Xəbər verildiyi kimi, bu günlərdə Qarabağdakı ermənilərin böyük əskəriyyəti köçdükdən sonra da Xankəndində qalan Sarkis Qalstyan həyat yoldaşı ilə birlikdə Qırmızı Xaçın vasitəsilə Ermənistana köçərkən Azərbaycanla sərhədi keçdikdən sonra Gorusda erməni xüsusi xidmət orqanları tərəfindən casusluq ittihamı ilə saxlanılıb.

“Qohumları Qalstyanın Ermənistana qayıtmağa artsaxın boşaldılmasından artıq 7 ay sonra niyə qərar verdiyini bilmirlər”.

Moderator.az xəbər verir ki, bunu “Hraparak” yazır.

 

Erməni nəşri bildirir ki, əvvəldən qohumları Sarkis Qalstyan və onun həyat yoldaşından Qarabağda qalmamağı xahiş edərək Ermənistana gəlməyə çağırıblar. Sonralar da buna davam ediblər. Lakin S.Qalstyan həmişə ümid etdiyini bildirib ki, Qarabağdan köçmüş ermənilər tez və ya bir az sonra Rusiya tərəfinin vasitəçiliyi ilə geri qayıdacaq və bu halda o, artıq Qarabağda müəyyən statusa malik olacaq və hansısa rolu öz üzərinə götürə bilər. 

 

“Ola bilsin ki, S.Qalstyan 7 aydan sonra geri dönüşün olmadığına əmin olub və Ermənistana köçmək qərarına gəlib”- deyə erməni qəzeti vurğulayır.

 

Araşdırmamızdan bəlli oldu ki,  Sarkis Qalstyan və onun həyat yoldaşı hazırda Bakıda həbsdə olan Qarabağda ləğv olunmuş separatçı-terrorçu rejimin keçmiş qondarma “prezidenti” Bako Saakyanın Xankəndindəki villasında qalıblar. Guya S.Qalstyan Bakonun “xaç atası” imiş... 

 

Hələ fevral ayının əvvəlində saytımızda Kərkicahana gedib-gələn soydaşlarımızın B.Saakyanın villasında məskunlaşmış erməni ər-arvadın oradakı bulaqdan tez-tez su götürdüklərini söyləmələrini də yazmışdıq...

 

Onu da xatırladaq ki, hələ 2023-cü il oktyabrın əvvəlində, yəni Azərbaycan ordusunun Qarabağdakı lokal əməliyyatından sonra ermənilərin kütləvi şəkildə Qarabağı tərk etməsindən sonra bəhs edilən Sarkis Qalstyanın guya Azərbaycan tərəfindən Xankəndinə komendant təyin olunması haqda məlumatlar da yayılmışdı... 

 

O zaman “Azadlıq” radiosunun erməni bürosunun araşdırmasından bəlli olmuşdu ki, Sarkis Qalstyan Qarabağ separatçılarının "keçmiş parlamentində deputat" olmuş David Qalstyanın əmisidir.

 

Qondarma “deputat” deyib ki, əmisinin Xankəndinin komendantı təyin olunmasına və azərbaycanlılarla əməkdaşlıq etməsinə dair heç bir məlumatı yoxdur.

 

O deyib ki, əmisini son dəfə sentyabrın 28-dən sonra görüb və həmin vaxt Qarabağdan evakuasiya gedirdi.

 

David Qalstyanın sözlərinə görə, əmisi ona deyib ki, Ermənistana getməyəcək və Qarabağda qalan ermənilərə kömək edəcək.

 

David Qalstyan onu da deyib ki, əmisi uzun illər Dağlıq Qarabağda müxtəlif vəzifələrdə çalışıb, 1990-cı illərdə hərbi əməliyyatlarda iştirak edib, Şuşada "başçı müavini" olub. Daha sonra qondarma “Hərbi vətənpərvərlik və təhsil nazirliyində” orta vəzifədə çalışıb.

 

S.Laçın