May ayının 28-də Rusiyanın Udmurtiya bölgəsinin İjevsk şəhərində “Kosmonavtlar Parkı” ərazisində Azərbaycan Xalq Cümhuriyyətinin yaranmasının 104 illiyinə həsr olunan bayram tədbiri keçirilib. 

 

Bayram tədbirində Udmurt Respublikasının milli siyasət nazirinin müavini Filatov Aleksandr Vladimiroviç, Udmurt Respublikası Dövlət Şurasının elm, təhsil, mədəniyyət, turizm və milli siyasət üzrə daimi komissiyasının sədri, "Udmurt Kenesh" ÜmumUdmurt Regionlararası İctimai Təşkilatın prezidenti İşmatova Tatyana Vitalievna, Sənaye Dairəsinin Baş Administrasiyasının rəhbəri Lyubov Evlampievna Zaitseva və digər fəxri qonaqlar iştirak edib.

 

Tədbir çərçivəsində Udmurt Respublikası milli-mədəni birlikləri arasında dama və uzun nərd üzrə turnir, eləcə də SSRİ xalq artisti Müslüm Maqomayevin xatirəsinə həsr olunan "Sən mənim melodiyamsan" açıq festival-müsabiqəsi təşkil olunub.

 

Açılış nitqi ilə çıxış edən  Udmurtiyanın “DOSTLUG” Azərbaycan İctimai Mərkəzinin sədri Zülfiqar Mirzəyev  iştirakçıları səmimiyyətlə salamlayaraq, qonaqlara bayramın keçirilməsində göstərdikləri dəstəyə və iştiraka görə təşəkkürünü bildirib. 

 

 

Onun sözlərinə görə, 1918-ci il mayın 28-də Azərbaycan Xalq Cümhuriyyətinin yaranması Azərbaycan xalqının həyatında əvəzsiz hadisə olub.Çoxəsrlik mədəniyyətə və adət-ənənələrə malik Azərbaycan xalqı demokratik respublikanın yaranması ilə layiqincə milli təsisatlar və yeni dövlət-hüquqi statusu qazanıb.

 

“Hər kəsi bu gözəl milli bayram münasibətilə təbrik edir, sizə möhkəm cansağlığı, ailə səadəti, uğurlar, tarixi Vətənimizə isə firavanlıq arzulayıram”, - deyə Z.Mirzəyev bildirib.

 

 

 

Bayramın fəxri qonaqları Zülfiqar Mirzəyevlə birlikdə Kosmonavtlar parkında yerləşən "Azərbaycan xiyabanı"nda ağac əkiblər.

 

Qeyd edək ki, ötən il mayın 28-də Kosmonavtlar Parkında "Azərbaycan bağı"nın açılışı olub. "Azərbaycan bağı"nın xalq guşəsində səkkizguşəli ulduz şəklində "Buta" abidəsi qurulub. Həmçinin, burada Qobustanın qayaüstü rəsmlərinin dekorativ heykəltəraşlığı da öz əksini tapıb. Parkda yerləşdirilən böyük daş abidənin üzərində əks olunan xəritədə Vətən müharibəsi nəticəsində işğaldan azad edilmiş ərazilərimiz vahid Azərbaycanın tərkib hissəsi kimi göstərilib.  

 

Dama və uzun nərd yarışlarında milli mədəni birliklərin, eləcə də Şəhər Veteranlar Şurasının, İjevsk şəhərinin Pervomayski rayon Veteranlar Şurasının, “İqroş” klubunun və paytaxt liseyinin 50 nümayəndəsi mübarizə aparıb. Yarışda Rusiya və SSRİ-nin əməkdar məşqçisi, dama üzrə dəfələrlə Udmurtiya çempionu olan Çebışev Rudolf Nikolayeviç və respublikanın digər tanınmış idmançıları mübarizə aparıblar.

 

 

Yarış zamanı təkcə rəqabət deyil, rəqiblər arasında həm də qarşılıqlı anlaşma və bayram əhval-ruhiyyəsi hökm sürürdü.

 

 

Dama üzrə respublika turnirinin qalibi Udmurtiya Yəhudi Mədəniyyəti İctimai Mərkəzinin nümayəndəsi Korman Yakov, nərd üzrə isə Udmurtiya “Dostluq” Azərbaycan İctimai Mərkəzinin nümayəndəsi Elçin Qliyev qalib olub.

 

Turnirin bütün qaliblərinə kubok və diplomlar təqdim olunub.

 

 

Müslüm Maqomayevin xatirəsinə həsr olunmuş “Sən mənim melodiyamsan" musiqi festivalında rus, udmurt, tatar və mari diasporunun yaradıcı kollektivləri, həmçinin, Udmurtiyanın Azərbaycan İctimai Mərkəzinin “Dostluq” instrumental ansamblı çıxış edib.

 

 

 

Peşəkar münsiflər heyətinin qərarı ilə musiqi müsabiqəsinin qran prisi Mahmudov Pərviz Akif oğluna layiq görülüb.

 

Müsabiqənin digər qalib və iştirakçılarına diplom və pul mükafatlarını Udmurt Respublikasının əməkdar artisti Aleksey Gennadyeviç Qorodilov və festivalın təşkilatçısı Zülfiqar Mirzəyev təqdim ediblər.

 

 

Qeyd edək ki, tədbirin sonunda bu festivalın hər il Azərbaycan Respublikası Gününün qeyd olunduğu günlərdə keçirilməsi qərara alınıb.

 

Tədbirdə lentə alınan ən maraqlı görüntüləri təqdim edirik: