Hər bir xalqın tarixi sadəcə onun keçmişi deyil. Tarix həm də xalqın ruhunun beşiyi, onun qanı və canı hesabına qazandığı sərvəti, milli-mənəvi xəzinəsidir. Tarix xalqa yalnız dünən yaşadığı qələbə və məğlubiyyətləri, uğur və uğursuluqları, mübarizə və mücadilələri xatırlatmır, həm də sabah üzləşə biləcəyi təhdid və təhlükələr, fəlakət və faciələr haqqında xəbərdarlıq edir. Tarix hər bir xalqı dünəninə baxaraq sabaha hazırlaşmağa, keçmişə baxaraq gələcəyə daha doğru və məntiqli bir şəkildə yol almağa səsləyir. Istənilən xalqın daha parlaq və təminatlı gələcəyə imza atması onun öz tarixinə nə dərəcədə bələd olması və bu tarixdən hansı səviyyədə yararlanmasına bağlıdır.
Məhz bu mənada tarixi
yalnız Allahla müqayisə etmək olar. Çünki eynən Allah kimi tarix də xalqların,
dövlətlərin aqibətini müəyyənləşdirir, onların verəcəyi sınaq və imtahanların,
itki və qalibiyyətlərin siyahısını müəyyənləşdirir. Tarix içindən Allahın
boylandığı müqəddəslikdir.
Sadəcə, Allahdan fərqli
olaraq tarix xalqları öz gələcəkləri üçün yazılan alın yazısında iştirak etməyə,
bu yazıda kifayət qədər ciddi redaktələr etməyə imkan yaradır. Tarix onu sevən
və onu ciddiyə alanın dostuna, onu təkzib edən və ya ona hörmətsiz yanaşanın
düşməninə çevrilir.
Bu baxımdan xalqların öz
tarixlərinə sahib çıxmaları, onu mənimsəmələri sadəcə istək deyil, ölüm-dirim məsələsidir.
Lakin təəssüf ki, bu gün öz tarixinə arxa çevirən, bu tarixə barmaqarası baxan,
özünü tarixin fövqündə görən xalqlardan biri də türk xalqı, türk toplumudur.
Bugünlərdə qardaş Türkiyədə
məşhur türk sırkərdəsi Ənvər Paşaya məxsus əşyaların hərraca çıxarılması, müəyyən
məbləğ qarşılığında müxtəlif adamlara satılması çağdaş türk toplumunun öz
tarixinə, öz qəhrəmanına nə dərəcədə səthi münasibət sərgilədiyini, öz tarixi
ilə alver edəcək qədər bəsitləşdiyini, bayağılaşdığını göstərdi. Bu olay sübut
etdi ki, vaxtiylə tarixinə səcdə edən, ona bütün ruhu ilə bağlı olan türk xalqı
onu hərraca çıxaracaq qədər mənəvi tənəzzülə uğrayıb.
Biz öz tarixi qəhrəmanlarımızın
yadigarı sayılan əşyaları, xatirələri sataraq 5-10 manat qazana, maddi baxımdan
cüzi uğur əldə edə bilərik. Ola bilsin ki, bu əşyaları alanların içərisində
onun həqiqi dəyərini bilən, onu sevən insanlar da olsun. Lakin muzeylərdə
qorunmalı olan bu əşyaları satmaqla minlərlə, milyonlarla gəncimizi həmin əşyaları
görmək, tarixi qəhrəmanlarımıza məxsus bu əşyalarla yaxından tanış olmaq
imkanınından məhrum edir, istənilən əşyanın alınıb satılmasının mümkünlüyü
fikrini təlqin edirik. Biz tarixlə eynən bir fahişə kimi davranır, pul
müqabilində onun əldən-ələ, evdən-evə, ölkədən-ölkəyə gəzməsinə şərait
yaradırıq. Və daha sonra bu alverin şahidi olan gəncliyi tarixdən dərs çıxartmağa, onu sevməyə səsləyir,
bu çağırışın nəticəsizliyindən məyus oluruq.
Tarix qazanc yox, ibrət və
and yeridir. Öz and yerini satan, öz tarixi ilə alver edən bir xalqın tarix
yazması mümkünsüzdür. Dünənki qəhrəmanını bugünkü maraqlarına satan bir
toplumun tarixin sınaqlarından üzüağ çıxmasına imkan yoxdur.
Tarix qazanc mənbəyinə
çevriləndə xalqın adi kütlədən fərqi qalmır və maddi qiymətləndirmənin fövqündə
dayanan bütün mənəvi dəyərlər dərhal maddilik qazanır. Bu cür toplumlarda bütün
müqəddəslikləri, bütün toxunulmazlıqları alıb-satmaq, zorlamaq və təhqir etmək,
çirkaba bürümək mümkün olur.
Kimliyimiz də, əcdadlarımız
da, dəyərlərimiz də, düşdüyümüz hazırkı
ümidsiz vəziyyət də bizdən tariximizi satmağı deyil, ona sahib çıxmağı, ondan
faydalanmağı, ondan daha ağıllı bir şəkildə istifadə etməyi tələb edir. Və nə qədər
ki, öz tariximizlə bütövləşməmişik, nə qədər ki, tarixə sadəcə adi bir fahişə
kimi yanaşırıq, tarix bizi utandırmaqda və məyus etməkdə davam edəcəkdir.
Seymur Əliyev
e-mail: [email protected]