Bu gün Azərbaycan mətbuatının yaranmasının 149-cu ildönümüdür. Ölkəmizdə mətbuatın banisi Həsən bəy Zərdabidir. Böyük çətinliklərdən sonra o, Bakıda ana dilində “Əkinçi” qəzetinin nəşr edilməsi üçün icazə alıb.

 

Məşhurlar hər zaman dostluq etdikləri mətbuat işçilərini Moderator.az saytı vasitəsilə təbrik ediblər. Onların arasında müasir jurnalistlərin işindən həm razı, həm də narazı olanlar da var. 

Xalq artisti Arif Babayev:

 

“Jurnalistlər mənim dostlarımdır. Onlardan çox razıyam. Məni heç vaxt unutmurlar. Zəng edib soruşurlar, maraqlanırlar. Hətta qulluğumda durmaq üçün müraciət edənlər də olur. Onların hamısına təşəkkür edirəm. Yazdıqları yazılar onların başını uca etsin. Hər sahədə peşəkar da, qeyri-peşəkar da var. Bəzən görürsən ki, ölüm xəbərlərimi də tirajlayırlar. Bircə xahişim və istəyim budur ki, düzgün xəbərlər yazsınlar. Vətənimizi, Qarabağımızı tərənnüm edən jurnalistlər yetişsin” deyə Arif Babayev bildirib.

Xalq artisti Afaq Bəşirqızı:

 

“Jurnalistlərimizə müvəfəqiyyətlər, işlərində uğurlar, geniş tamaşaçı kütləsinin rəğbətini arzulayıram. İstəyirəm ki, onların yazıları həm dövlət əhəmiyyətli olsun, həm zövq oxşasın, həm də Azərbaycan dövlətçiliyinin və Azərbaycan xalqının gələcəyinin təminatçısı olsun. Xalq öz gələcəyinə inanmalıdır. Bunun da əsas aparıcı qüvvələri jurnalistlərdir” deyə sənətkar bildirib.

Xalq artisti Firəngiz Əlizadə:

 

“Jurnalistlərə bu zəmanədə böyük ehtiyac var. Ona görə ki, bizim xalqımızın mədəni-mənəvi dəyərlərini dünyada təbliğ etmək məsuliyyəti onların əlindədir. Bizim mətbuat nə qədər vətənpərvər, ağıllı və yüksək səviyyəli olsa, o qədər də bizə dünyada inam və hörmət olar. Yolunuz açıq olsun! Təbriklər və uğurlar!” deyə Firəngiz Əlizadə bildirib.

Əməkdar jurnalist Telli Pənahqızı:

 

“Jurnalistləri dördüncü hakimiyyət adlandırırlar. Bu həqiqətən belədir. Mükəmməl qələm sahibləri, yazdıqları məqalədə, verdikləri informasiyada, çatdırdıqları xəbərdə gundəmi alt-üst də edə bilərlər, dolaşıq məsələləri çözə də. Mükəmməl yazı qabiliyyəti, iti qələmi, fərqli  düşüncəsi, vətən sevgisi ilə cəmiyyətə xidmət edən həmkarlarımız da var, gündəmi bir-birinə qatmaq həvəsi ilə bu sahəyə üz tutanlar da. Mən klassik jurnalistikanın, savadlı və vətəndaş mövqeyi olan istedadlı gənclərin jurnalistikamızda sayının çox olmasının tərəfdarıyam. Amma... Təəssüf ki, indiki gənclər kopyalayıb texniki tərcümə etdikləri mətnlərə özlərindən heç nə əlavə etmədən, öz fikirlərini münasibət bildirmədən onu  paylaşmağa üstünlük verirlər. Arzu edirəm ki, bu çətin sahədə duruş gətirmək, söz sahibi olmaq istəyən gənclərimizin sayı çox olsun. Mən illər boyu sözə könül verən, onun qədir-qiymətini bilən həmkarlarımı da ürəkdən təbrik edir, onlara söz omrü, kəlmə qüdrəti arzulayır, ömürlərini, illərini verdikləri bu çətin və müqəddəs peşənin inkişafında səbr və dözüm diləyirəm! Bayramımız mübarək, arzularımız əlçatan olsun!” deyə Telli Pənahqızı bildirib.

Əməkdar artist Nailə İslamzadə:

 

“Cəmiyyətin maariflənməsində, ictimai-siyasi hadisələrin doğru, dürüst xalq çatdırılmasında “Əkinçi”-dən başlayan ən-ənələr bu gün də davam edir. İnformasiyanın düzgün xalqa çatdırılması mənə elə gəlir ki, mətbuatın əsas vəzifələrindən biridir. Tamaşaçı, oxucu, dinləyici bizi sözlə tanıyır. Mətbuat işçilərinin silahı da, aləti də sözdür. Xalqa sözlə ifadə vermək, sözlə doğru davranmaq, doğru informasiya vermək və xalqı doğru yönəltmək medianın əsas prinsiplərindəndir. Mən Milli Mətbuat günü münasibəti ilə bütün mətbuat işçilərini təbrik edirəm, sözləri kəsərli, qüvvətli olsun. Bizim dediyimiz, yazdığımız, söylədiyimiz hər söz tamaşaçının, dinləyicinin, oxucunun ürəyinin qapısını həm aça, həm də bağlaya bilər. Mən arzu edirəm ki, dediyimiz, yazdığımız hər bir söz tamaşaçıların daim ürəklərinin qapısını açıq saxlasın” deyə Nailə İslamzadə bildirib.

Əməkdar artist Firdovsi Atakişiyev:

 

“Mən Milli Mətbuat günü münasibəti ilə bütün jurnalistlərimizi, media işçilərini ürəkdən təbrik edirəm. Onlara çox gözəl, maraqlı fəaliyyət və gələcək işlərində uğurlar arzulamaq istəyirəm. Jurnalistlərə iradım yoxdur. Çünki mən kimdəsə irad tutmağı sevmirəm. Hər kəs öz vicdanı qarşısında cavabdehdir. Ona görə mənim yaxşı, dürüst jurnalistlərə arzum budur ki, onların qarşısına həmişə maraqlı materiallar çıxsın və çox maraqlı insanlarla müsahibələr etsinlər. Azərbaycan mediasında çox ağıllı, işıqlı, savadlı insanlar olsun. Yazdıqları materialın bütövlüklə daxilinə varsınlar. Öz işlərini gözəl bilsinlər” deyə Firdovsi Atakişiyev deyib.

Aktyor Elməddin Cəfərov:

 

“Öncə bütün mətbuat işçilərini ürəkdən təbrik edirəm. Qələmləri hər zaman iti olsun. Bir iradım var. Başlıqları elə hazırlayıb, seçirlər ki.. Məqaləni oxuyandan sonra görürsən ki, başlıq tam başqadır, içindəki mətn tamamilə başqa. Bu günlərdə tanınmış futbolçumuz Ramil Şeydayev haqda bir yazı oxudum. Başlıqda belə yazılmışdı ki, Ramil Şeydayev Türkiyədə oynadığı kluba yarım milyon dollar qazandırıb. Dedim ki, ay Allah, görəsən nə olub? Məqaləni oxudum. Məlum oldu ki, Ramil Şeydayevi Türkiyədə oynadığı klub qovub, qalsaydı yarım milyon əlavə pul ödəyəcəkdilər ona, qovduğuna görə o pulu verməyiblər. Ramil Şeydayev də “Neftçi”-yə gəlir, klubun da yarım milyonu öz cibində qalıb. Başlıq dəhşətli dərəcədə idi. Bir az bunu dəyişsələr yaxşı olar” deyə aktyor bildirib.