Xəbər verdiyimiz şair Nüsrət Kəsəmənlinin oğlu Rəşad Kəsəmənli saytımıza açıqlaması zamanı atası, Sabir Rüstəmxanlı və Çingiz Əlioğlunun Cıdır düzündə bir daşın üzərinə adlarını yazdıqlarını bildirib. O, deyib ki, bir gün Cıdır düzündə o daşın ziyarətinə gedəcəklər. 

 

Moderator.az-ın əməkdaşı məsələylə bağlı Xalq şairi, millət vəkili Sabir Rüstəmxanlı ilə əlaqə saxlayıb. S.Rüstəmxanlı bunu təsdiqləyib və bildirib ki, adlarını 1987-ci ildə Cıdır düzündə bir daşın üzərinə yazıblar:

 

“Şuşaya iki dəfə getmişəm və hava çox dumanlı idi deyə daşı görə bilmədim. O yazını daşa 1987-ci ildə maşın boyasıyla yazmışdıq, bu çətin silinir. İkinci dəfə Şuşaya gedəndə hava duman idi, Cıdır düzündə çox aşağılara enmədik və heç ensəm də heç nə görünməzdi. Amma Şuşaya birinci səfərim zamanı mən elə o arzuyla getdim ki, daşa baxım. Gəlib o daşların qırağına endim, amma gərək bir az aşağı düşəydim. Onda da şəhərdə geydiyim ayaqqabıyla idim, o ayaqqabıyla risk edib aşağı düşmək çətin idi. Həm də orda bizə tapşırmışdlar ki, təhlükəsizlik tədbirlərinə riayət edək. O daşa gedən cığırı tapdım, amma daşa tərəf enmədim. Heç enmək də istəmədim, çünki gedib görəcəkdim ki, o adlar silinib və bunu görmək mənim üçün ağır olacaqdı. Ona görə elə yaxşısı budur ki, yazılar xəyalımdakı kimi yaşasın. 

 

Biz 1987-ci ildə Bərdəyə getmişdik və ordan da Şuşaya getdik. Cıdır düzündə gördüm ki, dostlarım Nüsrət və Çingiz adlarını daşa yazıblar. Sonra mən də onlara baxıb qəsdən həm kiril, həm indiki, həm də ərəb əlifbasıyla ad soyadımı daşa yazdım. Dedim ki, sizdən fərqli olaraq belə yazıram ki, adımı  həm də dünya azərbaycanlıları da oxusunlar”.