Moderator.az-a müraciət edən Saatlı Rayon Mollavazili kənd sakini Əliyev Zaur Məhərrəm oğlu üzləşdiyi  haqsızlıqdan şikayətlənərək narahatçılığını dilə gətirib. 

Şikayətçi Zaur Məhərrəmov deyir ki, 1993- ildə hərbi xidmətə gedib. 1994- cü ildə Ağdam rayonunda erməni işğalçılarına qarşı gedən döyüşlərdə ayaq nahiyəsindən qəlpə yarası alıb və bunun nəticəsi olaraq görmə qabiliyyəti də zəifləyib, hazırda 2-ci qrup əlildir. İş qabiliyyətini demək olar ki, tamamilə itirib. İki azyaşlı uşağı olmaqla 4 nəfərdən ibarət ailə üzvü əlilliyə görə aldığı cəmi 180 manatın ümidinə qalıb. Heç bir yerdən köməyi yoxdur. Rayonun səlahiyyət sahiblərinin hansının yanına gedibsə qapını üzünə çırpıblar. Həyat yoldaşının ali təsilli müəllimə olduğunu bildirən Zakir Əliyev deyir ki, həyat yoldaşım Günel Əliyeva Təfəkkür Univeristetinin Filologiya fakultəsinin Azərbaycan dili və Ədəbiyyatı üzrə bakalavr dərəcəsi alıb. Ailə qurmamışdan əvvəl rayonun Əhmədbəyli kənd məktəbində laborant və dərnək rəhbəri vəzifəsində işləyib. Halbuki, ali təhsilli olduğu halda ailə həyatı qurduqdan sonra rayon təhsil şöbəsinin müdiri Şamil Nurəliyev özbaşına olaraq heç bir xəbərdarlıq etmədən, sorğu-sualsız onu işdən çıxarıb yerinə isə təhsili olmayan savadsız bir şəxsi təyin edib:

“Əlbəttə ki, 1000 manat pulun müqabilində. Həyat yoldaşımın işə bərpa olması üçün çox çalışdım, rayon icra hakimiyyətinin başçısı Siraqəddin Cabbarovun qəbuluna düşmək istədim, ancaq dedilər ki, başçının rayon sakinlərinə qarşı allergiyası var. Ətrafındakılardan, idarə müdirlərindən və pullu iş adamlarından başqa heç kimi görmək istəmir. Humanitar məsələlər üzrə müavini Reyhan Ocaqova ilə görüşdüm, bircə kəlmə mənə cavabı o oldu ki, boş yer yoxdur. Doğrusu, Reyhan xanımdan yaxşı heç nə gözləmirdim. Çünki onlara pulu olan savadsız, yaltaq kadrlar lazımdır. Necə ki, rayon təhsilini kolxoz bazarına çevirən Təhsil Şöbəsinin müdiri Şamil Nurəliyev kimi, məktəb direktorlarının demək olar ki, hamısını faizə otuzdurub. Müəllim işləmək üçün bunun qiyməti 1000 manatdır, əlavə dərs saatı almaq isə 5000 manat. Daha baxılmır ki, haranı qurtarıb, pedaqoji təhsili, təcrübəsi var, ya yox. Mənim də ki, pulum yoxdur. Məni ağrıdan odur ki, bu gün məktəb tikintilərini təhsilin inkişafı kimi ictimaiyyətə sırıyırlar. Əgər mənim həyat yoldaşım kimi ali təhsilli savadlı, sözünü deyə bilən, pedaqoji təcrübəsi olan  kadrlar qanunsuz olaraq işdən çıxarılırsa o halda çölü bəzək içi təzək olan məktəblər kimə lazımdır? 

Redaksiyadan: Biz problemi təhsil naziri cənab Mikayıl Cabbarovun diqqətinə çatdırırıq. Ümid edirik ki, hörmətli nazir problemin həlli istiqamətində müvafiq tapşırıqlarını verəcək və şikayət məktubunda iddia olunan rüşvət və korrupsiya hallarının, qanunsuz işə götürülmə ilə bağlı faktların ifşa olunmasına yardımçı olacaq.

                                                                                                                                                                       Tural