Kəlbəcərin meşələrinin ümumi sahəsi 30 min hektara yaxındır. Bu da Azərbaycanın meşə fondunun əhəmiyyətli hissəsi hesab olunur. 

 

Kəlbəcər rayonu, əsasən onun mərkəzi və şərq hissələrində yerləşən meşələri yalnız enliyarpaqlı ağaclardan təşkil olunmuş palıd, fıstıq, vələs, ulas, vən, göyrüş, toz, qovaq, qaraağac, söyüd, çinar, dağdağan, ayıgilası, şam, ardıc, meşə-çöl bitkiləri ilə deyil, həm də meyvə ağacları-alma, armud, qoz, tut, fıstıq, itburnu, yemişan, qarağat, moruq, gilas, gilənar və s. ilə zəngindir. 

 

İşğaldan öncə Kəlbəcərdə təbii qaz yox idi. Ona görə də, məcburən qışda yanacaq oduncaq kimi meşələrdən istifadə edilirdi. İndi Kəlbəcərə qaz çəkilir. Qaz çəkilməsi isə daha meşələrin qırılmayacağına ümidləri artırır. Lazım gəldi, gəlmədi, meşələri qırmaq olmaz. Bir ağacı boşuna yox etmək günahdır, cinayətdir.

 

Unutmaq olmaz ki, qırdığımız bir ağac 50 ilə, 100 ilə, bəlkə daha çox müddətə böyüyərək günümüzə gəlib. Olanların qədrini bilək. Axı Kəlbəcərə qaz həm də ona görə çəkilir ki, ağacları qoruyaq.  

 

Bəzi hallarda yolların çəkilməsi və digər layihələrin də icrasında ağacların bir çox hallarda kütləvi məhv edilməsi, təbiətə ziyan vurulması halları müşahidə olunur. İcraçılar işlərini, layihələrini elə həyata keçirməlidirlər ki, təbiətə mümkün qədər az ziyan dəysin.

 

 

 

Meşələr üçün ağacların kəsilməsi bir təhlükədirsə ikinci daha ciddi təhlükə meşələrdə yanğın hadisələrinə yol açan hərəkətlərdir. Meşə ərazisində, meşələrə yaxın yerlərdə ocaq, tonqal yandırmaqdan mümkün qədər uzaq dayanmaq lazım. Meşə yaxınlığında otlaqları yandırmaq alovun meşəya keçməsi ilə nəticələnə bilər ki, bu böyük yanğın fəlakətinə yol açmaq riskini özündə daşıyır. Hansısas zərurətdən ocaq yandırılırsa istifadə edildikdən sonra tamamilə söndürülmədən ərazini tərk etmək yolverilməzdir. Kəndlərdə heyvandarlıq və digər təsərrüfat işləri ilə məşğul olan sakinlər xüsusi diqqətli olmalıdır. 

 

İşğaldan azad olunmuş ərazilərdə yaşayacaq sakinlər, hazırda orada fəaliyyət göstərən insanlar yaşadıqları ərazinin təbiətinə, ekologiyasına, ətraf mühitinə xüsusi diqqət, həssas münasibət göstərməlidirlər. Təbiətin ən səmərəli müdafiəsi yolu budur. Mövcud olan yaşlıllıqlar, ağaclar, bitkilər qorunmalı, məhv edilməməlidir. Nə qədər ki, ərazi qazla təmi olunmayıb yanacaq kimi qurumuş ağaclardan, ağacların qurumuş budaqlarından oduncaq kimi istifadə edilməsi tövsiyə olunur, canlı ağacları kəsmək olmaz. Unutmayın ki, bu gün məhv etdiyiniz təbiət sabah sizə başqa formada cavab verəcək. Yanacaq kimi kəndlərin ərazisində bağlarda, meşəlik yerlərdə qurumuş ağaclardan, canlı ağacların qurumuş budaqlarından istifadə edilməlidir. Bu, həm də meşənin və həyətlərdə vaxıtlə mövcud olmuş meyvə bağlarının təmizlənməsi, sağlamlaşdırılması demək olar.  

 

 

Onu da unutmaq olmaz ki, ekoloji hüquqpozmalar, təbiətə ziyan vurulması kimi qanunsuzluqlarla bağlı inzibati məsuliyyətlə yanaşı, cinayət işi də qanunvericilikdə əksini tapır. Cinayət Məcəlləsinin 259.2.4-cü maddəsi külli miqdarda ziyan vurmaqla qanunsuz ağac kəsmə hallarına qarşı cinayət  məsuliyyəti yaradır.

 

Baş Prokurorluğun Mətbuat xidmətindən verilən məlumata görə, ətraf mühitin qorunması, təbiətin mühafizəsi və ekoloji vəziyyətin yaxşılaşdırılmasına yönəlmiş dövlət siyasəti ölkəmizin dayanıqlı inkişaf strategiyasının mühüm tərkib hissəsidir və bu məqsədlə mövcud ekoloji problemlərin aradan qaldırılması, o cümlədən yaşıllıqların qorunması və bərpası naminə genişmiqyaslı işlər görülür.

 

Kompleks tədbirlərin davamı kimi, bu sahədə yol verilən qanun pozuntularının aşkar olunaraq qarşısının alınması və profilaktikası daim diqqət mərkəzində saxlanmaqla, təbiətin mühafizəsinin təkmilləşdirilməsi ilə bağlı prioritetlər üzrə dövlət qurumları, o cümlədən hüquq-mühafizə orqanları tərəfindən birgə fəaliyyət həyata keçirilir.

 

İnzibati Xətalar Məcəlləsinin 253.1. maddəsi meşəqırma bileti (orderi) olmadan meşə fondunda köküstə yaş ağacların və kolların qanunsuz kəsilməsinə və ya zədələnməsinə, yaxud meşə əkinlərində, tingliklərində, böyümə və plantasiya sahələrində toxmacarların və tinglərin, yaxud meşənin bərpa edilməsi üçün müəyyən olunmuş sahələrdə təbii əmələ gəlmiş cavan ağacların və cücərtilərin məhv edilməsinə və ya zədələnməsinə görə fiziki şəxslərin yeddi yüz manatdan min manatadək məbləğdə, vəzifəli şəxslərin dörd min beş yüz manatdan beş min manatadək məbləğdə cərimə edilməsini nəzərdə tutur. 

 

Cinayət Məcəlləsinin 260.1. maddəsinə görə, odla və ya digər yüksək təhlükə mənbələri ilə ehtiyatsız davranma üzündən meşələri, meşə fonduna daxil olmayan ağac və ya kol əkililərini və digər yaşıllıqları məhv etmə və ya zədələmə min manatdan iki min manatadək miqdarda cərimə və ya bir ilədək müddətə islah işləri və ya bir ilədək müddətə azadlığın məhdudlaşdırılması və ya bir ilədək müddətə azadlıqdan məhrum etmə ilə cəzalandırılır.

 

Qeyd olunan  əməllər külli miqdarda ziyan vurmaqla törədildikdə iki min manatdan dörd min manatadək miqdarda cərimə və ya iki ilədək müddətə islah işləri və ya bir ilədək müddətə azadlığın məhdudlaşdırılması və ya iki ilədək müddətə azadlıqdan məhrum etmə ilə cəzalandırılır. 

 

 

Gəlin təbiətə, onun əsas seqmenti olan meşələrə, ağacları qırmayaq, yandırmayaq. Bu zaman həm təbiətimizə fayda vermiş olarıq, həm də qanunların sərt üzü ilə qarşı-qarşıya qalmarıq. 

 

Qeyd: “Başlıbelin İnkişafına Dəstək” İctimai Birliyinin Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Təbiətin qorunması üçün icmalarla iş” layihəsi çərçivəsində hazırlanıb. Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin rəsmi mövqeyini əks etdirməyə bilər.