Donald Tramp bəyan edib ki, prezident seçkilərində qalib gələcəyi təqdirdə Rusiyada həbsdə olan amerikalı jurnalist Evan Qerşkoviçin tez bir zamanda azad edilməsinə nail olacaq. Moskva bu məsələnin Respublikaçılar Partiyasının namizədi ilə müzakirə edildiyini inkar edir.

 

Moderator.az xəbər verir ki, bu barədə "bbc.com" nəşri yazıb.

 

"Rusiyada həbsdə olan "The Wall Street Journal" nəşrinin reportyoru Evan Qerşkoviç mən vəzifəmin icrasına başlayan kimi seçkilərdən demək olar ki, dərhal sonra azad ediləcək", - bunu Tramp özünün "Truth Sosial" platformasında yazıb.

 

"O, evində, təhlükəsiz şəraitdə və öz ailəsi ilə birgə olacaq", - Tramp adəti üzrə böyük hərflərlə yazıb.

 

Tramp bəyan edib ki, Birləşmiş Ştatlar "heç nə ödəməyəcək", bunu Co Baydenin ötən il İranda həbsdə olan amerikalıların azad edilməsinin müqabilində Cənubi Koreyada dondurulan İran neftindən gəlirlərin köçürülməsinin tənqidi kimi anlamaq olar.

 

Tramp Putinlə və ya ümumiyyətlə Rusiya hakimiyyəti ilə hər-hansı təmaslarını, Rusiya prezidentindən belə diqqət üçün onun hansı əsaslarının olduğunu xatırlatmayıb.

 

Trampın seçkiöncəki kampaniyası qərargahının nümayəndəsi Stiven Çunq "Reuters" agentliyinə deyib:

 

"Cənab Qerşkoviçin təhlükəsiz şəraitdə öz ailəsinə qaytarılması barədə razılığa gələ biləcək tək bir adam varsa, o da prezident Trampdır".

 

2016-cı ildən Tramp Rusiya ilə sövdələmədə və ya onun tərəfindən gizli şəkildə dəstək verilməsində şübhəli bilinərək təqib edilib. O, buna ağrılı münasibət göstərib və həmişə bunu inkar edib.

 

Xüsusi prokuror Robert Müllerin tədqiqatı 2017-2019-cu illərdə davam edib və Tramp və  Rusiya arasında sövdələşmə faktlarını aşkar etməyib.

 

Prokuror etiraf edib ki, o zaman prezident kimi Trampın özünün fəaliyyətini araşdıra bilməyib və araşdırmayıb. 

 

Bu zaman Müller birmənalı nəticəyə gəlib ki, Rusiya 2016-cı il seçkilərinə müdaxilə edib, hərçənd Moskva bunu inkar edir.

 

Kremlin mətbuat katibi Dmitri Peskov bununla bağlı suallara cavabında deyib: "Burada Donald Trampla hər-hansı təmaslar, təbii ki, olmayıb".

 

Xatırladaq ki, 32 yaşlı Evan Qerşkoviç bir ildən artıqdır ki, 2023-cü ilin mart ayında Rusiyaya işgüzar səfəri zamanı həbs edilb və Moskvanın "Lefortovo" istintaq təcridxanasındadır.

 

O, SSRİ dönəmindən casusluq ittihamı ilə həbs edilən ilk Qərb jurnalistidir. Bu ittihamları o və işverəni rədd edir. 

 

Bayden administrasiyası Qerşkoviçi "qanunazidd saxlanılanların" siyahısına daxil edib, bununla da faktiki olaraq onu girovlara bərabər tutub.

 

2023-cü ilin sonunda Bayden administrasiyası bəyan edib ki, Rusiyaya əsirlərin mübadiləsi çərçivəsində "vacib təklif" edib, lakin Moskva bunu rədd edib.

 

Jurnalistin saxlanılmasından sonra Rusiya FTX bəyan edib ki, jurnalist "Amerika tərəfinin tapşırığı ilə Rusiya hərbi-sənaye kompleksinin müəssisələrinin birinin fəaliyyəti barədə dövlət sirrini təşkil edən məlumatların toplanmasını həyata keçirib".

 

FTX iddia edib ki, amerikalı jurnalist Yekaterinburqda "məxfi məlumatları əldə etməyə cəhd göstərərkən" saxlanılıb.