" xarakter almasının və mövqelərin tez-tez dəyişməsinin real nəzarət zonasını qiymətləndirməyi çətinləşdirdiyini vurğulayırlar. Onların fikrincə, bu uğurlar diqqətəlayiq olsa da, genişmiqyaslı əks-hücum ehtimalı aşağıdır və Rusiya mövqelərini sabitləşdirərək yenidən hücuma keçə bilər.

Odessa planı və reallıq

ISW Kremlin 2025-2027-ci illər planlarını da təhlil edib. Ukrayna prezidenti Vladimir Zelenskinin sözlərinə görə, Moskva Donetsk və Luqansk vilayətlərini tam ələ keçirməyi, həmçinin Odessa istiqamətində irəliləməyi planlaşdırır. Lakin analitiklər hesab edir ki, Rusiya ordusunun Odessaya doğru ciddi irəliləyiş əldə etməsi inandırıcı görünmür.

Hesabatda xatırladılır ki, Moskva daha əvvəl də qeyri-real müddətlər müəyyən edib və bu hədəflərə çata bilməyib. ISW-nin qənaətinə görə, Rusiya yay kampaniyasına hazırlaşsa da, mövcud ehtiyatlar elan olunan məqsədlər üçün yetərli deyil.

Müharibənin milyardlıq yükü

"Defense News" analitiklərinin hesablamasına əsasən, müharibə Rusiyaya ümumilikdə təxminən 2,5 trilyon dollara başa gəlib. Bu məbləğə canlı qüvvə itkisi, yaralananlar, texnika, əməliyyat xərcləri və ÜDM azalması daxildir. Yanvar hesabatına görə, 325 min rusiyalı həlak olub, 875 min nəfər yaralanıb və ya itkin düşüb.

İqtisadçıların "VSL" metoduna əsasən, bir rusiyalının həyat dəyəri orta hesabla 2,6 milyon dollar götürülür ki, bu da yalnız həlak olanlara görə 845 milyard dollar itki deməkdir. Yaralananlara görə isə əlavə yüz milyardlarla dollar hesablanır.

Analitiklərin vurğuladığı kimi, bu xərclər əsasən "səfərbərlik, həyat səviyyəsinin enməsi və iqtisadi daralma vasitəsilə" sıravi rusiyalıların üzərinə düşür. Beləliklə, cəbhədə məhdud irəliləyişlər fonunda müharibənin real dəyəri getdikcə daha ağır görünür.