Sergey Lavrov Ceyhun Bayramova zəng edib - YENİLƏNİB

Bizi sosial şəbəkələrdən izləyin:

28 dekabr 2024-cü il tarixində Azərbaycan Respublikasının və Rusiya Federasiyasının Prezidentlərinin telefon danışığının davamı olaraq, xarici işlər naziri Ceyhun Bayramov ilə Rusiya Federasiyasının xarici işlər naziri Sergey Lavrov arasında telefon danışığı aparılıb.

XİN-dən verilən məlumata görə telefon danışığı zamanı, Rusiya Federasiyasının xarici işlər naziri Sergey Lavrov 25 dekabr tarixində Bakı-Qroznı marşrutu üzrə uçuş yerinə yetirən “Azərbaycan Hava Yolları”na məxsus sərnişin təyyarəsinin faciəvi şəkildə qəzaya uğraması ilə bağlı həlak olanların ailələrinə və yaxınlarına, Azərbaycan xalqına başsağlığı diləklərini çatdırıb.

Nazir Ceyhun Bayramov öz növbəsində bütün həlak olanlara Allahdan rəhmət, yaralılara şəfa diləyib. O, təyyarəyə ilkin baxışın, təyyarə gövdəsində çoxsaylı dəliklərin olmasının, bələdçilərin və sərnişinlərin ifadələrinin təyyarənin fiziki-texniki xarakterli müdaxilə nəticəsində qəzaya uğradığı faktını təsbit etdiyini vurğulayıb.

Nazir, ən qısa müddət ərzində, beynəlxalq ekspertlərdən ibarət heyətin də iştirakı ilə qəzanın səbəblərinin araşdırılması istiqamətində aparılan işin yekunlaşdırılması, qəzanın səbəblərinin ciddi və hərtərəfli şəkildə müəyyənləşdirilərək elan olunması istiqamətində Azərbaycan tərəfinin gözləntilərini qarşı tərəfin diqqətinə çatdırıb.

Bununla yanaşı, başlanılmış istintaq prosesinin tam şəffaf şəkildə aparılmasının və mütəmadi qaydada ictimaiyyətə məlumat verilməsinin əhəmiyyəti qeyd olunub.

***

19:54

Rusiya xarici işlər naziri Sergey Lavrov Azərbaycan xarici işlər naziri Ceyhun Bayramova telefonla zəng edib.

APA-nın Moskva müxbiri Rusiya XİN-ə istinadən xəbər verir ki, telefon danışığı prezidentlər arasında danışıqların davamı olaraq baş tutub.

Bildirilib ki, Azərbaycan və Rusiya XİN başçıları dekabrın 25-də Qazaxıstanın Aktau şəhəri yaxınlığında “Azərbaycan Hava Yolları”na məxsus sərnişin təyyarəsinin qəzaya uğraması ilə bağlı hadisələrin inkişafını müzakirə ediblər.

"Nazirlər bu faciəli hadisənin hərtərəfli araşdırılmasının təmin edilməsinin zəruriliyi ilə bağlı prezidentlərin razılaşmalarını təsdiq edərək, həlak olanların ailələrinə dərin hüznlə başsağlığı verib, xəsarət alanların tezliklə sağalmasını arzulayıblar.

Hadisənin bütün səbəblərinin müəyyən edilməsi və gələcəkdə oxşar halların qarşısının alınması üçün təxirəsalınmaz tədbirlərin görülməsi və baş verənlərin bütün hallar nəzərə alınmaqla nəhayət və tam şəkildə aradan qaldırılmasının zəruriliyi vurğulanıb.

Ən yüksək və ali səviyyələrdə gözlənilən Rusiya-Azərbaycan təmaslarına dair də fikir mübadiləsi aparılıb", - deyə Rusiya XİN-nin məlumatında qeyd olunub.