Bugünlərdə ABŞ-ın bir neçə nüfuzlu media orqanı ölkə boyu keçirilən etiraz aksiyalarını qızışdıranlar içərisində Rusiya casuslarının olduğu barədə xəbər yaymışdı. Ağ ev rəsmiləri isə hələ ki, onlarda belə məlumatın olmadığnı bildirmişdilər. ABŞ prezidenti Donald Trampın bununla bağlı yayılan xəbərləri inkar etməsindən sonra Pentaqona yaxın hərbi mənbələrin yeni məlumatı gündəmi çaşdırmışdı. Pentaqona yaxın mənbələrin məlumatında deyilirdi ki, ABŞ Mərkəzi Kəşfiyyat İdarəsi, Federal Təhqiqatlar Bürosu və hərbi kəşfiyyatı mitinqlərə qatılanlar arasında Rusiya agentlərinin, o cümlədən Rusiya hərbi kəşfiyyatı agentlərinin olduğu barədə informasiyalara malikdir. İddiaya görə, hazırda bu yöndə araşdırma aparılır. 

Moderator.az xəbər verir ki, ABŞ-ın daha bir ştatında bu istiqamətdə şübhəli hadisə baş verib. Belə ki, Texas ştatının Hyuston şəhərində mitinqçilərin yolunu bağlayan Amerika polislərindən birinin qolunda pravoslav motivli böyük tatu və rus dilində yazılmış "Rossiya" sözü olub. Həmçinin həmin polisin qoluna onun yaşadığı şəhərin adı köhnə qaydada - göy tuşla həkk edilibmiş. Bunu görən qaradərili bir etirazçı həmin polisə yaxınlaşıb və onunla xüsusi mehribanlıqla salamlaşıb. Bu hadisə ştatda çalışan jurnalist Stiv Kempionun diqqətindən yayınmayıb. Jurnalist o anı fotoaparatla çəkib. Fotonu paylaşan texaslı jurnalist etiraz aksiyalarında nümayişçilər, həm də hökumət qüvvələri içərisində xeyli Rusiya agentinin ola biləcəyini zarafatla söyləyib və əlavə edib: "Əlbəttə, məndə kəşfiyyat informasiyası yoxdur, mən bu sahə üzrə mütəxəssis deyiləm. Ancaq hər ehtimala qarşı yenə də belə təsadüflər araşdırılmalıdır". 

Xatırladaq ki, bu yaxınlarda Minneapolis şəhərində ağdərili polis tərəfindən öldürülən qaradərili Corc Floyd da bir müddət ailəsi ilə Texasda yaşayıb. Floyd ştatın Hyuston şəhərində doğulub boya-başa çatıb. Floydun faciəli ölümündən sonra ABŞ-da etiraz aksiyaları başlayıb. Artıq ABŞ-ın 10 ştatını bürüyən və polislə mitinqçilər arasında toqquşmalara gətirən aksiyalarda indiyədək 10-dan çox adamın həlak olduğu bildirilir.