S.Hüseynov iddia edib ki, direktor N.Rzayev müəllimləri onun üzünə durmağa, yalan ifadə verməyə məcbur edib: “Direktor Nizami Rzayev bu cəfəngiyyatı sübut edə bilmədiyi üçün kollektivimizdəki bəzi müəllimləri təsir altına salıb, yalandan mənim üzümə durmağa məcbur edib. Bəhanəsi də budur ki, guya mən kollektiv arasında kobud rəftar edib, təhqiramiz ifadələr işlətmişəm. Halbuki, belə bir hadisə olmayıb. Direktor Nizami Rzayev bu kimi absurd əsaslarla 01 aprel 2022-ci ildə məni işdən çıxarıb. Maraqlı məqam burasıdır ki, 30 mart 2022-ci ilə qədər bütün elektron və sinif jurnalları mənim tərəfimdən yazılıb, imzalanıb. Necə olur ki, mən dərsdə olmuram, amma mənim xəttimlə martın 30-na qədər jurnallar yazılıb, qiymətlər və “qayıblar” qoyulub? Direktor Nizami Rzayev tək mənimlə deyil, ibtidai sinif müəllimi Səbinə Cənnətova, direktor müavini, dil-ədəbiyyat müəllimi Afət Cəmilova ilə də ədavət aparır, onları mənəvi-psixoloji terrora məruz qoyur. Səbəb budur ki, hər iki qadın müəllim mənə atılan böhtanı təsdiqləməyib, məhkəmədə şahid kimi üzümə durmayıblar”.
Şikayətçi S.Hüseynovun sözlərinə görə, öz hüquqlarını müdafiə etmək üçün 2022-ci ilin aprel ayında Gəncə Şəhər Məhkəməsinə müraciət edib: “Məhkəmə səkkiz ay davam etdi, ümumilikdə 15 məhkəmə prosesi keçdi. Məhkəmə prosesi ərzində hakim Həqiqət Səfərli dəfələrlə məktəb direktoru Nizami Rzayevi məhkəməyə dəvət etsə də, o, bir dəfə də olsun prosesə gəlmədi. Nümayəndə göndərmişdi, o da danışa bilmir, içkili olurdu. Gəncə Şəhər Məhkəməsi 30 noyabr 2022-ci il tarixində mənim işə bərpa olmağım və direktorun məni işdən çıxarma əmrinin ləğv olunması, məcburi buraxdığım əmək haqlarımın təmin olunması ilə bağlı qətnamə çıxarıb. Bu qətnamədən sonra direktor Nizami Rzayev Apellyasiya şikayəti verib. Həmin şikayətdən sonra Gəncə Apellyasiya Məhkəməsinin Mülki Kollegiyası 13 fevral 2024-cü ildə yenə mənim xeyrimə qərar çıxarıb. Təsdiq olunub ki, müəllim işə qayıtsın, əmək haqqı ödənsin. Qətnamədə göstərilib ki, direktor səhvən, qanunsuz və qərəzli olaraq məni işdən çıxarıb. Bütün bunlara baxmayaraq, direktor Nizami Rzayev məni öz işimə bərpa etmir, Məhkəmə qətnamələrinin tələbini yerinə yetirmir”.
S.Hüseynov iddia edib ki, yaranmış vəziyyətlə bağlı dəfələrlə Elm və Təhsil Nazirliyinə, Məktəbəqədər və Ümumi Təhsil üzrə Dövlət Agentliyinə dəfələrlə müraciət olunsa da hər hansı tədbir görülməyib: “Nazirliyə və agentliyə ünvanladığım müraciətlər Gəncə-Daşkəsən Regional Təhsil İdarəsinə yollanır. Bu idarədə direktor Nizami Rzayevin pul müqabilində satın aldığı inspektorlar Elm və Təhsil Nazirliyinin göstərişinə məhəl qoymur, faktiki olaraq direktoru himayə edirlər. Mənim Birinci və İkinci Qarabağ müharibələrində iştirakımla bağlı sənədlər, vəsiqələr, təltiflər var. Təhsil müəssisəsində işlədiyim müddətdə 26 fəxri fərmanım, təşəkkürnaməm var. Hətta direktor Nizami Rzayev də məni dəfələrlə təltif edib. Əgər mən pis müəllim, səhlənkar və məsuliyyətsiz işçiyəmsə, bu təltiflər necə baş tutub? Mən işimə bərpa olunmaq, əməkhaqqımı almaq istəyirəm”.
Redaksiyamızda olan, şikayətini çatdıran S.Hüseynovu dinləyib qeydlər apardıqdan sonra Elm və Təhsil Nazirliyi ilə əlaqə yaratdıq, problemlə bağlı mərkəzi icra hakimiyyəti orqanına sorğu ünvanladıq. Gəncə-Daşkəsən Regional Təhsil İdarəsindən sorğumuza cavab olaraq bildirildi ki, müəllim S.Hüseynovun direktor N.Rzayevlə bağlı şikayəti məhkəmə müstəvisində araşdırılır və hazırda məhkəmə prosesi davam edir. Proses tam yekunlaşdıqdan, qərar qəbul olunduqdan sonra ictimaiyyətə müvafiq məlumat veriləcək.
Gəncə-Daşkəsən Regional Təhsil İdarəsindən onu da xatırlatdılar ki, Gəncə Şəhər M.C.Paşayev adına 39 nömrəli tam orta məktəbin hərbi-hazırlıq rəhbəri S.Hüseynov işində yol verdiyi nöqsanlara görə 2022-ci il aprelin 1-də işdən azad olunub.
Ərtürk İSMAYIL