Prezident İlham Əliyevin Naxçıvan Muxtar Respublikasına sayca 15-ci səfəri də bir sıra mühüm məqamlarla yadda qaldı. Bu səfərin ən əhəmiyyətli tərəfi o idi ki, dövlət başçısı may ayının 10-da – ulu öndər Heydər Əliyevin doğum günündə Naxçıvan getmişdi. Ölkə rəhbəri bunun əhəmiyyətini belə izah etdi: “Tarixi Zəfərdən sonra bu, atamın birinci doğum günüdür. Ona görə mən hesab etdim ki, ənənəvi olaraq onun məzarını ziyarət edəndən sonra onun Vətəninə – Naxçıvana gəlim. Hesab edirəm ki, bu səfərin çox böyük rəmzi mənası var. Qeyd etdiyim kimi mən 15-ci dəfədir ki, Naxçıvana gəlirəm. Amma ilk dəfə mayın 10-da Naxçıvandayam. Bu doğum günündə mütləq burada olmalıydım”.

 

Prezident İlham Əliyev ulu öndərin yolunu davam etdirir, Onun vəsiyyətlərini bir-bir yerinə yetirir. Əminik ki, əgər ümummilli liderimiz sağ olsaydı, O da tarixi Zəfərdən sonra ilk doğum gününü bütün uğurlarımızın təməlini qoyduğu Naxçıvanda keçirəcəkdi. 

 

Ölkə rəhbərinin Naxçıvana növbəti səfərində də muxtar respublika üçün mühüm əhəmiyyətli obyektlərin açılışı oldu. Naxçıvanın təhlükəsizliyi üçün həyati əhəmiyyət daşıyan hərbi aerodromun istifadəyə verilməsi xüsusilə diqqəti cəlb edir.  Təsadüfi deyil ki, dövlət başçısı hərbi aerodromun açılmasının Naxçıvan Muxtar Respublikasının təhlükəsizliyinin təmin edilməsində xüsusi yer tutduğunu bildirdi. Nəzərə alsaq ki, Naxçıvanla Ermənistanın paytaxtı İrəvan şəhəri arasındakı hava məsafəsi heç 100 kilometr deyil, bu hərbi aerodromun nə qədər böyük uzaqgörənlilə yaradıldığı aydın olur. Naxçıvanda hərbi aeorodromun məhz bu ərəfədə istifadəyə verilməsi, orada qırıcı aviasiya vasitələrinin yerləşdirilməsi həm muxtar respublikanın təhlükəsizliyi baxımından önəmlidir, həm də Ermənistandakı revaşist qüvvələrə ciddi xəbərdarlıqdır. Prezident İlham Əliyevin hərbi aerodromun açılışından sonra Azərbaycan Televiziyasına müsahibəsində Naxçıvandakı Əlahiddə Ümumqoşun Ordusunun gücündən, peşəkarlığından, ən müasir silah və hərbi texnika ilə təmin edilməsindən danışması,  Naxçıvan ordusunda olan hərbi texnikanın bəzi qabaqcıl ölkələrdə olan texnikadan üstün olduğunu vurğulaması həmin revanş arzuları ilə yaşayanların xəyallarının boş bəyanatlardan o tərəfə keçməyəcəyindən xəbər verir. Ancaq dövlət başçısı Azərbaycanın hərbi gücünü hələ də anlamaq istəməyənlərə, dəmir yumruğunun zərbələrindən sonra ağıllanmayanlara bir daha xatırlatdı ki: “Əgər onlar bu bəyanatlardan hansısa praktiki əməllərə keçsələr, dərhal məhv olunacaqlar. Heç kim onları müdafiə edə bilməz. Heç kimə də bel bağlamasınlar. Onlar uzun illər dırnaqarası “müzəffər və güclü” ordusu ilə öyünürdülər. Ermənistanda nə güc var, nə iradə var, nə hər hansı bir mənəvi haqq var ki, revanşist fikirlərlə yaşasın. Bu, onlar üçün özünəqəsddir... Biz hələ ki, təmkin göstəririk. Amma odla oynamasınlar. Onlar bizim yumruğumuzu görüblər. Bu yumruq yerindədir”.

 

Dağlıq Qarabağ münaqişəsi həll edilib, Azərbaycanın ərazi bütövlüyü təmin olunub. Azərbaycan 10 noyabr tarixli Bəyanatın müddəalarənı yerinə yetirir. Əgər Ermənistandakı revanşist qüvvələr bu Bəyanata məhəl qoymayıb hücuma cəhd etsələr, bu, Azərbaycanın ərazi bütövlüyünün pozulması kimi qiymətləndiriləcək və onlara ilk zərbə elə Naxçıvandan endiriləcək.  Naxçıvanın hərbi aerodromundakı aviasiya texnikalarına cəmi 20 dəqiqə vaxt lazımdır ki, Ermənistanı darmadağın etsinlər.

Prezident İlham Əliyevin sonuncu Naxçıvan səfərində tanış olduğu mühüm obyektlərdən biri də  Ordubad dəmir yolu stansiyasıdır. Bu, həmin stansiyadır ki, Zəngəzur dəhlizinin istifadəyə verilməsindən sonra Naxçıvan ərazisindən keçəcək qatarların dayanacaqlarından biri olacaq. Bu stansiya Zəngəzur dəhlizinin Naxçıvan tərəfdən başlanğıcının yaxınlığında yerləşir. Prezident İlham Əliyevin Ordubad rayonuna getməsi, Zəngəzur dəhlizinin bir addımlığında səsləndirdiyi fikirlər Onun budəfəki Naxçıvan səfərinin mühüm məqamlarından biridir. 

 

“Mən təsadüfən Ordubad dəmir yolu stansiyası ilə tanışlığa gəlməmişəm” deyən dövlət başçısı bu rayona səfərinin əhəmiyyətini özü belə izah etdi: “Bu yaxınlarda buradan təqribən 50-60 kilometr uzaqlıqda yerləşən Mincivan qəsəbəsinin ermənilər tərəfindən dağıdılmış dəmir yolu stansiyasında baxış keçirdim. Orada dəmir yolu mövcud deyil. Mənfur düşmən bütün dəmir yolu infrastrukturunu dağıdıbdır, talan edibdir. Orada bir mərkəz olacaq, burada bir mərkəz olacaq. Zəngilanı Naxçıvanla ayıran cəmi 40 kilometrlik Zəngəzur dəhlizidir, hansı ki, açılmalıdır və açılacaqdır”.

Dövlət başçısının bu kəskin bəyanatı Zəngəzur dəhlizi ilə bağlı şübhəsi olanların fikirlərinin üstündən qalın bir xətt çəkdi. Prezident bildirdi ki, Şərqi Zəngəzur bölgəsində yerləşən Zəngilanı bizim qədim torpağımız olan Qərbi Zəngəzurla, ondan sonra Ordubad vasitəsilə Naxçıvanla və Türkiyə ilə birləşdirmək bizim növbəti tarixi nailiyyətimiz olacaq: “Əminəm ki, bu, olacaqdır, məndə heç bir şübhə yoxdur. Bir daha demək istəyirəm ki, Azərbaycan öz üzərinə düşən vəzifələri icra edəcək və əlindən gələni edəcək ki, bu layihənin həyata keçirilməsində heç bir problem olmasın”.

Prezident İlham Əliyevin muxtar respublikaya səfəri zamanı Naxçıvan şəhər qəbiristanlığında Vətən müharibəsi şəhidlərinin məzarlarını ziyarət etməsi Onun şəhidlərimizin əziz xatirəsinə böyük ehtiramla yanaşmasının nəticəsidir. Bu, 44 günlük müharibədə misilsiz qəhrəmanlıq və fədakarlıq nümunəsi göstərən Naxçıvanın igid oğullarının valideynlərinə, bütövlükdə, muxtar respublika sakinlərinə dövlətimizin ən ali səviyyədə təşəkkürü idi. Vətən müharibəsi başlayan kimi Naxçıvanın qəhrəman övladları da torpaqlarımızın işğaldan azad olunması üçün müqəddəs savaşa atılıblar, şəhidlər veriblər. Naxçıvandakı Əlahiddə Ümumqoşun Ordunun xüsusi təyinatlıları zəfər yolunu Şuşada tamamlayaraq “dəmir yumruğ”un parlaq qələbəsinin təmin edilməsində müstəsna qəhrəmanlıq göstəriblər. Bu, Vətəni sevmək nümunəsi idi.

 

Nəhayət. Prezident İlham Əliyev ulu öndərin doğum günündə Naxçıvana səfər etməklə daha bir ciddi mesaj verdi. Dövlətimizin başçısı hər kəsə dedi ki, ümummilli lider Naxçıvanı necə qoruyubsa, mən də elə qoruyacağam. Azərbaycan Televiziyasına müsahibəsində Naxçıvanın çətin günlərindən danışan dövlət başçısı bildirdi ki, “Ulu öndərin qətiyyəti, cəsarəti, siyasi müdrikliyi, naxçıvanlıların fədakarlığı ermənilərin və AXC-Müsavat cütlüyünün planlarını alt-üst etmişdir və Naxçıvanı Heydər Əliyev qorumuşdur, necə ki, ondan sonra Azərbaycanı böyük bəlalardan qoruya bildi”. 

 

“Bu gün burada olmağımın xüsusi rəmzi mənası var. Naxçıvan bizim əziz diyarımızdır, Heydər Əliyevin Vətənidir. Hər bir azərbaycanlı üçün əziz, doğma diyardır və Naxçıvanın inkişafı, çiçəklənməsi artıq reallıqdır. Bu reallığı biz özümüz yaratmışıq”.

 

Bu artıq dövlət başçısı tərəfindən Naxçıvana və naxçıvanlılara göstərilən diqqət, onların ölkəmizin inkişafındakı xidmətlərinin yüksək qiymətləndirilməsidir. 

 

Naxçıvanın Azərbaycanın dövlətçilik tarixində mühüm yeri var. Muxtar respublika dövlət müstəqilliyimizin qazanılmasına, ölkəmizin inkişafına böyük töhfələr verib. Naxçıvanlıların Vətən müharibəsindəki  qəhrəmanlığı da bu fədakarlığın davamı idi. Əslən Naxçıvandan olan bir neçə yaramaz məmur bütöv bir bölgənin imicinə, xidmətlərinə xələl gətirə bilməz. Dövlət başçısının Naxçıvana 10 may səfəri, düşünürəm ki, bəzi qaranlıq məqamlara aydınlıq gətirdi. Naxçıvandan çıxan və orada yaşayanlar müstəqilliyimizin qorunması, Heydər Əliyev yolunun davam etdirilməsi, Prezident İlham Əliyevə sədaqətlə xidmət missiyasını bundan sonra da davam etdirəcəklər. Prezident İlham Əliyevin diqqət və qayğısı sayəsində muxtar respublıkanı daha xoş günlər gözləyir.