Dövlət başçısı İlham Əliyevin işğaldan azad edilmiş Azərbaycan ərzilərinə hər səfəri, döğma torpaqlarımızın çiçəklənməsi, erməni vandalizmindən azad edilmiş ərazilərin potensial imkanla-rından səmərəli istifadə olunması istiqamətində tarixi hadisəyə çevrilir. Prezidentin Kəlbəcər rayonuna 2 sentyabr 2024-cü il tarixli səfəri də həm məzmun, həm də əhatə baxımından olduqca zəngin oldu. Kəlbəcər şəhərinin abadlaşdırılması, füsunkar təbiətə, əsrarəngiz gözəlliyə, göz oxşayan fərqli relyefə malik Kəlbəcərin müasir memarlıq nümunələri ilə yenidən qurulması bir təbiət-cəmiyyət vəhdəti yaradır. Təbiətin bəxş etdiyi gözəlliklər dövlət başçısının rəhbərliyi ilə aparılan yenidənqurma və abadlıq işləri ilə tamamlanır, daha da cəlbedici mənzərə alır.

 

Cənab Prezidentin Kəlbəcərdə görülən işlərlə tanışlığı, yerində verilən tapşırıqlar, rayonda açılışı edilən KSES-ları, bünövrəsi qoyulan yeni yaşayış məntəqələri bütün azərbaycanlıların, xüsusilə hər bir kəlbəcərlinin ürəyindən xəbər verən, sevincinə səbəb olan, bayram ovqatlı hadisələrdir. 

 

Amma cənab Prezidentin Kəlbəcərə bu dəfəki səfərinin başqa bir gözəlliyi var ki, hesab edirəm ki, bu xüsusi qeyd edilməlidir. Dövlət başçısı bu səfərində milyonlarla insanın səbrsizlikə gözlədiyi  “İSTİSU” su istehsalı zavodunun açılışını etdi. Müşahidələr, sosial şəbəkə mənzərələri də sübut edir ki, Kəlbəcərə gedə bilməyən milyonlarla insanın gözü yollarda, hamı marketlərdə “İSTİSU” axtarır, sanki “İSTİSU” 30 illik həsrətin odunu soyudacaq, .... 

Əslində isə axtarmağa dəyər... Azərbaycan təbiətinin bilicisi, mərhum akademik Mirəli Qaşqayın sözləri ilə desək: “...Kəlbəcər rayonundakı İstisu mineral su bulağı təbiətin gözəl hədiyəsidir. Öz kimyəvi tərkibi və fiziki xüsusiyyətlərinə görə, bu sular dünyada məşhur olan Karlovı-Varı bulaqlarının eynidir və bəzi xüsusiyyətlərinə görə dünyada yeganədir”. 

 

 O cümlədən, dövrünün körkəmli kimyaçı alimi E.E.Karstenski Kəlbəcər ərazisindəki mineral suları analiz etdikdən sonra İSTİSUyun müalicəvi əhəmiyyətini daha yüksək (hətta - Karlovı-Varıdan da yüksək) qiymətləndirmiş və müalicə ocağının təkcə bu əraziyə, bu regiona deyil ümumilikdə Azərbaycana, dünyaya şöhrət gətirəcək bir mənbə olduğunu göstərmişdir.

 Bütün bunlar Prezidentin Kəlbəcərə səfər zamanı açılışını etdiyi “İSTİSU”yun yaxın gələcəkdə dünyaca məşhur müalicə mənbəyi kimi ölkəmizə valyuta gətirən bir müəssisəyə çevriləcəyini ifadə edir. İlkin hesablamalara görə, gündəlik istehsal gücü 327 min butulka nəzərdə tutulan su istehsalı zavodu isə dövlət büdcəsinin gəlir mənbələrindən birinə çevrilməklə yanaşı, rayonun inkişafına da öz bəhrəsini verəcəkdir. 

 

Hələ bir neçə il öncə, Kəlbəcərin işğal altında olduğu illərdə İSTİSUyun 0.5 litrlik butulka-sının 1.0 dollara (təqribən 1.7 manata), 1 litrlik butulkası isə 1.5 dollara (təqribən 2.5 manata) satıldığına dair məlumatlar var idi. Təqribi hesablama ilə, yalnız “İSTİSU” su istehsalı zavodunun gündəlik gəliri 327000*1.5 = 490500 manat təşkil edəcəkdir ki, bu da aylıq 14.7 milyon manat deməkdir. Nəzərə alsaq ki, burada müasir tələblərə uyğun müəlicə-istirahət kompleksi də tikilməkdədir, onda bu rəqəmin gələcəkdə dəfələrlə artacağı mütləqdir. Rayonun digər təbii-iqtisadi resurslarını, aqrar və turizm potensialını da nəzərə alsaq Kəlbəcər rayonu nəinki özünü təmin edən, hətta büdcəyə gəlir gətirən bir rayon ola bilər.

Dövlət başçısı və Birinci vitse-prezident səfər zamanı Kəlbəcər rayonunda tikilməkdə olan “İstisu” Müalicə-İstirahət Kompleksində aparılan tikinti işləri ilə də tanış olublar. 32 hektar ərazidə salınması nəzərdə tutulan “İstisu” İstirahət-Müalicə Kompleksi gündəlik 300 nəfər qəbul etmək imkanına malik olacaq. Kompleksdə sağlamlıq-bərpa mərkəzi ilə yanaşı, 145 nömrə, eləcə də 10 kottec yaradılacaq. Eyni zamanda, Kompleksdəki SPA Mərkəzində termal hamam, müalicəvi vanna, həkim otağı, o cümlədən müxtəlif müalicəvi hovuzlar, prosedur otaqları, təzyiqli su terapiyası, masaj, buxar, duz otaqları, istirahət zonaları, gözəllik salonu mövcud olacaq. Burada müxtəlif iaşə obyektləri - restoranlar, uşaq əyləncə mərkəzi, oyun otağı, sportskafe, karaoke otağı, kafeteriya da qonaqlara xidmət göstərəcəkdir.

Bütün bunlar, Kəlbəcəri özünü maliyyələşdirməklə yanaşı, büdcəyə gəlir gətirən bir rayona, beynəlxalq və yerli turizm mərkəzinə çevirəcəkdir. Bu isə o deməkdir ki, Prezident İlham Əliyevin “Biz Qarabağı və Şərqi Zəngəzuru cənnətə çevirəcəyik” ifadəsi də artıq reallıqdır. 

Kəlbəcərdə və digər işğaldan azad edilmiş ərazilərdə fasiləsiz olaraq həyata keçirilən tədbirlər, aparılan tikinti-quruculuq işləri bir daha təsdiq edir ki, Prezident İlham Əliyevin də qeyd etdiyi kimi: “Bizim sözümüzlə əməlimiz heç vaxt fərqlənmir. Yəni, nəyi deyiriksə, onu da edirik”.