TikTok-un həyata keçirdiyi Beynəlxalq Kitabsevərlər Gününə həsr olunmuş #booktokazerbaijan kitab təşəbbüsünə qoşulanların sayı artmaqda davam edir. Artıq bu həştəq ilə paylaşılan videoların izlənmə sayı 5 milyona çatdır. Bu virtual ədəbiyyat bayramında iştirak edənlər arasında bir sıra məşhurlar da var. Sevilən müğənnilərin tövsiyə etdikləri kitablara birlikdə nəzər salaq.

 

Ölkəmizi "Eurovison 2018" musiqi yarışmasında təmsil etmiş müğənni @dilarakazim izləyicilərinə Qreqoriy Stkoun "The book of questions" kitabını oxumağı tövsiyə edir. Bu kitab münasibətləri dərinləşdirmək üçün bir vasitədir, ailəvi nahar süfrəsi üçün canlı söhbət başlanğıcı, avtomobildə vaxt keçirməyin əyləncəli yoludur. "The book of questions" kitabı insanları ən maraqlı mövzuları araşdırmağa dəvət edən 300-dən çox sual təqdim edir. Suallara cavab axtararkən yeni baxış bucaqları qazanacaqsınız.

 

Tanınmış kamança ifaçısı @shahriyar_musayevin tövsiyə etdiyi Varlı ata, kasıb ata kitabı şəxsi inkişafla maraqlanan bir çox kitabsevərlərə yaxşı tanışdır. Bu janırın ən çox satılan kitablarından olan Robert Kiosaki və Şeron Lektorun birlikdə yazdığı bu əsər insanlara müasir həyatda yüksək rifah içində yaşamağın yollarını, varlanmağın sirlərini öyrədir. Müəlliflər öz təcrübələrini bölüşür, qanunları pozmadan necə var-dövlət qazanmağın mümkünlüyünü təhlil edirlər. Öz həyatını firavanlıq içərisində keçirmək, var-dövlət toplamaq istəyərsinizsə, bu kitaba nəzər salın.

 

Sevilən şoumen və müğənni @muradarifin tövsiyə etdiyi kitablar arasında isə XX əsrin ən məşhur romanlarından olan "Master və Marqarita" var. "Master və Marqarita" rus ədəbiyyatında o zamana kimi görünməmiş misilsiz, qeyri-adi bir hadisəsi, Qoqol satirası ilə Dante poeziyasının, gülüşlə lirikanın mükəmməl qarışığıdır. Bulqakov "Master və Marqarita"nı yaşadığı dövr və insanlar haqqında tarixi və psixoloji həqiqət kimi qələmə almış, məhz ona görə də roman dövrün bir növ unikal bədii sənədinə çevirilmişdir. Yazıçının sehirli dünyasının bir parçası olmaq, keçmişə körpü qurmaq istəyirsinizsə, bu romana şans verə bilərsiniz.

 

Özünəməxsus tərzi ilə seçilən @rilayahuseynzadehnin tövsiyə etdiyi İrvin Şaunun "Lucy Crown" romanı oxuculara psixi sağlamlıq problemləri ilə mübarizə apararkən insanların qarşılaşdıqları mübarizələr haqqında düşündürücü bir araşdırma təqdim edir. Roman boyu İrvin Şou ruhi xəstəliklərlə üzləşən fərdlərin qarşılaşdıqları çətinlikləri, həmçinin onların ailələrinə və yaxınlarına təsirini məharətlə üzə çıxarır. Psixoloji fantastika janrı həvəskarları bu romanı oxuyacaqları kitablar siyahısına əlavə edə bilərlər.

 

#BookTok bütün dünyada milyonlarla insanı birləşdirən qlobal fenomendir: hazırda həştəqin 167 milyarddan çox baxışı var. Kitabsevərlərin bu onlayn icması daxilində insanlar sevimli kitablarını paylaşır və bir-birlərinə tövsiyələr verirlər. BookTok nəşriyyat biznesinə də təsir edib: TikTok-da populyarlıq qazandıqdan sonra satışı artan çoxsaylı kitab nümunələri var.

 

 

TikTok - qısa videoların hazırlanması üçün aparıcı tətbiqdir. Missiyamız insanları yaradıcı olmağa ruhlandırmaq və onlara sevinc bəxş etməkdir.