Çin Haniyənin qətli və Yaxın Şərqdə müharibə ilə bağlı öz mövqeyini açıqlayıb

 

Dünən Çin xarici işlər naziri Van İ və İranın XİN rəhbərinin vəzifələrini icra edən Əli Baqeri arasında telefon danışığı baş tutub.

 

Moderator.az xəbər verir ki, bu barədə ÇXR hökumətinin rəsmi "Sinxua" agentliyi məlumat yayıb.

 

Məlumatda deyilir ki, söhbət zamanı məmurlar ikitərəfli münasibətlər və Yaxın Şərqdə vəziyyəti müzakirə edib.

 

Van İ qeyd edib ki, İran regionda mühüm təsirə malik ölkədir, habelə Çinin hərtərəfli strateji tərəfdaşıdır. O, xatırladıb ki, Pekin həmişə Tehranla münasibətlərini strateji və uzunmüddətli nöqteyi-nəzərdən inkişaf etdirib. 

 

"Çin İranın yeni hökuməti ilə hər iki tərəfin əsas maraqlarına aid olan məsələlərdə qarşılıqlı dəstək göstərmək, müxtəlif sahələrdə praktiki əməkdaşlığı dönmədən irəliyə aparmaq, ikitərəfli münasibətlərin sağlam inkişafına durmadan kömək etmək və Çinlə İran arasında hərtərəfli strateji tərəfdaşlığa yeni məzmun vermək üçün işləməyə hazırdır", - Van İ deyib.

 

O, İran hakimiyyətinə Çin tərəfindən Şanxay Əməkdaşlıq Təşkilatının sədri kimi apardığı tədbirlərdə fəal iştirak etməyə çağırış edib. 

 

Bundan başqa, Çin İranla BRIKS çərçivəsində əməkdaşlığı möhkəmləndirməyə, bununla da qlobal Cənubun səsini və təsirini gücləndirməyə, habelə beynəlxalq idarəçiliyin daha ədalətli və ağıllı inkişafına dəstək verməyə hazırdır.

 

Öz növbəsində Əli Baqeri Kani ÇXR sədri Si Tszinpinə İran prezidenti Məsud Pezeşkianın andiçmə mərasimində Pekinin xüsusi elçisinin iştirakına görə minnətdarlığını bildirib. 

 

Kani əmin edib ki, prezident Pezeşkian İran-Çin münasibətlərinin inkişafına və ikitərəfli münasibətlərin beynəlxalq və regional vəziyyətdə baş verən dəyişikliklərdən asılı olmamasını təmin etməyə sadiqdir.

 

Kaninin sözlərinə görə, İran Çinlə beynəlxalq və regional işlərdə koordinasiyanı gücləndirməyə və ikitərəfli əlaqələrə daha çox strateji məna verməyə hazırdır.

 

Daha sonra Kani Çin məmurunu HƏMAS Siyasi Bürosunun rəhbəri İsmayıl Haniyənin qətli və

regionda yaranmış vəziyyətlə bağlı Tehranın baxışları barədə məlumatlandırıb.

 

O, vurğulayıb ki, İran milli suverenliyini,  təhlükəsizliyini və ərazi bütövlüyünü qorumaqda qətiyyətlidir, eyni zamanda regionda təhlükəsizliyin və sabitliyin saxlanılmasına can atır.

 

Kani Fələstin-İsrail münaqişəsində Çinin ədalətli mövqeyinə görə minnətdarlıq edib və ümid etdiyini vurğulayıb ki, Çin Yaxın Şərqdə vəziyyətin yumşaldılmasında və təhlükəsizliyin təmin olunmasında daha da fəal rol oynayacaq.

 

Van İ vurğulayıb ki, Çin həmişə Yaxın Şərqdə ədaləti və qərəzsizliyi müdafiə edir və bütün tərəflərə qanuni hüquqları və maraqlarının müdafiə edilməsində dəstək verir. Lakin, onun sözlərinə görə, Pekin Fələstinə öz qanuni milli hüquqlarının müdafiəsində xüsusilə dəstək verir.

 

"Çin qətiyyətlə bu qətlə qarşı çıxır və onu qətiyyətlə pisləyir, bunun beynəlxalq münasibətlərin əsas normalarını pozduğunu, İranın suverenliyi, təhlükəsizliyi və ləyaqətinə xələl gətirdiyini, Qəzza bölgəsində atəşkəslə bağlı danışıqlar prosesini, bütövlükdə regionda sülh və sabitliyi sarsıtdığını hesab edir", - Van İ əlavə edib.

 

O, vurğulayıb ki, münaqişənin bütün tərəfləri BMT Təhlüləkəsizlik Şurasının müvafiq qətnamələrini vicdanla icra etməli, bununla da Qəzza bölgəsində daimi atəşkəsın tezliklə gerçəkləşməsi üçün şərait yaratmalıdır.

 

"Çin İranın suverenliyi, təhlükəsizliyi və milli ləyaqətinin müdafiəsində, regional sülh və sabitliyin qorunub saxlanılmasında onun səylərini dəstəkləyir,  İranla sıx əlaqələri inkişaf etdirməyə hazırdır", - Van İ bəyan edib.