Dünya liderləri onu hər zaman böyük sayğı və ehtiramla yad edirlər. O hər kəs tərəfindən təcrübəli, dünyaşöhrətli siyasətçi, uzaqgörən və qayğıkeş adam kimi xarakterizə edilir. Haqqında bəhs edəcəyimiz bu şəxsiyyət Azərbaycanın Ümummilli Lideri Heydər Əliyevdir. Həqiqətən də O, elə bir zirvədir ki, əzəməti Azərbaycanın və bu ölkənin yerləşdiyi regionun hüdudlarını aşır. Elə buna görədir ki, bu gün dünyanın dörd-bir tərəfində Heydər Əliyev amili böyük rəğbət və hörmətlə anılır. Azərbaycan xalqı isə onu öz xilaskarı kimi əbədi olaraq qəlbinə qazıyıb.

 

 

Tarixdə iz qoymaq, əlbəttə ki, hər siyasi xadimin taleyinə yazılmır. Bütün həyatını xalqının xoşbəxt gələcəyinə, dövlətinin çiçəklənməsinə həsr edən  Heydər Əliyevi tarixdə əbədiləşdirən, ilk növbədə, onun Vətənə, xalqa, milli-mənəvi dəyərlərə – dilinə, mədəniyyətinə və ədəbiyyatına  olan sərhədsiz sevgisi və bunların qorunması və tərəqqisi yorulmadan apardığı  taleyüklü mücadilələr. Məhz onun millət və Vətən naminə atdığı cəsarətli addımlar Azərbaycanın bu günü naminə həyata keçirdiyi misilsiz, möhtəşəm layihələrdir.

 

Təsadüfi deyil ki, bu il Azərbaycanda “Heydər Əliyev İli”dir. Bu çərçivədə Azərbaycanda və dünyada həyata keçirilən çoxsaylı tədbirlər Ulu Öndərin irsinin daha geniş şəkildə araşdırılması və gənc nəslə çatdırılmasında önəmli rol oynayır. Bunlar ona görə vacibdir ki, bugünkü müstəqil dövlətimizin siyasəti Heydər Əliyevin uzaqgörənliyi sayəsində möhkəm, dayanaqlı özüllər üzərində qurulub. Prezident İlham Əliyevin hazırkı praqmatik və uzaqgörən siyasəti də məhz bu təməllər üzərindədir. Bu gün ölkəmizin uğurla və sürətlə inkişaf etməsi, Azərbaycanın öz tarixinin ən şərəfli günlərini yaşaması - Prezident, Ali Baş Komandan İlham Əliyevin qətiyyətli mövqeyi və müdrik siyasəti ilə Şanlı Ordumuzun 30 il işğal altında qalmış torpaqlarımızı erməni tapdağından azad etməsi və Azərbaycanın suverenliyinin bərpa olunması da göstərdi ki, Heydər Əliyevin vaxtilə qoyduğu təməlin necə mökəm və sağlam olduğunu göstərdi.

 

Bu gün istər qazandığımız tarixi Zəfərdə, işğaldan azad olunmuş torpaqlarımıza böyük qayıdış proseslərində, istərsə də beynəlxalq münasibətlərdə fövqəlgüclərin Azərbaycanla hesablaşmasında Heydər Əliyevin əsasını qoyduğu strategiyaların izləri var. Çünki dahi Lider xalqımızın dilinə, tarixinə, mədəniyyətinə sahib çıxmaqla, multikultural ənənələri özündə cəmləşdirən, eyni zamanda milli kimliyin dini kimliyə qarşı qoyulmadığı universal dəyərlər sistemi yaradıb. Heydər Əliyevin hakimiyyəti dövründə müasir Azərbaycanda siyasi şüur formalaşıb, ictimai münasibətlər inkişaf edib, müasir çağırışlar milli mənafe ilə uzlaşdırılıb. Ona görə də müstəqil Azərbaycanın memarı, Ümummilli Liderimiz Heydər Əliyevin respublikamıza rəhbərlik etdiyi dövrlərdə milli-mənəvi dəyərlərə münasibət kökündən dəyişib. Ümummilli Liderin həyata keçirdiyi siyasətdə tolerantlıq hər zaman diqqət mərkəzində olub. Sevindirici haldır ki, bu siyasət möhtərəm Prezidentimiz cənab İlham Əliyev tərəfindən də uğurla davam etdirilir.

 

Yəni Heydər Əliyev o şəxsiyyətdir ki, xalqına yüz illər boyu yaşayacaq mənəvi irs miras qoyub. Ulu Öndərin Azərbaycana rəhbərlik etdiyi dövrü həm də maddi və mənəvi quruculuq illəri olaraq təsnifatlandırmaq olar. SSRİ dövründə nəhəng tikinti-quruculuq layihələrinə, iqtisadi inkişafa daha çox diqqət yetirən Heydər Əliyevin siyasi strategiyasında Azərbaycanın müstəqilliyinə nail olduqdan sonra konstitusion dövlətin formalaşdırılması, azərbaycançılıq ideologiyasının yaradılaraq inkişaf etdirilməsi, milli-mənəvi, dini dəyərlərimizə qayıdış məsələləri prioritet istiqamətlərə çevrildi.

 

Ümummilli Lider Heydər Əliyevin müəllifi olduğu müasir azərbaycançılıq ideologiyasının əsasında Azərbaycanda yaşayan xalqların tarixi, mənəvi-əxlaqi, mədəni ənənələr əsasında vahid birliyi ideyası dayanır. Heydər Əliyevin azərbaycançılıq ideyasının Azərbaycanın müstəqilliyinin möhkəmlənməsində, dövlətçiliyimizin qüdrətlənməsində və dövlət quruculuğu prosesində rolu danılmazdır. Həmçinin, Heydər Əliyev irsi elmi cəhətdən təhlil edilməsinin zəruriliyini və yeni elmi əsərlər üçün zəmin yaradacaq ideyalarla olduqca zəngindir.

Bu gün Heydər Əliyevin ideyaları yaşayır və xalqımızın dünəni, bu günü və gələcəyi ilə səsləşir. Heydər Əliyev bir-birindən kəskin fərqlənən formasiyalarda Azərbaycana böyük uğurla rəhbərlik etmişdir. Həm 1969-82-ci illərdə, həm də müstəqlliyimizin bərpasından sonrakı vaxtda Ulu Öndərin bütün fəaliyyətinin nüvəsini xalqımızın parlaq gələcəyinin, qüdrətli bir dövlət kimi Azərbaycanın inkişafının təmin edilməsi təşkil edib.

 

Onun ilk hakimiyyəti illrində, 1969-cu ilin iyul plenumu ərəfəsində Azərbaycan keçmiş ittifaq miqyasında ən geridəqalmış aqrar respublikalardan biri idi. Respublika həyatının bütün sahələrində ciddi tənəzzül meyilləri baş qaldırmışdı, xüsusilə iqtisadiyyat dərin böhran mərhələsində idi. Belə bir məqamda vəziyyəti dəyişmək, prosesləri müsbət məcraya yönəltmək üçün dərin biliklərə, yüksək idarəetmə qabiliyyətinə və sarsılmaz iradəyə sahib rəhbərə ehtiyac duyulurdu. Yalnız bu ali keyfiyyətlərə malik olan şəxsiyyətin liderliyi ilə xalqın vahid məqsəd naminə təşkilatlanmasına nail olmaq və respublikanın taleyində dəyişiklik etmək mümkün idi. Ona görə də Heydər Əliyevin respublikamıza ilk dəfə rəhbər seçilməsinin tarixi əhəmiyyəti olduqca əhəmiyyətli idi və həmin dövrü xarakterizə edərkən haqlı şəkildə onu Azərbaycan tarixində dönüş nöqtəsi kimi dəyərləndiririk.

 

Heydər Əliyevin rəhbərliyi ilə qısa zamanda respublikamızda geniş vüsət alan islahatlar, iqtisadi və sosial sahələrdə əldə edilən nailiyyətlər xalqın maddi-rifah halının keyfiyyətcə yeni mərhələyə yüksəlməsini şərtləndirdi. Heydər Əliyev modelini üstün edən keyfiyyətlərdən biri də o idki, O, məsələlərə konseptual yanaşır, islahatlar yolu ilə həllinə nail olunmasına çalışırdı. Təsadüfi deyil ki, 1970-ci illərin əvvəllərində Ulu Öndərin rəhbərliyi ilə respublikanın iqtisadi inkişafını təmin etmək üçün çoxşaxəli inkişaf konsepsiyası hazırlandı və icrasına başlanıldı. Bu istiqamətdə həyata keçirilən tədbirlər çərçivəsində respublikanın sosial-iqtisadi, ictimai-siyasi və mədəni həyatına mənfi təsir göstərən meyillər müəyyənləşdirilərək aradan qaldırıldı və ənənəvi təsərrüfat sahələrinin səmərəli fəaliyyətinin bərpası ilə yanaşı, yeni istehsal sahələri yaradıldı.

Heydər Əliyevin idarəetmə fəlsəfəsinin əsas ideya istiqamətini milli özünüdərk, xalqın tarixi yaddaşının özünə qaytarılması təşkil edib. Bu gün müstəqil Azərbaycan dövlətçiliyinin ideoloji əsasını təşkil edən azərbaycançılıq ideyasının bünövrəsinin qoyulması, onun mükəmməl bir konsepsiya şəklində irəli sürülməsi Ümummilli Lider Heydər Əliyevin adı ilə bağlıdır. Xüsusən də dövlət idarəetmə sisteminin milliləşdirilməsinə və milli kadr potensialının hazırlanmasına Ulu Öndər daim xüsusi diqqət göstərib. 1969-82-ci illərdə azərbaycanlı gənclərin Moskvanın, eləcə də keçmiş SSRİ-nin digər şəhərlərinin aparıcı ali elm və təhsil ocaqlarına göndərilməsi Azərbaycanın gələcək inkişafı üçün güclü kadr potensialının formalaşdırılmasına xidmət etmiş, həmin dövrdə yaxşı təhsilə yiyələnmiş kadrlar Azərbaycan müstəqillik əldə etdikdən sonra ölkəmizdə quruculuq və inkişaf proseslərində fəallıq göstərmişlər.

 

Azərbaycanın yüksək peşəkarlığa malik hərbi kadrlarının hazırlanması istiqamətində ilkin addımlar da o dövrdə atılmışdır. Ulu Öndər Heydər Əliyev böyük cəsarət və uzaqgörənliklə 1971-ci ildə Bakıda Cəmşid Naxçıvanski adına Hərbi Liseyin açılmasına nail olmuş, bununla yanaşı, gənc azərbaycanlı oğlanların ittifaq miqyasında tanınmış ali hərbi məktəblərə cəlb olunması işinə xüsusi diqqət yetirmişdir. Ümummilli Lider Heydər Əliyev 1997-ci ildə keçmiş SSRİ-nin müxtəlif universitetlərində ali təhsil almış məzunlarla görüşündə demişdir: "Azərbaycanda kadr hazırlığı məsələsi ilə şəxsən, bilavasitə ciddi məşğul olarkən və o cümlədən sizləri respublikamızdan kənarda ali məktəblərə göndərərkən mütləq və mütləq Azərbaycanın gələcəyini, müstəqilliyini düşünürdüm. O vaxt mən inanırdım: vaxt gələcək ki, bu kadrlar müstəqil Azərbaycana lazım olacaqdır. Vaxt gələcəkdir ki, nəhayət, Azərbaycan müstəqil olacaqdır və bu kadrlar Azərbaycanın müstəqilliyini təmin edəcəklər".

 

1993-2003-cü illərdə ikinci dəfə hakimiyyətdə olanda isə Heydər Əliyevin rəhbərliyi ilə həyata keçirilən tədbirlər Azərbaycanda sabitlik və əmin-amanlığın təmin olunması ilə yanaşı, ölkənin müstəqil inkişaf relslərinə çıxarılmasını, bütün sahələrdə tarixi nailiyyətlərin əldə olunmasını şərtləndirdi. Bu gün Azərbaycanda həyatın elə bir sahəsi, elə bir platforma yoxdur ki, orada Heydər Əliyevin gərgin zəhməti, onun parlaq izləri görünməsin. Ona görə də müstəqil Azərbaycan dövləti, Azərbaycan xalqı yaşadıqca, Heydər Əliyev adı və irsi də yaşayacaq.

 

HBilirsiniz ki, Heydər Əliyev 2003-cü il dekabrın 12-də dünyasını dəyişib. Xalqımız həmin gün - 12 dekabrı Ulu Ödər Heydər Əliyevin anım günü kimi böyük məhəbbət və minnətdarlıq hissi ilə qeyd edir.

 

Beləliklə, tarixə öz adını qızıl hərflərlə əbədi həkk etmiş nadir şəxsiyyətin həyat və fəaliyyəti hər bir Azərbaycan vətəndaşının qürur mənbəyinə çevrilib, desək, yanılmarıq. Heydər Əliyevin həyat yolu yüksək insani-əxlaqi keyfiyyətləri özündə təcəssüm etdirən nümunəvi məktəbdir.