Maksim Musayev haqq dünyasına qovuşdu...

 

Azərbaycanın görkəmli ictimai-siyasi xadimi, Yeni Azərbaycan Partiyasının səmimi, təmənnasız yaradıcılarından biri, Milli Məclisin sabiq deputatı Maksim Musayev  oktyabrın 27-i axşam saatlarında ürək tutmasından dünyasını dəyişib. 

 

Moderator.az xəbər verir ki, bu haqda mərhumun oğlu Emin Musayev məlumat çatdırıb.

 

Allah rəhmət eləsin!

 

 

Maksim Musayev 1938-ci il avqustun 18-də Qərbi Azərbaycanda, Basarkeçər rayonunun Nərimanlı kəndində anadan olub. 1956-cı ildə İrəvan şəhərində azərbaycan orta məktəbini bitirib. 1956-1958-ci illərdə Gəncədə Kənd Təsərrüfatı Texnikumunda təhsilini davam etdirib. 1958-ci ildən Ermənistan KP Vedi Rayon Komitəsində təlimatçı kimi çalışıb. 1960-1961-ci illərdə İrəvan Kənd Təsərrüfatı İnstitutunda, 1961-1966-cı illərdə Leninqrad Kənd Təsərrüfatı İnstitutunda və daha sonra isə Bakı Ali Partiya məktəbində təhsil alıb.

 

1966-cı ildən Bakıda Tərəvəzçilik Elmi-Tədqiqat İnstitutunda aspirant, 1970-ci ildən Azərbaycan LKGİ Mərkəzi Komitəsində təlimatçı, 1974-cü ildən Azərbaycan Respublikası Xalq Nəzarəti Komitəsində inspektor, 1980-ci ildən Azərbaycan KP MK-da təlimatçı, inspektor işləyib. 1982-ci ildən Qax Rayon Partiya Komitəsinin birinci katibi, 1988-ci ildən Tərəvəzçilik Elmi-Tədqiqat İnstitutunda bölmə müdiri, 1989-cu ildən Azərbaycan Dövlət Qaçqınlar Komitəsi sədrinin müavini, 1990-cı ildən Xızı Rayon Partiya Komitəsinin birinci katibi, sonra rayon Sovetinin sədri, 1991-1992-ci illərdə isə Xızı Rayon İcra Hakimiyyətinin başçısı vəzifələrində çalışıb.

 

Qax və Xızı rayon sovetlərinin bir neçə çağırış deputatı, 1985-ci ildə Azərbaycan SSR Ali Sovetinin deputatı, 1990-cı ildə respublikanın xalq deputatı və 1995-ci ildə Azərbaycan Respublikası Milli Məclisinin deputatı seçilmişdir. Birinci çağırış Milli Məclisin yerli özünüidarə məsələləri daimi komissiyası sədrinin müavini və Azərbaycan-Çin Parlamentlərarası Əlaqələr üzrə işçi qrupunun rəhbəri olub.

 

"Heydər Əliyevin qayıdışı parlamentdə", "Milli Şura Parlamenti 1991-1992" və bir neçə başqa siyasi kitabların müəllifidir.  "Şərəf nişanı" ordeni və bir neçə medalla təltif edilib. "Piterskie Azerbaydjantsi" ("Piter Azərbaycanlıları") qəzetinin təsisçisi və baş redaktoru olub.

 

Maksim Musayev - 12 dən çox kitabın müəllifidir:

 

 

Maksim Musayev ömrünün son günlərinədək Azərbaycanın yaxın tarixindəki ictimai-siyasi proseslər, Rusiya və Ermənistanın Qərbi Azərbaycan, Qarabağ məsələlərinə dair haqsız iddialarıyla bağlı araşdırma məqalələr işləyir, mütəmadi olaraq Milli Məclisin kitabxanasında çalışır, mediaya müsahibələr verirdi. Ömrünün son aylarında  Irəvana Qayıdış İttifaqı yaradılması haqda təşəbbüs qaldırmış və təşkilatın nizamnamə və proqramı üzərində çalışırdı.. 

 

Daim ürəyi Azərbaycan, Qərbi Azərbaycan, İrəvan, Zəngəzur, Basarkeçər, Qarabağla döyünən, ömrü boyu, çalışdığı bütün sahələrdə haqsızlığa, ədalətsizliyə qarşı bacardığı qədər mübarizə aparan Maksim müəllimin xatirəsi yaddaşlarda gələcək nəsillər üçün bir ziyalı örnəyi olaraq qalacaq...

 

Ailəli idi, 3 övladı vardı...

 

Mərhumun doğma və əzizlərinə dərin hüznlə başsağlığı veririk. 

 

 

Sultan Laçın