Moderator.az-ın poçtuna Şəki sakini Əsgərov Əsgər Mustafa oğlu tərəfindən Prezident İlham Əliyevə ünvanlanmış  şikayət məktubu daxil olub. Məktubunda Ə.Əsgərov Melorasiya və Su Təsəsrrüfatı  ASC-yə məxsus külli miqdarda əmlakların oğurlanması və talan edilməsindən şikayət edir.       

Məktubu olduğu kimi diqqətinizə çatdırırıq:     

                        

“Biz uzun müddətdir ki, yaşadığımız Baş Göynük kəndinə məxsus və bizə pay verilmiş torpaq sahələrində işləyib ailəmizi dolandırmaqla məşğuluq. Təsərrüfatımız Şəki-Qax dəmiryolu xəttinin altından Əyriçay dəryaçasına qədər uzanan bir sahədə yerləşir. Əvvəllər tütünçülüklə məşğul olardıq. Hazırda şəxsi təssərrüfatla-maldarlıqla, dirrik-tərəvəz yetişdirməklə məşğuluq.

Dəmiryolu xəttinin altında böyük bir hovuz tikilmişdi ki, həmin hovuzdan da həm İnçə istiqamətində, həm də Qax rayonu sərhəddinə qədər olan ərazilərin suvarılması, bataqlıqların qurudulması və s. istifadə olunsun. Su işlərinin görülməsi üçün diametri 300 və 400 mm, uzunluğu 5 m olan azbest, sink və beton borulardan istifadə edilməklə 14 km uzunluğunda, hər birinin eni 100 m olmaqla 20 sırada 1984-1985-ci illərdə çəkilmiş əsas boru xətlərinin cəmi uzunluğu 300 km -ə yaxın idi. Hələ bu boru xətlərinə birləşmiş əlavə xətlər nəzərə alınmır. Bütün bu boru xətləri kimlərinsə göstərişləri əsasında 5-6 il əvvəl  günün günorta çağında torpaqların altından texnikanın köməyilə çıxarıldı. Böyük hissəsi (bu sahədə iş görən mənbənin dediyinə görə) Zaqatala rayonundakı anbara daşındı. Sonradan məlum oldu ki, bir sıra iş adamları bu boruları öz pulları ilə alıb təsərrüfat qurublar. Lakin dövlət idarəsinə məxsus olan belə boruların bazarda heç vaxt satışı olmayıb və indi də yoxdur. O vaxtdan onlarla kənd ərazisini əhatə edən torpaqlarda son illər yenidən şoranlaşma başlayıb, sucuqlar, bataqlıqlar artıb. Nəticədə məhsul yetişdirilməsində yerli adamların hamısı əziyyət çəkməli olurlar.

Noyabrın 29-da belə beton borulardan 4000 m uzunluğunda bizim 90 təsərrüfat ailəsinə məxsus “Ocaq Palıdlar” deyilən ərazidən ekskovatorla çıxarılıb oğurlanarkən biz sakinlər tərəfindən hadisənin qarşısı alındı. İnsanlar bu borulardan axan su ilə öz təsərrüfatlarının suvarılması işlərini görürdülər. Ancaq nə yazıq ki, dövlətin bu əmlakına göz dikmiş bir dəstə bizi göz görə-görə aclığa məhkum etmək istəyir. Biz ekskovatorçunu qovduq. O da öz növbəsində bildirdi ki, mən nə çarəyəm. Deyirlər və mən də gəlib boruları çıxarıb hazır edirəm ki, Şəki şəhərinə aparılsın. Biz baş vermiş hadisəni videolentə çəkmişik. Və dərhal DİN-in 102 xidmətinə zəng edərək oğurluq hadisəsinin baş verməsini və dərhal tədbir görülməsini bildirdik. Tez bir zamanda hadisə yerinə Şəki RPİ-nin bir polis kapitanı gəldi. Ekskovatorçu kimə zəng etdisə, dərhal polisə zəng edildi. Polis kapitanı hadisəni araşdırmaq əvəzinə gəldiyi xidməti avtomobilinə minib aradan çıxdı. Və son anda bildirdi ki, bu işlə sahə müvəkkili Rahim Uğurluyev məşğul olacaq. 

Sabahı gün doğrudan da polis mayoru R.Uğurluyev öz şəxsi avtomobilndə hadisənin baş verdiyi əraziyə gəldi. Və məni avtomobilinə oturdub gedək dedi. Biz Şəki şəhərinin  yuxarı hissəsində B.Vahabzadə küçəsinə çatdıq. Polis mayoru yolun kənarına düzülmüş beton boruları mənə göstərib bildirdi ki, görürsənmi bu borular hara sərf olunur? Şəkinin abadlığı üçün sərf olunur. Mən etiraz etdim ki, axı dövlətimiz hər il milyonlarala pul ayırır ki, şəhərin abadlıq, təmir-tikinti işləri qaydasında olsun. Vacibdirmi ki, o boyda təsərrüfata ziyan vurmaqla belə işlər görülsün? Polis R.Uğurluyev əvvəlcə izh etdi ki, bu İcra Hakimiyyətinin tapşırığıdır və məni Polis İdarəsinə gətirib hadisə ilə bağlı izahat yazdırmaq istədi. O öz bildiyi kimi diqtə etməyə başladı. Mən etiraz etdim, bildirdim ki, hadisənin necə baş verməsi barədə necə var elə də izahat yazacağam, ancaq polis qoymadı. Mən də Şəki Rayon Polis İdarəsini tərk etdim. Mənim Polis İdarəsinə aparıldığımı eşidən yaşadığım ərazinin bütün sakinləri etiraz olaraq Şəkiyə yürüş təşkil etmək istəyiblər. Mən dərhal zəng edib camaatın narahat olmamasını, yola çıxmamalarını xahiş etdim və kəndimə qayıtdım. İnsanlar planlaşdırılan oğurluq hadisəsindən bərk qəzəblənmişdilər. Sabahısı mənə bildirdilər ki, səni Şəki rayon İcara Hakimiyyətinə dəvət edirlər, mən də getdim. Lakin İcra Hakimiyyətində bütün qapıları gəzdim. Heç kim məni qəbul etmək istəmədi. 

Biz 90 ailə dövlət mülkü hesab edilən beton boruların ərazimizdən sökülüb aparılmasına qəti etirazımızı bildirirk. Çünki bu oğurluq baş tutacağı halda bizim susuz təsəsrrüfatla məşğul olmağımızın heç bir faydası qalmayacaqdır.

Cənab Prezident, Siz həmişə yerli məmurlara göstəriş verirsiniz ki, kənd təsərrüfatı məhsullarının yetişdirilməsinə yerli hakimiyyət orqanları köməklik göstərsinlər. Biz isə əksini görürük. Gözümüzün qabağında külli-miqdarda dövlət əmlakı gizli qüvvələrin əlilə tar-mar edilir, oğurlanır və satılır. Sonda əziyyət çəkən yerli təsərrüfat sahibləri kimi biz oluruq. Odur ki, Sizdən Meliorasiya və Su Təsərrüfatı ASC-yə məxsus müxtəlif boruların talan edilməsinə göstəriş vermiş quldur dəstəsinin və onların icraçılarının tezliklə tapılaraq qanun qarşısında cavab vermələri üçün aidiyyatı üzrə təşkilatlara göstəriş verməyinizi xahiş edir və əvvəlcədən hamılıqla minnətdarlığımızı bildiririk.

İmza: Əsgərov Əsgər Mustafa oğlu və qeyriləri

06 dekabr 2016-cı il”