Bu gün14 iyun Son zəng günüdür. Məktəblərdə sonuncu dəfə zəng çalındı. Hər bir şagird kimi sənətçilərimiz də bu günləri yaşayıblar. Bəs görəsən son zəng məşhurların xatirəsində necə iz qoyub?

 

Sənətkarlar xatirələrini Moderator.az ilə bölüşüblər. 

 

Xalq artisti Nisə Qasımova son zəngindən heç də razı qalmayıb.

“8-ci sinifdə məktəbdən çıxdım, Ukraynada oxumağa başladım. O məktəbdə cəmi 2 azərbaycanlı oğlan oxuyurdu. Azərbaycan tərbiyəsi aldığım üçün son zəngə getmədim. Çünki bir dəfə onların son zəngini görmüşdüm, başıma az qala hava gələcəkdi. Son zəngimi qohumlarımla birgə qeyd etmişəm” deyə xalq artisti bildirib.

 

Xalq artisti Həmidə Ömərova o illəri belə xatırlayır.

“Son zəng günü şeir yazmışdım, qabağa çıxıb oxudum, hamı da kövrəldi. Şeir belə başlayırdı “Əlvida əziz məktəb, əlvida müəllimlərim, sinif yoldaşlarım”. İndi həmin şeir yadımda qalmayıb, amma hansısa xatirə dəfrətimdə onu saxlayıram. Bu şeirdə bütün müəllimlərimin xarakteristikasını göstərmişdim, hamını ağlatmışdım. İndi bir çox müəllimlərimiz və məktəb yoldaşlarımız dünyalarını dəyişiblər. 240 saylı məktəbin 10-A sinfi idi. Hamı ağ geyinmişdi” deyə sənətkar bildirib.

 

Əməkdar artist Hicran Nəsirova deyir ki, o illərdə son zəng sadəcə məktəbdə qeyd olunurdu.

“Bizim vaxtımızda “veçer” yox idi. Son zəng məktəbdə qeyd olunurdu, çıxıb gəzirdik, daha sonra evə gəlirdik. Təbii ki, müəllimlərimiz də yanımızda olurdu. Son zəng 25 may günü keçirilirdi. Qızların başında ağ lent olurdu, universitetin 1-ci kursuna qədər mən saçıma lent vurmuşam. Bizim məktəbdə qızlardan ibarət poeziya teatrımız var idi, səhnəciklər oynayırdıq. Rus dili müəlliməm elə bilirdi ki, onun kimi rus dili müəlliməsi, ədəbiyyat müəlliməm də elə bilirdi ki, onun kimi ədəbiyyat müəlliməsi olacam. Komsomol fəalı idim, bütün tədbirlərdə çıxış edirdim. Taleyimi bəlli etməmişdim ki, hansı sənətin sahibi olacam?! Son anda aktrisa olmağa qərar verdim, amma daha çox özümü müğənni kimi görürdüm” deyə sənətkar bildirib.

 

Məşhur müğənni Nazənin Salayeva bildirib ki, o illərdə son zəng tam fərqli qeyd olunurdu.

“O illər üçün, məktəbim üçün burnumun ucu göynəyir. O vaxt müəllimlərə qarşı, sinif yoldaşlarımıza qarşı böyük sevgi var idi. Sinif yoldaşlarımızdan ayrıla bilmirdik, böyük travma yaşayırdıq, depressiyaya düşürdük. Amma indiki şagirdlər sevinclərindən uçurlar ki, orta məktəbi bitirirlər. Bizdə tam fərqli idi. Heç vaxt yadımdan çıxmaz, ibtidai müəlliməmiz çox məyus olmuşdu, hətta ürəyi tutmuşdu ki, uşaqlardan ayrılır. Kişilərdə əsl dostluq hərbi xidmətdə olanda yaranır, bir də orta məktəbdə. Ona görə də məktəb dostluqlarına sadiq qalırlar. Bilmirəm indikilər də belədir ya yox? Amma bizdə çox böyük birlik var idi” deyə müğənni bildirib.

 

Tanınmış aktrisa Gültac Əlili 2005-ci ildə məktəbi bitirdiyini bildirib.

“Mən 2005-ci ildə məktəbi bitirmişəm. Oxuduğum məktəb Gəncə şəhərində sayılıb-seçilən məktəblərdən biri idi. Yadımdadır, son zəngdə gözəl səhnəciklər, mahnılar hazırlamışdıq. Mən hələ məktəbdə oxuduğum vaxtdan məktəbin tanınmış üzü, siması idi. Sinif yoldaşlarımızın hamısının adı, üzü yadımdadır. Son zəng öncə məktəbdə, daha sonra isə Xan bağında qeyd olunurdu. Hələ də son zəng günümdəki önlüyü saxlayıram, orada bütün sinif yoldaşlarım ürək sözlərini yazıblar. Məktəbi bitirən bütün məzunları ürəkdən təbrik edirəm, inşallah ki, onlar universitetə qəbul olarlar. Məktəb illəri ən gözəl illərdir, ən qayğısız günlərimiz məktəbdə keçirdiyimiz günlər idi. Mən sizinlə danışıram, gözlərim dolur, kövrəlirəm” deyə aktrisa bildirib.