Vahid Əhmədov: ”Dünyanın müstəmləkəçi kimi tanıdığı Fransa Cənubi Qafqazda xilaskar donunda zühur etmək niyyətindədir”
“Rəsmi Paris bütün dünyanın gözü önündə Ermənistanı yeni müharibəyə təhrik edir”.
Bunu Moderator.az-a açıqlamasında millət vəkili Vahid Əhmədov bildirib. Millət vəkili qeyd edib ki, Fransanın Ermənistan hücum silahları ilə silahlandırması, ona müasir artilleriya sistemləri verməsi rəsmi Parisin yeni müharibə istəyindən xəbər verir:
“Mediada Fransa ilə Ermənistan arasında “Caesar” özüyeriyən artilleriya qurğularının alqı-satqısı barədə kontraktın imzalandığı ilə bağlı məlumatlar yer almaqdadır. Hansı ki, bundan öncə də Fransa Ermənistana müxtəlif hərbi texnikalar vermiş, Ermənistan ordusununun yenidən qurulması prosesində iştirak etməyə hazır olduğunu bidlrimişdi.
Fransanın Ermənistana çoxsaylı hərbi yardımlarının ardınca Ermənistanın müdafiə nazirinin Fransaya son səfəri zamanı yeni raket sistemlərinin alqı-satqısı ilə bağlı müqavilənin imzalanması, rəsmi Parisin Cənubi Qafqazdakı sülh deyil, müharibə görmək istədiyini göstərir. Bu fakt bir daha sübut edir ki, rəsmi Paris nəyin bahasına olursa-olsun Cənubi Qafqazda vəziyyəti gərginləşdirməkdə maraqlıdır və bunun üçün bütün imkanlardan istifadə edir. Bu isə onu deməyə əsas verir ki, regionda yeni bir hərbi qarşıdurmaya görə məsuliyyət Ermənistanla yanaşı, həm də Fransanın üzərinə düşəcək”.
Millət vəkili bir qrup tanınmış fransız xadimin Ermənistana qoşun göndərilməsi ilə bağlı müraciətinə də fikir bildirib:
“Bir qrup fransız xadimin Ermənistana qoşun göndərilməsi ilə bağlı Makrona ünvanlanan müraciəti rəsmi Parisin özü tərəfindən təşkil edilən gülünc və ikrahedici bir təşəbbüsdür. Bu təşəbbüs bir daha Fransanın “qaşınmayan yerdən qan çıxarmaqda” nə qədər qərarlı olduğunu göstərir. Görünən odur ki, dünyanın müstəmləkəçi kimi tanıdığı Fransa Cənubi Qafqazda xilaskar donunda zühur etmək niyyətindədir.
Əgər Ermənistanın təhlükəsizliyi ilə bağlı həqiqətən də real bir təhlükə mövcud olsaydı, o zaman belə bir tələblə Fransa deyil, rəsmi İrəvan çıxış edərdi. Ermənistanın yerinə Fransanın narahat olması, “Azərbaycan təhlükəsi” iə bağlı deyilənlərin cəfəngiyyatdan başqa bir şey olmadığını göstərir.
Azərbaycanla Ermənistan arasında sülh mövcuddur və bu sülhü bölgəyə Müzəffər Ali Baş Komandanın rəhbərliyi altında Azərbaycan Ordusu gətirib. Əgər Fransa öz “sülhpərvər” niyyət sərgiləməkdə israrlıdırsa, bu niyyətini Yeni Kaledoniyada kanak xalqına qarşı zorakılığı dayandıraraq göstərə bilər. Azərbaycan da daxil, bütün dünyanın Fransadan gözlədiyi məhz budur”.
Seymur ƏLİYEV