Sizə belə yazılı qaydada rəsmi müraciət etməkdə əsas məqsədim 13 yaşlı övladım Məmmədova İntizar Rəşad qızının həyatda qalıb yaşamasına köməklik göstərməyinizi xahiş etməkdir. Siz xalqımızın ümid, pənah yerisiniz. Alicənablığınız, xeyirxahlığınız, nəcibliyiniz, mərdliyiniz, mərhəmətinizlə hamımızın qəlbində özünüzə böyük sevgi, hörmət və rəğbət yaratmısınız. Elə mən də övladımın həyatı böyük təhlükə altında olan bir ana və bir Azərbaycan qadın kimi Sizə - ürəyinin böyüklüyünə, mərhəmətinə dərindən inandığım Mehriban xanıma müraciət edirəm. İnanıram ki, Siz xəstə övladına görə çox çətin və çıxılmaz vəziyyətə düşmüş bir ananın yalvarış dolu ürəkparçalayan bu müraciətinə müsbət cavab verəcəksiniz. 

Yazıb Sizə bildirirəm ki, mən Məmmədov Rəşad Murad oğlu ilə rəsmi nikah əsasında ailə həyatı qurmuşam. Bu nikahdan İntizar Məmmədova adlı yeganə qız övladımız var. Həyat yoldaşım əsəb xəstəliyindən əziyyət çəkir, heç bir yerdə işləmir. Özüm də işsizəm. Bu günlərdə Səhiyyə Nazirliyinin B. Eyvazov adına Elmi-Tədqiqat Hematologiya və Qanköçürmə İnstitutunda qızımız İntizar Məmmədovada ağır xərçəng xəstəliyi olduğu aşkar edildi. Həkimlərin rəylərinə görə, qızımızın tam müalicə olunaraq həyatda qalıb yaşaması yalnız xarici ölkələrin birində lazımi müayinə və müalicə keçdikdən sonra mümkündür. Əkshalda onun həyatda qalma şansı yoxdur. Biz hazırda çox çətin, mürəkkəb və böhranlı bir vəziyyətdəyik. Ailəmizin maddi imkanı qızımızın xaricdə müayinə və müalicə olunmasına əsla imkan vermir. Hörmətli Mehriban xanım Əliyeva! Biz həmişə Sizin aztəminatlı ailələrə, məcburi köçkün və qaçqın, şəhid ailələrinə, Qarabağ müharibəsi veteranlarına, valideyn himayəsindən məhrum olmuş uşaqlara, eləcə də müxtəlif ağır xəstəliklərdən əziyyət çəkən sadə insanlara, yaradıcı şəxslərə, ziyalılara qayğı və diqqət göstərməyiniz, onların problemlərinin həllinə, həmçinin müayinə və müalicə olunmalarına yüksək səviyyədə dəstək verməyiniz barədə müntəzəm olaraq məlumat alırıq. Mənim 13 yaşlı qız övladım İntizar Məmmədova da ağır xərçəng xəstəsidir. Mən yeganə qızımın həyatda qalıb yaşamasını istəyirəm. Buna görə də mən ürəyi parçalanmış, gözləri yaşlı vəziyyətdə Sizdən qızıma köməklik göstərməyinizi xahiş edirəm. Nəzərinizə çatdırmaq istəyrəm ki, martın 17-də Sizə rəsmi qaydada ərizə ünvanlamışam. Siz yəqin ki, həm də bir ana və bir qadın kimi mənim vəziyyətimin necə çətin, acınacaqlı və faciəli olduğunu başa düşərsiniz. Hörmətli Mehriban xanım Əliyeva! Bizim bu çətin və faciəli günlərimizdə yeganə ümid, pənah yerimiz Sizsiniz. Mən Sizdən bir ana və bir qadın kimi imdad diləyir, kömək istəyirəm. İnanıram ki, Siz milli adət-ənənələrimizə, mənəvi-əxlaqi dəyərlərimizə sıx bağlı olan bir insan, bir qadın və millətsevər, vətənpərvər bir dövlət xadimi kimi həyatı təhlükə altında olan qızım İntizar Məmmədovanın həyatda yaşayaraq cəmiyyətimiz, ölkəmiz üçün layiqli vətəndaş kimi yetişməsi üçün bizə kömək edəcəksiniz. Hörmətli Mehriban xanım, qızımın həyatı Sizin əlinizdədir. Xahiş edirəm kömək edin!