Türkiyə prezidenti Rəcəb Tayyib Ərdoğan Ukrayna lideri Vladimir Zelenskiyə və Rusiya prezidenti Vladimir Putini Ankarada Ukrayna ilə Rusiya arasında ixtilafların nizama salınması ilə bağlı danışıqlar aparmağı təklif edib.

 

Moderator.az xəbər verir ki, Türkiyə liderinin mövqeyini onun nümayəndəsi İbrahim Kalın şərh edib və əlavə edib ki, bir neçə həftədən sonra Ərdoğan Ukraynaya səfər edərək, Zelenski ilə görüşmək niyyətindədir. Bu barədə Haber Turk qəzeti məlumat verib.

 

Mətbuat katibi qeyd edib ki, Rusiya Federasiyasının Ukrayna dövlətinə qarşı hərbi təcavüzünün nəticələri geriyədönməz olacaq və böyük fəlakətlərə gətirib çıxaracaq, onun ölkəsi isə bu problemin həllində istənilən rolu oynamağa hazırdır.

 

Ərdoğanın nümayəndəsi Circle Foundation analitik mərkəzi tərəfindən Rusiya və Ukrayna arasında münasibətlərin gərginliyinin Avropa və NATO-ya mümkün təsiri barədə təşkil etdyi on-line paneldə çıxışı edib. O, qeyd edib ki, bu məsələ artıq bir müddətdir ki, gündəmdədir, gərginlik böyük risklər törədə bilər, ona görə də Türkiyə hadisələrin inkişafını böyük həyəcanla izləyir.

 

"Biz Rusiya ilə Ukrayna arasında hər hansı hərbi əməliyyatların, münaqişənin və ya müharibənin olmasını istəmirik. Biz Ukraynanın ərazi bütövlüyünü, siyasi suverenliyini və sosial bütövlüyünü dəstəkləyirik", - Kalın vurğulayıb və "hər iki tərəfi təmkinli olmağa" və hərtərəfli dialoqa çağırıb.

 

Ankaranın problemin həlli üçün axtarış səylərinə istinad edərək, o, bəyan edib ki, Ərdoğan ukraynalı və rusiyalı həmkarları ilə danışıb və onları Türkiyəyə dəvət edib.

 

"Əgər onlar problemlərin və ixtilafların həlli üçün görüşmək istəsələr, Türkiyə Rusiya və Ukrayna arasında gərginliyin azaldılması üçün istənilən rolu oynamağa hazırdır.  Biz bunu NATO-nun dostu və müttəfiqi kimi edirik", - Türkiyə prezidentinin mətbuat katibi onun sözlərindən iqtibas gətirib.

 

"Eyni zamanda biz ciddi və geriyədönməz nəticələrə gətirib çıxara biləcək istənilən hərbi hərəkətlərdən qaçmaq üçün rusiyalılarla sıx təmasda olacağıq", - Kalın əlavə edib.

 

Öz növbəsində Türkiyə lideri Rusiya Federasiyasının Ukrayna ərazisinə genişmiqyaslı müdaxilə ssenarisinin baş tutacağını az ehtimal olunan adlandırıb. Öz mövqeyini Ərdoğan onunla izah edib ki, Ukrayna Kremldən asılı olmadıqlarını bəyan edən digər balaca ölkələrdən fərqlənir.

 

"Mən Rusiyanın Ukraynaya müdaxiləsini realist yanaşma hesab etmirəm. Ona görə ki, Ukrayna sıradan bir ölkə deyil. Ukrayna güclü ölkədir", - o, bəyan edib və qeyd edib ki, siyasətdə müharibədən istifadə edilməməlidir. Lakin o, vurğulayıb ki, kimsə dəlillər əvəzinə torpaqları işğal etməklə hədə-qorxu gələrsə, alınmayacaq. Türkiyə prezidenti hesab edir ki, bu məsələ ilə əlaqədar Rusiya prezidenti ilə danışmaq lazımdır.

 

Əvvəllər məlumat verilib ki, ABŞ rus ordusunun Ukrayna ərazisinə müdaxilə edəcəyi təqdirdə bu ölkəyə öldürücü silah verməyə hazırdır. Senator Riçard Blümentalın fikrinə görə, Rusiya rəhbərliyi qonşu ölkəyə qarşı təcavüz edərək böyük səhvə yol verəcək və bunun bədəli çox ağır olacaq.