Hamını yığmışdılar təzə yolun açılışına. Deputat gəlib qırmızı lenti kəsməliydi. Qəsəbədə yaşayanlar aylardır bu günü gözləyirdilər. Həm təmirin toz-torpağından canları qurtaracaq, həm də üzünü yalnız parlament seçkiləri zamanı küçələrə vurulan şəkillərdən gördükləri deputatla söhbət edəcəkdilər. Bələdiyyə sədri demişdi ki, deputat hamının şikayət və təkliflərini dinləyəcək. Amma kişini çox yormaq olmaz. Çalışın az danışasız.

Cavad da burda idi. Məhəllədəki tay-tuşları onu güclə gətirmişdilər yolun açılışına. Onsuzda işsiz, bekar adamdı. Həm də bura gəlməklə fikri də biraz dağılar. Yoxsa bu elçilik məsələsi yazığı lap əldən salıb. Sevdiyi qızın atası daş atıb baş tutur ki ölərəm Cavada qız vermərəm. Belə baxanda kişinin haqqı da var. İndiki zamanda kim təhsilsiz, işsiz, savadsız adama qız verər. Nə olsun qızın da istəyi var. Deyir qızı özbaşına qoysan ya halvaçıya gedər, ya da zurnaçıya. Bu Cavad halvaçıdan da pisdi, zurnaçıdan da.

Deputatın gəlməyinə az qalmışdı. Hamı çalışırdı ki, irəlidə dayanıb millət vəkilini rahat görə bilsin. Tədbirdən sonra ona yaxınlaşmaq da rahat olsun. Bütün bunlar təkcə Cavadın vecinə deyildi. O, bir kənarda dayanıb hey düşünürdü. Necə etsin ki, Sevincin atasının razılığını ala bilsin. Daha qapılarına adam da qalmayıb göndərməsin. Əvvəlcə atası, anası getdi. Sonra rayondan 86 yaşlı babasını gətirdib göndərdi elçiliyə. Bunlar bir nəticə vermədi. Qəsəbənin axundunu da qatdı bu işə. Yenə də bir şey çıxmadı. Hətta dostları da Cavaddan xəbərsiz qızın atasının işlədiyi idarəyə gedib minnətçi düşdülər. Bunun da bir xeyri olmadı. Kişi yox deyib durub. Qonşular danışır ki, guya Sevincin atası deyib ki, qızımı metroda dilənənlərə verərəm Cavada yox. Bu sözü eşidən Cavad and içib ki, nə olur olsun qızı alacağam. Özü də atasının razılığı ilə. Qoy o, o olsun, mən də mən.

Bahalı maşın küçədəki izdihama yaxınlaşıb bir qədər kənarda dayandı. Qabaq qapıdan idmançı cüssəli bir nəfər düşüb cəld arxa qapını açdı. Maşının içindən alçaq boylu, seyrək saçlı, kök bir adam çıxdı. Bir qədər dayanıb onu gözləyənlərə nəzər saldı və ağır addımlarla irəliləməyə başladı. Hiss olunurdu ki, artıq çəki və isti hava ona əziyyət verir. Rahat nəfəs alsın deyə bahalı pencəyinin altındakı köynəyinin üçüncü düyməsini də açdı. Camaat artıq pivə çəlləyinə oxşayan bu adamın deputat olduğunu başa düşmüşdü. Hamı çox diqqətlə onu izləyirdi. İzdihamın arasından 3 nəfər çıxıb cəld deputata yaxınlaşdı. Bunlar bələdiyyə sədri, qəsəbə icra nümayəndəsi və məscidin axundu idi. Deputat ayaq saxlayıb onlarla nəsə danışdı və razılıq əlaməti olaraq başını tərpətdi. Daha sonra millət vəkili üçün ayrılmış yerə gəldi. Bələdiyyə sədri nüfuzlu qonağı yerbəyer etdikdən sonra mikrofona yaxınlaşdı. Əvvəlcə toy müğənniləri kimi mikrofonu yoxladı və danışmağa başladı. Bir qədər danışandan sonra sözü millət vəkilinə verdi. “Pivə çəlləyi” yenə ağır-ağır yerindən qalxıb mikrofona yaxınlaşdı. O da bələdiyyə sədri kimi yolun təmirindən, ora xərclənən pullardan, təmirin əhəmiyyətindən danışdı. Daha sonra bütün məmurlar kimi Azərbaycanın uğurlu daxili və xarici siyasətini “xırdalamağa” başladı.

Cavaddan başqa hamı onun dediklərinə diqqətlə qulaq asırdı. Tam sakitçilik idi. Yalnız deputatın beyin yoran səsi eşidilirdi. Bircə bu səs Cavada təsir etmirdi. Çünki onun beyni Sevincgilin evində idi. Nə qədər fikirləşirdisə bir çıxış yolu tapmırdı ki tapmırdı. Onu xəyallar aləmindən yanında dayanmış qonşusu Fərhadın səsi ayıltdı:

- Cavad, səncə, bu deputat doğurdan bu qədər adamın probleminə qulaq asacaq?

- Mən hardan bilim? Sözün var, yaxınlaş de özünə.

- Sözün var deyənədə ki, atam deyəcək. Özün bilirsən ki, bizdəki torpaq problemidi. Həyətimizin yarısını yalançı sənədlə özəlləşdirib limonad sexi edirlər. Deyilənə görə sex elə bu deputatın özünündü. Görək də atam nə edəcək. Amma sənin problemini başqası yox gərək elə özün deyəsən ona.

Fərhadın son sözləri Cavadın beynində kilsə zəngi kimi əks-səda verdi. Görəsən həqiqətən deputat Sevincin atasını yola gətirə bilər? O, üzünü Fərhada tutub dedi:

- Qardaşım, mən elçilik məsələsini buna desəm ayıb olmaz ki?

- A kişi, ayıb niyə olur? O boyda Türkiyənin prezidenti, baş naziri elçiliyə də gedir, toya da. Televizora baxmırsan sən? Dünyadan xəbərin yoxduyeee vallah ”“ deyə Fərhad cavab verdi.

Onun bu sözləri Cavadı daha da ürəkləndirdi. O, camaatı itələyə itələyə gedib düz qabaqda dayandı. Gözləri çıxış edənin üzündə olsa da, fikri ona deyəcək sözlərin yanında idi. Hər sözü, hər cümləni yüz ölçüb bir biçirdi.

Nəhayət millət vəkili nitqini yekunlaşdırıb susdu. Elə bu vaxt izdihamın içindən yaşlı bir qadın səsləndi:

- Ay Tarix müəllim, ay sənin qadan alım, bəs bu su məsələsi nə vaxt düzələcək? Qabağda yay gəlir. Yenədəmi vedrə əlimizdə oyan bu yana qaçacağıq?

Deputat dedi:

- Anam qəti narahat olma. Su xətlərinin təmirinə də bu yaxınlarda başlayacağıq. Onunla paralel qaz xətti də çəkiləcək.

Yaşlı qadının su problemini deputatın nəzərinə çatdırması digərlərini də aktivləşdirdi. Hamı birağızdan öz problemini eşitdirməyə çalışırdı. Deputat 10 nəfərə yaxın sakinin problemini dinlədi və hamıya da eyni cavabları verdi. “Baxarıq”, “düzələcək”, “nəzərə alarıq”, “bu işlə şəxsən özüm məşğul olacağam” və s.

Danışıqlar qurtardıqdan sonra deputat maşına doğru getməyə başladı. Təbii ki, bayaq onu qarşılayan 3 nəfər də yanında. Bu dəfə qonağı yola salırdılar.

- Ə, nə oldu dedin kişiyə sözünü?

Cavadı elə bir cərəyan vurub ayıltdı. Bir də baxdı ki deputat artıq maşına çatır. Dərhal qaçmağa başladı. Onlara çatanda Cavadın qabağını icra nümayəndəsi kəsdi və qışqıra-qışqıra:

- Ay uşaq görüş bitdi, tədbir qurtardı ”“ dedi.

Cavad maşına minməyə hazırlaşan deputata tərəf:

- Tarix müəllim, Tarix müəllim mənim də sözüm var. Xahiş edirəm dinləyin. Xahiş edirəm. . . ”“ qışqırdı.

Deputat maşının qapısını örtüb dayandı. Geri çevrilib:

- Qoyun gəlsin ”“ dedi.

Cavadı buraxdılar. O, millət vəkilinə yaxınlaşıb dedi:

- Tarix müəllim, mən sizi şəxsi məsələyə görə narahat edirəm.

Bu söz deputatı bir qədər çaşdırdı. Düşündü ki, yəqin bu cavan oğlan ya məndən pul istəyəcək, ya da deyəcək ki, işlə təmin elə.

- Buyur.

- Tarix müəllim, ayıb olmasın mənim sevdiyim bir qız var. Onun da mənə könlü var. Amma atası bizə mane olur. Qapılarına nə qədər getmişiksə qızı vermir. Sizdən xahiş edirəm, imkanınız varsa bir danışın onunla. Bəlkə siz yola gətirə bildiniz.

Cavad sözünü bitirdikdən sonra həm deputat, həm onun idmançı cüssəli sürücüsü, həm də yanlarındakı 3 nəfər ucadan gülməyə başladılar. Onların gülməyi Cavadı yaman pərt etdi. Bu əməli tutduğuna peşman olmuşdu. Millət vəkili gülə-gülə maşının qapısını yenidən açıb oturmaq istəyirdi ki, birdən dayandı. Üzü çox ciddi görkəm aldı. Cavada baxıb dedi:

- Adın nədir sənin?

- Cavaddır.

- Sabah saat 12-də gələrsən yanıma məsələni yoluna qoyarıq.

Cavad deputata təşəkkür edib sevinə-sevinə getdi. Qanadı olsaydı uça-uça da gedərdi.

Nəhayət deputat avtomobilə əyləşdi. Pəncərənin şüşəsini aşağı salıb onun getməsini gözləyən bələdiyyə sədrini yaxına çağırdı və alçaq səslə dedi:

- Sabah saat 12-nin yarısı mətbuatı yığ tök idarənin qabağına. Hamısına de ki, Tarix müəllim öz gənc seçicisi üçün elçilik edəcək. Jurnalistlər nə qədər çox olsa o qədər yaxşıdı. A kişi, Ərdoğandan nəyimiz əksikdi?

Son sözləri özünə də ləzzət elədi və qəhqəhə çəkib güldü.

Cavad gecəni diri gözlə açdı. İdarənin qabağına da necə gəlib çıxdığından xəbər tutmadı. Qapıdan içəri girmək istəyəndə polis işçisi onu saxlayıb dedi:

- Deputat mətbuat konfransı keçirir. İçəri girmək olmaz.

Cavad bir qədər gözlədi və bir də gördü ki, budur millət vəkili qapıdan çıxdı arxasınca da 15-20 nəfərə yaxın jurnalist.

O, Cavadı görən kimi gülə-gülə:

- Hə cavan oğlan, mən hazır. Hansı qapıya gedirik? ”“ dedi.

Rəhman kişi Cavaddan hər şey gözləyirdi, amma deputatı elçi gətirəcəyini yox. Özünü lap itirmişdi. Bilmirdi nə etsin. Arvada gah çay dəmləməyi, gah da yemək hazır etməyi tapşırırdı. Özü də ayaq üstə dayanmışdı. Sanki nə cür hərəkət etmək lazım olduğunu da bilmirdi. Onu bu çətin vəziyyətdən deputat özü xilas etdi:

- A kişi, gəl bir əyləş. Çay qaçmır haaa.

Rəhman kişi stulu çəkib deputatla üzbəüz əyləşdi. Bir qədər sıxıla-sıxıla qonaqlara xoş gəlmisiz dedi. Deputat əlini əlinə sürtüb sözə başladı:

- Rəhman kişi, yəqin ki siz məni yaxşı tanıyırsız. Mən sizin yaşadığınız rayondan Milli Məclisə millət vəkili seçilmişəm. Seçicilərimin etimadını qazanmaq, onların mənə olan inamını doğrultmaq üçün gecə-gündüz çalışıram. Hər bir vətəndaşın problemi mənim öz problemimdir. Sənin qapını döyməydə də məqsədim məhz problemi olan vətəndaşa kömək etmək məqsədi daşıyır.

Rəhman kişi bu sözlərə cavab olaraq:

- Xoş gəlmisiz, Tarix müəllim. Qapımız həmişə sizin üzünüzə açıqdır. Mən də öz növbəmdə çalışaram sizə əlimdən gələn köməyi edim. Hamımız sizi lap yaxşı tanıyırıq ”“ dedi, lakin “lap” sözünü nahaq işlətdiyini fikirləşdi.

- Hə Rəhman müəllim, mənim bura gəlməkdə əsas məqsədim bizim bu cavan oğlanın arzusunu sizə çatdırmaqdır. O, sizin qızınızla ailə həyatı qurmaq istəyir. Necə deyərlər bir qız bir oğlanındı. Biz də ağsaqqal kimi gərək bu işə xeyir-dua verək. Mən hər adam üçün elçiliyə getmərəm, kiməsə ağız açmaram. Lakin bizim Caaaa... (oğlanın adını xatırlaya bilmir) cavan oğlanın xətrini çox istəyirəm. Mən onu uşaqlıqdan tanıyıram. Rəhmətlik atası ilə yaxın dost olmuşuq. . .

Bu sözdən sonra Rəhman kişi özünü itirdi. 2 həftə bundan qabaq Cavadın atası elçiliyə gəlmişdi. Nə vaxt rəhmətə gedib? Deputat isə hələ də davam edirdi.

- Özü də çox istiqanlı, bacarıqlı oğlandı. Həm də ailəcanlıdır. İki universitet bitirib. Bir neçə xarici dil bilir. Şəxsən mənim göstərişimlə ölkəmizi xarici ölkələrdə layiqincə təmsil edib. Ölkəmizin qazandığı uğurlarda onun da payı var. İctimai fəaldır. Mənim bir gözüm, bir əlim daim onun üstündədir. İnsafən o da heç vaxt məni məyus etməyib. Hal-hazırda neft şirkətlərinin birində aparıcı mütəxəssisdir. Yəqin ki, bir-iki aya vəzifəsini daha da artıracaqlar. Belə bacarıqlı işçilərə hamının böyük ehtiyacı var. Mən inanıram ki, sizin qızınızla ailə qurduqdan sonra vətən və dövlət qarşısındakı xidmətləri daha da artacaq. Respublikamızın inkişafı, dövlətimizin uğurlu daxili və xarici siyasəti nəticəsində. . .

Cavad çətinliklə də olsa başını qaldırıb Rəhman kişinin üzünə baxdı. Sevincin atası qıpqırmızı qızarmışdı. Lakin Cavad başa düşə bilmədi ki, Rəhman kişi əsəbdən belə hala düşüb, yoxsa deputatın danışdığı ağ yalanlardan utanır. Amma bir şeyi yaxşı bilirdi ki, millət vəkili cənab Tarix müəllimi bura gətirməklə bağışlanılmaz səhvə yol vermişdir. Deputat isə hələ də çıxış edirdi. . .

Orxan İsayev