Yay mövsümündə ən çox gedilən yerlər çimərlik və akvaparklardır. Hansına  daha çox üstünlük verildiyi və sərfəli olduğu ilə bağlı isə turizm eksperti  Ceyhun Aşurova sual ünvanladıq. Ekspert mövzu barədə Moderator.az-a danışdı:

"Baxmayaraq ki, ödənişsiz çimərliklər də var. Ancaq  bir çox dənizkənarı yerlərdə özəlləşdirilmiş , özəl sahibkarlıq fəaliyyəti ilə məşğul olan yerlər də çoxluq təşkil edir və buraya giriş ödənişlidir. Bu ödənişli çimərliklərin qiymətləri 10 AZN-dən 60 AZN-ə qədər dəyişir. Burada göstərilən xidmətin qarşılığı olaraq bu, adambaşına hesablanan qiymətlərdir. Əlbəttə ki, qiymət fərqlərinin də qarşılığında xidmət, şəraitlər fərqlidir. Bu ödənişli yerlərin əksəriyyətində çimərliklər təmizdir. Burada sahibkarlıq obyekti tərəfindən müəyyən təmizlik işləri görülür. Eyni zamanda, hovuz, akvaparkı olan çimərliklərin qiymətləri dəyişir. Əhali daha çox dənizkənarı yerlərə üz tutur. İnsanlar Şıxov,  Zaqulba, Mərdəkan, Bilgəh kimi ərazilərə daha çox gedirlər. Burada, əlbəttə ki, ödənişsiz, xalqa açıq olan çimərliklər də mövcuddur. Təssüflər olsun ki, tam ödənişsiz olan yerlərin bir çoxu demək olar ki, baxımsız vəziyyətdədir. Bəzən kölgə altında oturmağa yer belə olmur. Hərə öz imkanı hesabına gedir. Amma bəzi yerlər də vardır ki, onların müxtəlif xidmətləri var. Məsələn, müəyyən vəsait ödəməklə masa və kölgəlik əldə etmək olar. Sadəcə, masa üçün ümumi ödəniş edirsiniz və adambaşı hesablanacaq  bir ödəniş yoxdur. Lakin bağlı ərazilərdə həm hotel xidməti,  həm də çimərlik xidməti var. Hovuzun yanında musiqi, restoran xidmətləri mövcuddur ki, orada ödəniş adamnaşına olan qiymətlərlə hesablanır. Hər bir halda daha çox tələbat dənizkənarı çimərliklərədir. Buna baxmayaraq, ikisi bir arada - həm çimərlik ərazisi olan, həm də hovuzu , akvaparkı olan yerlər əhali üçün daha maraqlıdır. Gedəndə isə adambaşına müəyyən qədər girişhaqqı ödənilməlidir. Girişhaqqı ödənildikdən sonra həmin şəxslər oradan çimərlik üçün dəsmal, şezlonq, kölgəlik müxtəlif bu kimi imkanlar əldə etmiş olurlar".

 

Ekspert qeyd edib ki, bununla yanaşı, alınacaq  qida, içkilərin ödənişləri də ayrı edilir. Bunun girişhaqqına aidiyəti yoxdur. 

 

                                                                                                      

 

 

Moderator.az ən sərfəli akvaparkları təqdim edir: 

          «AF Hotel Aqua Park» - 15 manat

Novxanı  qəsəbəsində fəaliyyət göstərən AF Hotel Aqua Park Kompleksində qiymətlər hələ ki normaldır. Belə ki, 2 yaşa qədər uşaqlara giriş pulsuzdur, 12 yaşa qədər  uşaqlar 10 manat, bundan böyüklər üçün isə 15 manat ödəməlidir. Həftəsonu və həftəiçi üçün qiymət eynidir. Bu məbləğə ancaq hovuzdan və çimərlik aksesuarlarından istifadə daxildir. Kompleksə su, yemək və s. götürməyə icazə verilmir.     

«Open AİR» - 10 manat

Şıxovda yerləşən “Open AİR” akvparkında isə bu həftə giriş 10 manatdır.  Yalnız 3 yaşa qədər olan uşaqlar içəri pulsuz keçə bilərlər. Qiymətlər həftə sonunda da eyni qalır. Gələn həftədən isə giriş qiymətləri 12 manat olacaq. Akvaparka gələnlər özləri ilə yalnız su və uşaq yeməklərini götürə bilərlər. 

«Bilgəh Aqua Parkı» - 15-35 manat

«Jumeirah Bilgah Beach Hotel»dəki akvaparkda isə həftəsonu qiymətlər adi günlərlə müqayisədə bahadır. Burada adi günlərdə uşaqlar üçün 15 manat, böyüklər üçün isə 25 manat ödəniş etmək lazımdır. Şənbə-bazar günləri isə qiymətlər 10 manat baha olur: uşaqlar 25 manat, böyüklər 35 manat. Bu qiymətlərə su və meyvə də daxildir. Başqa qida məhsullarının içəri keçirilməsinə icazə verilmir. Burada da 3 yaşa qədər uşaqlar ödənişsiz keçə bilər.